قاراعاندىلىق وقۋشىلار WRO-2022 روبوتوتەحنيكا بويىنشا ۇلتتىق وليمپيادادا ونەرتابىستارىن تانىستىردى
قاراعاندىداعى نازاربايەۆ زياتكەرلىك مەكتەبىندە وتكەن WRO-2022 روبوتوتەحنيكا بويىنشا ۇلتتىق وليمپيادانىڭ ايماقتىق كەزەڭىنە وڭىردەن 27 كوماندا قاتىستى، دەپ حابارلايدى Almaty-akshamy.kz Inform.kz-كە سىلتەمە جاساپ.
كوماندالار ءۇش جاس ساناتىندا ءتورت باعىت بويىنشا جارىستى: RoboMission، Future Innovators، RoboSports جانە Future engineers.
«وليمپيادا «My robot - my friend» تاقىرىبىنا ارنالعان جانە ادامنىڭ كۇندەلىكتى ومىرىندە جاساندى ينتەللەكتتى قولدانۋعا باعىتتالعان»، دەپ اتاپ ءوتتى ۇيىمداستىرۋشىلار.
نۇرا اۋدانىنان كەلگەن «تاسسۋات» كومانداسىنىڭ قاتىسۋشىلارى ءارتوم بيريۋكوۆ پەن دميتريي پوپوۆ مەيىربيكە-روبوت جاساپ، Future Innovators كىشى شىعارماشىلىق ساناتىندا جەڭىسكە جەتتى.
«يدەيا وتكەن جىلدىڭ قىركۇيەك ايىندا، پاندەميا كەزىندە پايدا بولدى. مەيىربيكە-روبوتتى جاساۋ ءۇشىن ەكى جارىم اي قاجەت بولدى. ءبىز ونى مەكتەپتىڭ كىرەبەرىسىنە قويدىق. روبوت ادامنىڭ تەمپەراتۋراسىن بايلانىسسىز ولشەپ، ايتا الادى، قولدى انتيسەپتيكپەن وڭدەي الادى»، - دەدى كوماندا جەتەكشىسى، مەكتەپ ءمۇعالىمى پاۆەل بيريۋكوۆ.
ن. نۇرماقوۆ اتىنداعى مامانداندىرىلعان مەكتەپ-ينتەرناتتىڭ «64 bit» كومانداسى پيلوتسىز اۆتوموبيل مودەلىن جاساپ، جەڭىسكە جەتتى.
«مەنىڭ وقۋشىلارىم ارىنعازى باعداۋلەت پەن ءاليحان سەيىتقالي Future Engineers ساناتىندا ءبىرىنشى ورىن الدى. بالالارعا كەدەرگىلەرى بار مارشرۋتتى ەڭسەرۋى ءتيىس پيلوتسىز اۆتوموبيل مودەلىن جيناۋ مىندەتى قويىلدى»، - دەپ اتاپ ءوتتى كوماندا باسشىسى ايدار سەيىلحانوۆ.
قازىلار القاسى بارلىق ءتورت سانات بويىنشا جەڭىمپازداردى ىرىكتەدى. ۇزدىك كوماندالار سەرتيفيكاتتارمەن ماراپاتتالدى جانە ماۋسىم ايىندا وتەتىن WRO-2022 ۇلتتىق كەزەڭىندە قاراعاندى وبلىسىنىڭ نامىسىن قورعايتىن بولادى.