قما باتىس قازاقستان وبلىسى بويىنشا دەپارتامەنتى «Imrat Group» اتتى قارجى پيراميداسىنىڭ قىزمەتىن توقتاتتى.
كانادانىڭ، گونكونگ پەن ۇلىبريتانيانىڭ اتىنان تىركەلگەن جالعان حالىقارالىق ينۆەستيسيالىق كومپانيا رەتىندە كورىنىپ، الاياقتار ازاماتتارعا كۇندەلىكتى 0،5%-دان 1،5%-عا دەيىن «جوعارى تابىس» ۋادە ەتكەن ءتۇرلى باعدارلامالاردى ۇسىنعان، - دەپ حابارلايدى Aqshamnews.kz.
قاتىسۋ ءۇشىن ازاماتتار ارنايى رەفەرالدى سىلتەمە ارقىلى تىركەلىپ، كريپتوۆاليۋتا ءاميانىنا 20-دان 10 000 اقش دوللارىنا دەيىن (USDT بالاماسىندا) قاراجات اۋدارۋى قاجەت بولعان.
الايدا شىن مانىندە، سالىمدار تەك پيراميدا ىشىندەگى قاتىسۋشىلار اراسىندا قايتا ءبولىنىپ وتىرعان – بۇرىنعىلارعا تولەمدەر جاڭادان تارتىلعان قاراجات ەسەبىنەن جۇرگىزىلگەن.
قاتىسۋشىلاردى تارتۋ ماقساتىندا كۇدىكتىلەر زاڭدى ينۆەستيسيالىق قىزمەت تۇرىندە كورسەتۋ ءۇشىن بەلسەندى جارناما جۇرگىزىپ، كەڭسەلەر جالداپ، ءتۇرلى پرەزەنتاسيالار مەن كونفەرەنسيالار ۇيىمداستىرعان. سونداي-اق، Telegram-ارنا اشىپ، وندا تۇراقتى تۇردە جوعارى تابىس پەن ينۆەستيسيالاردىڭ قاۋىپسىزدىگىن ناسيحاتتايتىن بەينەماتەريالدار جاريالاپ وتىرعان.
زاڭسىز قىزمەت دەر كەزىندە توقتاتىلعانىنىڭ ارقاسىندا پيراميداعا بارلىعى 30 ازامات تارتىلعان. ولاردىڭ سالعان قاراجاتى 89 ملن تەڭگەدەن اسادى.
قىلمىستىق ءىس سوتقا جولداندى.
ق ر قىلمىستىق-پروسەستىك كودەكسىنىڭ 201-بابىنا سايكەس وزگە اقپارات جاريا ەتىلمەيدى.
قارجىلىق مونيتورينگ اگەنتتىگى قارجى پيراميدالارىنىڭ جولىن كەسۋ جانە ولاردى انىقتاۋ بويىنشا جۇيەلى جۇمىستاردى جالعاستىرۋدا.
2025 جىلدىڭ باسىنان بەرى:
- 31 قارجى پيراميداسىنا قاتىستى 90 سوتقا دەيىنگى تەرگەپ-تەكسەرۋ اياقتالدى؛
- 7 ملرد تەڭگە كولەمىندە زالال وتەلدى؛
- جالعان ينۆەستيسيالىق جوبالار تۋرالى اقپارات تاراتقان 14 مىڭنان استام ينتەرنەت-رەسۋرس بۇعاتتالدى؛
- Instagram مەن Telegram پلاتفورمالارىندا 535 مىڭعا جۋىق قاتىسۋشىسى بار 100-دەن استام زاڭسىز چاتتار جابىلدى.
قما سايتىندا قارجى پيراميدالارىنىڭ ءتىزىمى جاريالانعان.
قارجى پيراميدالارىنىڭ بەلگىلەرىن تەكسەرۋگە ارنالعان «Baiqa، piramida!» Telegram-بوتى ىسكە قوسىلدى.
ەگەر ءسىز نەمەسە جاقىندارىڭىز قارجى پيراميداسىنىڭ قىزمەتىنە تاپ بولساڭىز، تۇرعىلىقتى جەرىڭىز بويىنشا ەكونوميكالىق تەرگەپ-تەكسەرۋ دەپارتامەنتىنە حابارلاسۋىڭىزدى سۇرايمىز.
ازاماتتاردى قىراعى بولۋعا جانە ءوز جيناقتارىن كۇماندى قارجىلىق جوبالارعا سالماۋعا شاقىرامىز.