ورال قالاسىندا توك سوققان ەكى ەر ادام جانساقتاۋ بولىمىنە ءتۇستى، دەپ حابارلايدى Almaty-akshamy.kz Inform.kz-كە سىلتەمە جاساپ.
زاچاگان كەنتىنىڭ اكىمى اققالي اۋبەكەروۆتىڭ ايتۋىنشا، وقيعا 28 ماۋسىم كۇنى م.موڭكە ۇلى كوشەسى بويىندا بولدى.
«27 ماۋسىم كۇنى كەشكە قاراي وسى اۋداندا ەلەكتر جارىعى ءوشىپ قالعان بولاتىن. ونشاقتى كوپقاباتتى ۇيدە، №6 ەمحانادا، جەكپە-جەك سپورت مەكتەبىندە، سورعى ستانساسىندا جارىق بولمادى. كەشە «باتىس قازاقستان ەلەكتر جەلىلىك كومپانياسى» ج ش س قىزمەتكەرلەرى كەلىپ، قالپىنا كەلتىرۋ جۇمىستارىن جۇرگىزدى. جەر استىنداعى ۇزىلگەن كابەلدى جالعاۋ كەزىندە ەكى ادامدى توك سوعىپ، ولاردى سول بويدا جەدەل جاردەم بريگاداسى الىپ كەتتى»، دەدى ا.اۋبەكەروۆ.
بقو دەنساۋلىق ساقتاۋ باسقارماسى باسپا ءسوز قىزمەتىنىڭ ناقتىلاۋىنشا، جەدەل جاردەمگە شاقىرتۋ ساعات 16.52-دە تۇسكەن.
«وقىس وقيعا سالدارىنان 1989 جىلعى ەر ادامنىڭ بەتى، ەكى قولى، ەكى اياعى كۇيگەن. 2-3 دارەجەلى 15-16 پايىز كۇيىك جاراقاتىن العان. باستاپقىدا جانساقتاۋ بولىمىنە تۇسكەنىمەن، كەيىن پالاتاعا اۋىستىرىلدى. جاعدايى تۇراقتى. 1979 جىلعى ەر ادامنىڭ بەتى، ەكى قولى مەن اياعى، دەنەسىن 55 پايىز (3-دارەجەلى) كۇيىك شالعان. جاعدايى اۋىر، جانساقتاۋ بولىمىندە»، دەپ حابارلادى ۆەدومستۆودان.
بقو بويىنشا ەڭبەك ينسپەكسياسى باسقارماسىنىڭ باسشىسى اسىلۇلان دوسجانوۆ مەكەمەگە ماتەريال تۇسكەننەن كەيىن كوميسسيا قۇرىلىپ، تەكسەرىلەتىنىن جەتكىزدى.