«التىن بەلگى» توسبەلگىسىن الۋ تالاپتارى ايتارلىقتاي كۇشەيتىلدى
ءبىلىم جانە عىلىم ءمينيسترى وقۋشىلاردىڭ وقۋ جەتىستىكتەرىن باعالاۋ ەرەجەلەرىنە وزگەرىستەر ەنگىزۋ تۋرالى بۇيرىققا قول قويدى. بۇل تۋرالى اسحات ايماعامبەتوۆ الەۋمەتتىك جەلىدەگى پاراقشاسىنا جاريالادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«وسىعان دەيىن حابارلاعانىمىزداي، بۇيرىقتا «التىن بەلگى» توسبەلگىسىن الۋ تالاپتارى ايتارلىقتاي كۇشەيتىلدى»، - دەگەن ۆەدومستۆو باسشىسى مۇنداي شەشىم مۇعالىمدەردىڭ 2021 جىلعى تامىز كەڭەسىندە قابىلدانعانىن ەسكە سالدى.
وسىلايشا، كەلەسى جىلدان باستاپ 9-سىنىپتى اياقتاپ، ارنايى اتتەستات جانە 10-11 سىنىپتاردىڭ بارلىق وقۋ توقسانى بويىنشا «ۇزدىك» دەگەن باعا العان وقۋشىلار «التىن بەلگى» توسبەلگىسىنە ۇمىتكەر بولا الادى.
«سونداي-اق تالاپكەرلەر نزم بازاسىندا ماتەماتيكادان ەمتيحان تاپسىرۋى كەرەك. بۇل شارا اكادەميالىق ادالدىقتى قامتاماسىز ەتۋ ءۇشىن قابىلدانعانىن ءتۇسىنۋ ماڭىزدى. بۇل رەتتە نزم-دە ەمتيحان تاپسىراتىندارعا دا، جالپى ءبىلىم بەرەتىن مەكتەپ بازاسىندا تاپسىراتىندارعا دا تاپسىرمالار بىردەي بولادى. بىلتىر مەكتەپ بىتىرۋشىلەر رەكوردتىق «التىن بەلگى» الدى. كەيبىرەۋلەرى ۇبت ناتيجەسى بويىنشا تومەن بالل الدى. وسىعان بايلانىستى ۇمىتكەرلەردى ۇزدىك بەلگىسىنە وبەكتيۆتى جانە اشىق باعالاۋ ءۇشىن ەمتيحانداردىڭ ءبىرى تاۋەلسىز ءبىلىم بەرۋ ۇيىمىندا وتەدى. بيىل مەكتەپ بىتىرۋشىلەر ەمتيحاندى ءوز مەكتەبىندە تاپسىرادى. سونداي-اق بەلگىدەن باس تارتۋ تۋرالى وتىنىشتەر جارامسىز. تالاپتارعا ساي كەلەتىن ۇمىتكەرلەر بەلگىلەنگەن تارتىپتە قورىتىندى اتتەستاسيادان وتەدى. ايتپاقشى، نورمالار كەلەسى جىلدان باستاپ كۇشىنە ەنگەنىمەن، بيىل ۇبت قورىتىندىسى بويىنشا ۇزدىك بەلگىسىن بەرۋدىڭ وبەكتيۆتىلىگى باعالانادى. وسىعان بايلانىستى مەكتەپ اكىمشىلىگى، ءبىلىم باسقارمالارى مەن بولىمدەرى قورىتىندى ەمتيحاندارىنىڭ اشىقتىعى مەن وبەكتيۆتىلىگىن قامتاماسىز ەتۋى ءتيىس. ءاربىر جاعداي بويىنشا ۇبت ناتيجەلەرىنىڭ قورىتىندىلارىنا تالداۋ جۇرگىزىلەدى»، - دەپ جازدى اسحات قانات ۇلى.
بۇيرىقتىڭ ءماتىنى ق ر ادىلەت مينيسترلىگىندە تىركەلگەننەن كەيىن جاريالانادى.