كۇردەلى جاڭعىرتۋدان وتكەن سايران كولى جاعالاۋىندا «تازا قازاقستان» رەسپۋبليكالىق ەكولوگيالىق اكسياسى اياسىندا اۋقىمدى سەنبىلىك ءوتتى.
ءىس-شارانىڭ ماقساتى قوعامدا ەكولوگيالىق مادەنيەتتى قالىپتاستىرۋ جانە قورشاعان ورتانى قورعاۋ ماسەلەسىنە قوعام نازارىن اۋدارۋ. يگى باستامانى انشىلەر، اكتەرلەر، اقىندار مەن جازۋشىلار ت.ب. مادەنيەت پەن ونەر وكىلدەرى قولدادى.
«سايران كولى – جاڭارىپ، تۇرلەنگەن دەمالىس ايماعى. مۇندا قالا تۇرعىندارى مەن قوناقتارى تابيعات اياسىندا تىنىعىپ، وتباسىمەن، دوستارىمەن جاقسى ۋاقىت وتكىزە الادى»، – دەدى الماتى اكىمىنىڭ ورىنباسارى ازامات قالدىبەكوۆ قۇتتىقتاۋ سوزىندە.
سەنبىلىككە قازاقستاننىڭ ەڭبەك سىڭىرگەن مادەنيەت قايراتكەرى، بەلگىلى ەسترادا ءانشىسى جۇبانىش جەكسەن ۇلى، تەاتر جانە كينو اكتەرى، ق ر ەڭبەك سىڭىرگەن مادەنيەت قايراتكەرى ۇلان ءنۇسىپالى، ق ر ەڭبەك سىڭىرگەن قايراتكەرى باقىت تۋشايەۆ، تۇركسوي جازۋشىلار وداعىنىڭ ءتوراعاسى ۇلىقبەك ەسداۋلەت، ق ر جازۋشىلار وداعىنىڭ مۇشەسى، قوعام قايراتكەرى بەكنۇر قيسىقوۆ، الماتى سيركىنىڭ ارتيستەرى، گيننەستىڭ رەكوردتار كىتابىنا ەنگەن اكروباتتار باتىر جانۇزاق پەن مارلەن ماراتوۆ قاتىستى.
سونداي-اق، ءىس-شاراعا اقىن مۇراتحان شوقان، تەاتر جانە كينو اكتريسالارى ليزا سەرىكوۆا مەن كاماليا بايتىلەۋوۆا، انشىلەر تاحمينا اشىمبەكوۆا، كەڭەس ءالىمجان، گاريفا يگىسىنوۆا، ديماش داۋلەتوۆ، «جاڭا عاسىر» تەاترىنىڭ ارتيستەرى جانە وزگە دە مادەنيەت قايراتكەرلەرى مەن ونەر مايتالماندارى قاتىستى.
ولار جاستاردى ەكولوگيالىق جاۋاپكەرشىلىككە باۋلۋدىڭ ماڭىزىن ەرەكشە اتادى.
«تابيعات – بىزگە امانات. وسىنداي كوركەم جەرلەردىڭ، جالپى قورشاعان ورتانىڭ تازالىعىن ساقتاۋ – كەلەشەك ۇرپاق الدىنداعى بورىشىمىز. بارىمىزدى باعالاي بىلەيىك»، – دەدى ق ر ەڭبەك سىڭىرگەن مادەنيەت قايراتكەرى، بەلگىلى ءانشى جۇبانىش جەكسەن ۇلى.
اكتريسا كاماليا بايتىلەۋوۆا مۇنداي يگى ىستەردىڭ تۇراقتى تۇردە ۇيىمداستىرىلادى دەپ سەنەدى.
«سايرانداعى سەنبىلىك قوقىس تازالاۋ شاراسى عانا ەمەس، بۇل قالا تۇرعىندارىنىڭ قورشاعان ورتاعا دەگەن جاۋاپكەرشىلىگىنىڭ سيمۆولىنا اينالدى. وسىنداي باستامالار جيىلەپ، الماتىنىڭ كوركەيۋىنە بەي-جاي قارامايتىن ازاماتتار كوبەيە تۇسەدى دەگەن ۇمىتتەمىن»، – دەدى كاماليا بايتىلەۋوۆا.
تەاتر جانە كينو اكتەرى باقىت تۋشايەۆ الماتىلىقتار تابيعاتقا سوزبەن ەمەس، ناقتى ىسپەن جاناشىرلىق تانىتۋى قاجەت ەكەنىن ايتتى.
تۇركسوي جازۋشىلار وداعىنىڭ ءتوراعاسى ۇلىقبەك ەسداۋلەت ەكولوگيا مەن قوعامدىق كەڭىستىكتەرگە جاۋاپكەرشىلىكپەن قاراۋ – ءاربىر ازاماتتىڭ قالانى جايلى، ءقاۋىپسىز ءارى تارتىمدى ورتاعا اينالدىرۋعا قوسقان ۇلەسى ەكەنىن ايتتى.
«بىرلەسكەن كۇش-جىگەردىڭ ارقاسىندا عانا الماتىنىڭ كوركەيۋىنە باعىتتالعان يگى ىستەردى ساقتاپ، دامىتا الامىز»، – دەدى ول.
جۇلدىزدارمەن بىرگە ءىس-شاراعا «جاسىل ەل» جاساعىنىڭ ساربازدارى، ەرىكتىلەر مەن كوميۋنيتي ورتالىقتاردىڭ مۇشەلەرى – بارلىعى 1000-نان استام ادام اتسالىستى.
ايتا كەتەيىك، بۇگىن الماتىنىڭ بارلىق 8 اۋدانىندا جەرگىلىكتى ەكوسەنبىلىكتەر ءوتتى. جالپى 11 مىڭعا جۋىق ادام قاتىستى. 275 ارنايى تەحنيكا جۇمىلدىرىلىپ، 1 460 تەكشە مەتردەن استام قوقىس شىعارىلدى.