قازاقستاندا جىل باسىنان بەرى 326،3 مىڭ توننا نان ءوندىرىلدى. الەمدە جىل سايىن 16 قازان نان كۇنى رەتىندە اتالىپ وتىلەدى.
قازاقستان استىققا باي، الەمدىك نارىقتا ءوز ورنىن بەكىتكەن، ىشكى نارىقتى تولىقتاي قامتاماسىز ەتكەن، ناندى اسا قادىرلەيتىن ءارى نان پىسىرۋدە وزىندىك ءداستۇرىن قالىپتاستىرعان ەل.
وتكەن جىلى ەلىمىزدە 510،1 مىڭ توننا نان، ال اعىمداعى جىلدىڭ 8 ايىندا – 326،3 مىڭ توننا وندىرىلگەن، - دە حابارلايدى Aqshamnews.kz.
نان زاۋىتتارىنىڭ وندىرىستىك قۋاتى جىلىنا 457،4 مىڭ توننا.
ءونىمنىڭ نەگىزگى بولىگى – بيدايدان پىسىرىلگەن قالىپتى نان، ۇلەستىك سالماعى جالپى اسسورتيمەنتتىڭ شامامەن 60% تيەسىلى.
تۇتىنۋشىلار سۇرانىسىنا قاراي ءونىم تۇرلەرى جىل سايىن كوبەيۋدە. ونىڭ قاتارىندا تەك نان تۇرلەرى عانا ەمەس، سونىمەن قاتار قىسقا جانە ۇزاق مەرزىمگە ساقتالاتىن توقاش، ۇننان جانە كونديتەرلىك ونىمدەر دە بار.
ەلىمىزدىڭ 2021–2030 جىلدارعا ارنالعان اوك دامىتۋ تۇجىرىمداماسى اياسىندا اۋىل شارۋاشىلىعى ونىمدەرىن قايتا وڭدەيتىن كاسىپورىندارعا مەملەكەتتىك قولداۋ شارالارى قاراستىرىلعان.
اتاپ ايتقاندا، جىلىنا 2 مىڭ توننادان استام قۋاتى بار نان-توقاش نەمەسە كونديتەرلىك ونىمدەر شىعاراتىن كاسىپورىندارعا ينۆەستيسيالىق شىعىنداردىڭ 25%-ىن وتەۋ تۇرىندە قولداۋ كورسەتىلەدى.
بۇدان بولەك، ۇن وندىرۋشىلەر ءۇشىن سالىقتىق جەڭىلدىكتەر بار. مىسالى، سالىق كودەكسىنىڭ 411-بابىنا سايكەس، بۇل سالاداعى ققس مولشەرلەمەسى 70%-عا تومەندەتىلگەن.
قازاقستانداعى نان ءوندىرىسى ىشكى نارىقتاعى قاجەتتىلىكتى تولىق قامتيدى.
ءاربىر قامىر ءونىمى ديقاننىڭ، ديىرمەنشىنىڭ، نaۋبايشىنىڭ جانە لوگيستتىڭ ماڭداي تەرىمەن كەلەدى.
«ەگىس دالاسىنان – دۇكەن سورەسىنە دەيىن» جالعاساتىن تۇراقتى ءوندىرىس تىزبەگىنىڭ ارقاسىندا حالقىمىز كۇن سايىن ساپالى ءارى قولجەتىمدى نانمەن قامتاماسىز ەتىلىپ وتىر.