وتىنىمدەردى قاتىسۋشىلار سايتتا ەسق ارقىلى بەردى
الماتى اكىمدىگى جەڭىلدەتىلگەن تۇرعىن ءۇي باعدارلاماسى ادىلەتسىز ءوتتى دەگەن قاتىسۋشىلارعا جاۋاپ بەردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
الماتى اكىمدىگىنىڭ مالىمەتىنشە، 2022 جىلعى 1 ماۋسىمدا اياقتالعان «الماتى جاستارى» قالالىق جەڭىلدىكپەن نەسيەلەندىرۋ باعدارلاماسى اياسىندا وتىنىشتەر مەن قۇجاتتاردى قابىلداۋ قورىتىندىسى بويىنشا 11 199 ءوتىنىش تۇسكەن، 9 526 ءوتىنىم كونكۋرستان وتپەدى. ونىڭ ىشىندە 5042 ۇمىتكەردىڭ ءوتىنىشى قابىلدانعان جوق.
«سەبەبى، قازاقستان رەسپۋبليكاسىندا نەمەسە الماتى وبلىسى، الماتى قالاسىندا بارلىق وتباسى مۇشەلەرىنىڭ تۇرعىن ءۇيىنىڭ بولۋى/بولماۋى تۋرالى انىقتامالار؛ بالالاردىڭ تۋۋ، نەكە نەمەسە اجىراسۋ تۋرالى كۋالىكتەرىن سكانەرلەۋ؛ ەڭبەك كىتاپشاسىنىڭ كوشىرمەسى؛ جۇمىس ورنىنان انىقتاما نەمەسە زەينەتاقى جارنالارى تۋرالى ءۇزىندى كوشىرمەسىن ۇسىنباعان»،- دەپ حابارلادى اكىمدىكتەن.
سونىمەن قاتار، 3 845 ءوتىنىش جۇمىس ورنى باعدارلاما تالاپتارىنا سايكەس كەلمەگەندىكتەن، باسىمدىققا جاتپادى. سونداي-اق، اكىمدىك وتىنىشتەر قالاي قارالعانىن ايتتى. «باسقارما قۇجاتتاردى قابىلداۋ اياقتالعاننان كەيىن بارلىق بەرىلگەن ءوتىنىش پەن قۇجاتتى جۇكتەۋ جۇمىستارىن جۇزەگە اسىرادى، سودان كەيىن بارلىق قۇجاتتىڭ باعدارلاما تالاپتارىنا سايكەستىگى قولمەن تەكسەرىلەدى. تىزىمگە ەنگىزۋ كەزەگى جيناعان بالل سانىمەن، ياعني سانات بويىنشا ەڭ كوپ بالل سانىمەن انىقتالادى. سايتتا ورنالاستىرىلعان، ءبىراق قابىلدانباعان وتىنىشتەر ءتىزىمى دۇرىس ءارى وزەكتى. ورنالاستىرۋ كەزىندە ءتىزىم باسقا سفەرالارعا قوسىلىپ كەتكەن، ءبىراق بۇل ناتيجەگە اسەر ەتپەيدى. باعدارلاماعا قاتىسۋعا وتىنىمدەردى قاتىسۋشىلار سايتتا ەسق ارقىلى بەردى، بارلىق قۇجات جۇكتەلدى، وسىلايشا، باسقارما قىزمەتكەرلەرىنىڭ قۇجاتتاردى جويۋ مۇمكىندىگى بولمادى»، دەپ ءتۇسىندىردى قالالىق اكىمدىكتىڭ باسپا ءسوز قىزمەتى. الماتى قالاسى اكىمدىگى قارالعان وتىنىشتەردىڭ ناتيجەسى نەگىزدەلگەندىكتەن، وتىنىشتەردى قايتا قاراۋ جۇرگىزىلمەيتىنىن اتاپ ءوتتى.