الماتىدا جاڭا وقۋ جىلىندا 287 مەكتەپ 300 مىڭعا جۋىق وقۋشىنى قابىلدايدى.
الماتى قالالىق ءبىلىم باسقارماسىنىڭ باسشىسى ءلاززات جىلقىبايەۆا وڭىرلىك كوممۋنيكاسيالار قىزمەتىندە مەگاپوليس مەكتەپتەرىنىڭ جاڭا وقۋ جىلىنا دايىندىعى مەن وقۋشىلاردىڭ سانيتارلىق-ەپيدەميولوگيالىق قاۋىپسىزدىگىن قامتاماسىز ەتۋ تۋرالى ايتتى، دەپ حابارلايدى Almaty-akshamy.kz.
ل.جىلقىبايەۆانىڭ ايتۋىنشا، الماتىدا جاڭا وقۋ جىلى قاتاڭ سانيتارلىق-ەپيدەميولوگيالىق تالاپتاردى ساقتاي وتىرىپ، قالىپتى فورماتتا باستالادى دەپ جوسپارلانۋدا. بۇل رەتتە 287 مەكتەپ 300 مىڭعا جۋىق وقۋشى قابىلدايدى، ونىڭ 30 مىڭى - ءبىرىنشى سىنىپ وقۋشىلارى. 68 مىڭنان استام ستۋدەنت 82 كوللەدجدە وقۋدى باستايدى.
ايتا كەتسەك، مەكتەپكە دەيىنگى ۇيىمدار قالىپتى جۇمىسىنا ورالدى، قازىرگى ۋاقىتتا 860 بالاباقشا مەن شاعىن ورتالىقتاردا 69 مىڭنان استام بالا بار.
سونىمەن قاتار ل.جىلقىبايەۆا بارلىق ءبىلىم بەرۋ ۇيىمدارى Ashyq جوباسىنا قوسىلعانىن جانە 100% قاجەتتى مولشەردە جۋعىش، دەزينفەكسيالاۋشى جانە انتيسەپتيكالىق قۇرالدارمەن قامتاماسىز ەتىلگەنىن ايتتى.
«1 قىركۇيەكتەن باستاپ ءبىلىم بەرۋ مەكەمەلەرىندە سانيتارلىق تالاپتاردىڭ ساقتالۋىنا تۇراقتى باقىلاۋ جۇرگىزىلەدى، ونىڭ ىشىندە تەمپەراتۋرانى ولشەۋ، ۆيزۋالدى تەكسەرۋ، جەلدەتۋ رەجيمدەرى، كۆارس، ىلعالدى تازالاۋ جانە باسقا دا شارالار. رۇقسات ەتىلمەگەن ادامداردىڭ كىرۋىنە تىيىم كۇشىنە ەنەدى جانە بۇقارالىق ءىس-شارالار بولمايدى»، - دەدى باسقارما باسشىسى.
ل. جىلقىبايەۆا قالاداعى قازىرگى ەپيدەميولوگيالىق جاعدايدى ەسكەرە وتىرىپ، وقۋ پروسەسى قالاي ۇيىمداستىرىلاتىنى تۋرالى ايتتى.
«الماتى «قويۋ قىزىل» ايماقتا بولۋدى جالعاستىرۋدا. وسىعان بايلانىستى، ءبىلىم بەرۋدى ۇيىمداستىرۋدا وقۋشىلاردىڭ وزدىگىنەن كەلۋىن بولدىرماۋ جانە بالالار اراسىندا ينفەكسيانىڭ تارالۋ ءقاۋپىن ازايتۋ ماقساتىندا وقۋ پروسەسى ءبىر مەزگىلدە ءۇش باعىتتا جۇرەتىن بولادى. بىرىنشىدەن، وقۋشىلارعا اتا-انالارىنىڭ وتىنىشتەرى نەگىزىندە ونلاين وقىتۋ ۇيىمداستىرىلادى. وسىلايشا، اتا-انالارعا بالاسىن مەكتەپكە بەرۋدى نەمەسە وقۋدى قاشىقتان جالعاستىرۋدى تاڭداۋ قۇقىعى بەرىلەدى»، - دەدى ل. جىلقىبايەۆا.
ۇشىنشىدەن، وفلاين وقىتۋ نەگىزىنەن 1-5 سىنىپتاردى، ءبىتىرۋشى 9-11 سىنىپ وقۋشىلارىن قامتيدى جانە سىنىپتاردا وقۋشى سانى 25 ادامنان اسپايدى. وسىلايشا ءبىلىم باسقارماسى ءداستۇرلى ءبىلىم بەرۋ فورماتىنا كەزەڭ-كەزەڭمەن كوشۋدى قامتاماسىز ەتۋدى جوسپارلاپ وتىر.
ل.جىلقىبايەۆا بۇگىندە مۇعالىمدەر مەن اتا-انالار اراسىندا قاجەتتى ءتۇسىندىرۋ جۇمىستارى جۇرگىزىلىپ جاتقانىن ايتتى.
بارلىق سۇراقتار بويىنشا وقۋشىلاردىڭ اتا-انالارى مەكتەپ اكىمشىلىگىنە نەمەسە تىكەلەي ءبىلىم باسقارماسىنا حابارلاسا الادى.