بايقاۋ ءتورت كەزەڭنەن تۇردى
بەلارۋس استاناسى مينسكىدە تمد-عا مۇشە ەلدەردىڭ جوعارى وقۋ ورىندارى كۋرسانتتارىنىڭ VII حالىقارالىق وليمپياداسى اياسىندا اسكەر تاريحىنىڭ مىقتىلارىنا ارنالعان زياتكەرلىك سايىس اياقتالدى، دەپ حابارلايدى Almaty-akshamy.kz.
اتالعان شارا بەلارۋس رەسپۋبليكاسىنىڭ اسكەري اكادەمياسىندا ءوتتى. تاريح وليمپياداسىنا ەلىمىزدىڭ اتىنان كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىس كۇشتەرى اسكەري ينستيتۋتىنىڭ كومانداسى امانجول ماحاببات، داۋلەت ءابدۋالي، دانييل كراۆچۋك، دوسجان ءامىرحان جانە ءنۇرسات بايمۇرات قاتىستى.
– بايقاۋ ءتورت كەزەڭنەن تۇردى. ءبىرىنشى جانە ەكىنشى كەزەڭدە كۋرسانتتار ۇلى وتان سوعىسىنىڭ تاريحىنان، وقيعالار حرونولوگياسىنان، ستالينگراد تۇبىندەگى شايقاستان جانە باسقا دا بىلىمدەرىن كورسەتتى. ءۇشىنشى تۋر «اسكەري-تاريحي سايىس» تۇرىندە وتسە، ال تورتىنشىسىندە كاپيتانداردىڭ ءبىلىمى سىنالدى. ناتيجەسىندە كۋرسانتتار جالپى كوماندالىق ءۇشىنشى ورىن ەنشىلەدى، – دەدى توپ جەتەكشىسى اعا وقىتۋشى باتىر ساداقوۆ.
جاۋىنگەرلىك تاريحتىڭ بىلگىرلەرىنە ارنايى ەكسكۋرسيالار مەن باسقا دا تاقىرىپتىق شارالار ۇيىمداستىرىلدى. كۋرسانتتار مينسكىنىڭ تاريحي ورىندارىن ارالادى، سونداي-اق «باتىر – برەست قامالى» مەموريالدىق كەشەنىنە دە باردى.