قوندىرعى ەنەرگيا تاپشىلىعى ماسەلەسىن شەشۋگە كومەكتەسەدى
پەتروپاۆلدىق مەكتەپ وقۋشىلارى ەلەكتر جانە جىلۋ ەنەرگياسىن وندىرەتىن روبوت قۇراستىردى. جاس ونەرتاپقىشتاردىڭ ايتۋىنشا، قوندىرعى ەنەرگيا تاپشىلىعى ماسەلەسىن شەشۋگە كومەكتەسەدى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
پەتروپاۆل قالاسىنداعى نازاربايەۆ زياتكەرلىك مەكتەبىنىڭ وقۋشىلارى روبوتوتەحنيكا بويىنشا NURORDA first Championship جارىسىنا قاتىستى. وقۋشىلار ايماقتىق كوماندالار اراسىندا "Engineering skills" نوميناسياسى بويىنشا ماراپاتقا يە بولدى.
«ءبىز ءوز جوبامىزدى "وبلىسىمىزداعى ەلەكتر ەنەرگياسىنىڭ تاپشىلىعىن شەشۋ» دەپ اتادىق. بۇل تاقىرىپ ءقازىر، اسىرەسە، جەرگىلىكتى جەو-داعى پروبلەمالارعا بايلانىستى وزەكتى. ءبىز ءوز جوبامىزعا ساي روبوت جاسادىق. ءبىزدىڭ ستانسيا قۇمدى باتارەيالاردىڭ ارقاسىندا جەل ەنەرگياسىن جىلۋ ەنەرگياسىنا اينالدىرادى. وسىلايشا، تۇرعىندار جىلۋمەن قامتاماسىز ەتىلەدى»، - دەيدى «ArtaRobotics» كومانداسىنىڭ جەتەكشىسى تايماس ەدريسوۆ.
First LEGO League Challenge ەلوردالىق NURORDA مەكتەبى ۇيىمداستىرعان. روبوتوتەحنيكا بويىنشا حالىقارالىق چەمپيونات وقۋشىلاردىڭ زياتكەرلىك-شىعارماشىلىق جانە ينجەنەرلىك-تەحنيكالىق الەۋەتىن اشادى، سيفرلىق تەحنولوگيالاردى قولدانۋ ارقىلى قويىلعان ماقساتتار مەن مىندەتتەردى شەشۋدە كرەاتيۆتى ويلاۋدى قالىپتاستىرادى. ق ر اۋماعىندا FIRST باعدارلاماسى 2017 جىلى باستاۋ العان بولاتىن.
«وندا 10-16 جاس ارالىعىنداعى ستۋدەنتتەر زەرتتەۋ، پروبلەمالاردى شەشۋ، كودتاۋ جانە ديزاينمەن اينالىسادى. وسىلايشا، ولار روبوت ويىنىندا بەلگىلى ءبىر ميسسيانى ورىندايتىن روبوت جاساپ، ونىڭ باعدارلامالاماسىن ازىرلەيدى، سونداي-اق ناقتى ماسەلەنى انىقتاۋ جانە شەشۋ ءۇشىن يننوۆاسيالىق جوباعا قاتىسادى. Challenge باعدارلاماسىنىڭ ماقساتى — وقۋشىلارعا ينكليۋزيۆتى، ءادىل جانە ءقاۋىپسىز قوعامدى دامىتۋ ءۇشىن نەعۇرلىم تۇراقتى تەحنولوگيالاردى قۇرۋدا پراكتيكالىق ءبىلىم مەن تاجىريبەنى قولدانۋعا ۇيرەتۋ. روبوتتاردى جوبالاۋ جانە باعدارلامالاۋ سالاسىنداعى دارىندى وقۋشىلاردى بىرىكتىرەتىن چەمپيوناتتا ءبىزدىڭ وقۋشىلارىمىزعا قاراعاندى، ۇلىتاۋ، اقمولا، قوستاناي، پاۆلودار وبلىستارىنىڭ مىقتى كوماندالارى مەن ەلوردالىق كونسترۋكتورلار باسەكەلەس بولدى. پەتروپاۆلدىق نازاربايەۆ زياتكەرلىك مەكتەبىنىڭ روبوت قۇراستىرۋشىلارى بۇل سايىستا «Engineering skills» نوميناسياسىنا يە بولدى»، - دەيدى زياتكەرلىك مەكتەپتىڭ باسپا ءسوز حاتشىسى گۇلميرا شوقتىبايەۆا.
وقۋشىلار ماراپاتتان باسقا، قۇندى تاجىريبە مەن جارقىن اسەر الىپ، جاڭا دوستار مەن پىكىرلەس جاندار تاپقانىن اتاپ ءوتتى.