جۇرگىزۋشىلەر «التىن وردا» بازارى ماڭىنداعى جاڭا كوپىردىڭ جاعدايىنا شاعىمداندى، دەپ حابارلايدى Almaty-akshamy.kz Inform.kz-كە سىلتەمە جاساپ.
الەۋمەتتىك جەلىدە جۇرگىزۋشىلەردىڭ ءبىرى «التىن وردا» ماڭىنداعى جولايرىقتىڭ ساپاسىن كورسەتكەن ۆيدەوسىن جاريالادى. بەينەجازبادان شۇڭقىر مەن كەدىر-بۇدىر جولدى بايقاۋعا بولادى. «قازاۆتوجول» ۇلتتىق كومپانياسى «التىن-وردا» بازارى ماڭىنداعى الماتى-بىشكەك تاس جولىنىڭ رايىمبەك-الماتى ۋچاسكەسىندەگى كۇردەلى جوندەۋ جۇمىستارى ءالى جالعاسىپ جاتقانىن ءمالىم ەتتى.
«بيىل بۇل نىساندا قالعان جۇمىستار جۇرگىزىلىپ جاتىر. ولاردىڭ ىشىندە: قيىرشىقتاس-ماستيكا اسفالتبەتون جابىنىنىڭ ۇستىڭگى قاباتىن جابۋ،جاياۋ جۇرگىنشىلەر وتكەلدەرىندە پوليگال شاتىردى جانە ليفتىلەردى ورناتۋ، تەمىربەتون جانە توسقاۋىل قورشاۋلارىن بوياۋ، سونداي-اق جول بەلگىلەرىن قويۋ. نىسانداعى جۇمىستاردى تولىق اياقتاۋ 2022 جىلعا جوسپارلانعان»، - دەپ حابارلادى «قازاۆتوجول» كومپانياسىنىڭ باسپا ءسوز قىزمەتى.
سونىمەن قاتار، كومپانيا وكىلدەرى جاقىندا قۇرىلىسشىلار جولدىڭ ەكىنشى، نەگىزگى قاباتىن توسەيتىنىن ايتتى.
«بۇل رەتتە، قيىرشىقتاستى-ماستيكا اسفالتبەتوننىڭ سوڭعى ۇستىڭگى قاباتىن مونتاجداۋ بويىنشا بۇل ۋچاسكەلەر تۇتاس بولۋى ءۇشىن تومەنگى قابات فرەزەرلەنىپ، قايتا اسفالتبەتون توسەلەدى»، - دەپ اتاپ ءوتتى كومپانياداعىلار.
ەسكە سالايىق، «التىن وردا» بازارىنىڭ جانىنداعى ەستاكادا بىلتىر جەلتوقسان ايىندا اشىلعان بولاتىن.