وسى قوسىمشانى وقۋشىلار رەسپۋبليكالىق حاكاتوندا قورعاپ، باس جۇلدە يەلەنگەن
اباي وبلىسى سەمەي قالاسىنىڭ №7 جالپى ورتا ءبىلىم بەرەتىن مەكتەپ-ليسەيىنىڭ 9 سىنىپ وقۋشىسى ماراتوۆ نۇرلىحان مەن 8 سىنىپ وقۋشىسى تەمىربايەۆ تەمىرلان تۋريستەرگە ارنالعان ءموبيلدى قوسىمشا ويلاپ تاپتى، دەپ حابارلايدى Almaty-akshamy.kz.
«ءموبيلدى قوسىمشانىڭ اتاۋى - Discover Abai. ءبىز جايلى ساياحاتتاۋعا مۇمكىندىك بەرەمىز ءارى تۋريستەرگە جاڭا جەرلەر كورىپ، قازاق ءتىلىن ۇيرەنىپ، جەرگىلىكتى مادەنيەتپەن تانىسۋعا كومەك بەرەمىز»، - دەيدى نۇرلىحان.
ايتا كەتۋ كەرەك، ءدال وسى قوسىمشانى وقۋشىلار رەسپۋبليكالىق حاكاتوندا قورعاپ، باس جۇلدە يەلەندى.
قازاق، ورىس جانە اعىلشىن تىلىندە قولدانۋ مۇمكىندىگى بار قوسىمشاعا تىركەلۋگە بولادى. پىكىر قالدىرۋ، كەرى بايلانىس، باسقا پروفيلدەردى قاراۋ مۇمكىندىكتەرى دە قاراستىرىلعان. تۋريستەرگە ىڭعايلى بولۋ ءۇشىن قوسىمشاعا كارتا ورنالاستىرىلعان: پايدالانۋشى بەلگىلى ءبىر وبەكتىنىڭ ورنالاسقان جەرىن ونىڭ مەكەن-جايىن باسۋ ارقىلى بىلە الادى. تۋريستەر ءۇشىن قازاق ءتىلى ساباقتارى، اباي وبلىسىنان شىققان بەلگىلى تۇلعالاردىڭ ءومىرباياندارى، ۇلى ابايدىڭ ولەڭدەرى بار.
«جوبانىڭ كليەنتتىك بولىگى React Native كىتاپحاناسىن قولدانا وتىرىپ، JavaScript - تە جاسالعان. ال ونىڭ ارتىقشىلىعى - JavaScript-تەگى كود Android جانە iOS جۇيەلەرىندە جۇمىس ىستەيدى. ياعني، ءار امالدىق جۇيە ءۇشىن بولەك كود جازۋدىڭ قاجەتى جوق. سونىمەن قاتار، تەحنولوگيانىڭ بۇل جيىنتىعى جوبانى ماسشتابتاۋدى جانە سىناۋدى جەڭىلدەتەدى»، - دەيدى تەمىرلان.
الداعى ۋاقىتتا قوسىمشا جەتىلدىرىلىپ، بارلىق پلاتفورمالارعا جۇكتەلەدى دەيدى وقۋشىلار.