ورالدا دارىگەرلەر 12 جاستاعى قىزدىڭ اسقازانىنان جارتى كەلىگە جۋىق شاش الىپ شىقتى، دەپ حابارلايدى Aqshamnews.kz ءتىلشىسى.
باتىس قازاقستان وبلىسىنداعى مەديسينا قىزمەتكەرلەرى سيرەك ءارى كۇردەلى جاعدايمەن بەتپە-بەت كەلدى. بىرنەشە اي بويى ءىشتىڭ اۋىرۋى، تابەتتىڭ تومەندەۋى مەن السىزدىككە شاعىمدانعان قىزدى تەكسەرۋ بارىسىندا ونىڭ اسقازانىنان تىعىزدالعان بوگدە زات — شاش ماسساسى تابىلعان.
مامانداردىڭ ايتۋىنشا، بۇل جاعداي تريحوبەزوار دەپ اتالادى. ول تريحوتيلومانيا (شاش جۇلۋ) مەن تريحوفاگيا (شاش جەۋ) سەكىلدى پسيحولوگيالىق اۋىتقۋلاردىڭ سالدارىنان داميدى.
قىزدىڭ اتا-اناسى باستاپقىدا بەلگىلەرگە ءمان بەرمەگەنىمەن، قىزدىڭ جاعدايى ناشارلاي باستاعان سوڭ، ونى شۇعىل تۇردە اۋرۋحاناعا جەتكىزگەن. دارىگەرلەر وتا جاساپ، ونىڭ اسقازانىنان شامامەن 500 گرامم شاشتى الىپ شىقتى. وپەراسيا ءساتتى ءوتتى. ءقازىر پاسيەنتتىڭ جاعدايى ءبىرقالىپتى.
مەديسينا قىزمەتكەرلەرىنىڭ ايتۋىنشا، مۇنداي جاعدايلار وتە سيرەك كەزدەسەدى. ەگەر دەر كەزىندە انىقتالىپ، قاجەتتى كومەك كورسەتىلمەسە، بۇل ومىرگە ءقاۋىپ توندىرەتىن اسقىنۋلارعا الىپ كەلۋى مۇمكىن. قىزعا الداعى ۋاقىتتا مەديسينالىق باقىلاۋمەن قاتار، پسيحولوگيالىق قولداۋ دا قاجەت بولادى.