جيناقپەن الماتى قالاسىنىڭ بارلىق قازاق جانە ارالاس مەكتەپتەرى قامتاماسىز ەتىلگەن
2023 جىلدىڭ 27 قاڭتارىندا اباي ۋنيۆەرسيتەتىندە «ۇرپاق تاربيەسىندەگى قۇندىلىقتار نەگىزى» جيناعىنىڭ تۇساۋكەسەرى ءوتتى، دەپ حابارلايدى Almaty-akshamy.kz.
ءىس-شاراعا ق ر پارلامەنتى ءماجىلىسىنىڭ دەپۋتاتى جۇلدىز سۇلەيمەنوۆا، اباي ۋنيۆەرسيتەتىنىڭ رەكتورى دارحان ءبىلالوۆ، اكادەميك، قازاقستان پەداگوگيكالىق عىلىمدار اكادەمياسىنىڭ پرەزيدەنتى اسقاربەك قۇسايىنوۆ، قازاقستاننىڭ تۇڭعىش ەڭبەك ەرى، قايراتكەر ۇستاز، قازاقستان پعا اكادەميگى اياگۇل ميرازوۆا، الماتى قالاسى №81 مەكتەپ-گيمنازيا ديرەكتورى نۇرعالي تۋرۋمبەتوۆ، الماتى قالاسى ءبىلىم باسقارماسى مەن پەداگوگيكالىق باعىتتاعى جوعارى وقۋ ورىندارى مەن ورتا ءبىلىم بەرۋ مەكەمەلەرىنىڭ وكىلدەرى قاتىستى.
تۇساۋكەسەردى اباي اتىنداعى قازۇپۋ رەكتورى دارحان ءبىلالوۆ اشىپ، اتالعان جيناقتىڭ ەلىمىزدىڭ وسكەلەڭ ۇرپاعىنا ءبىلىم مەن تاربيە بەرۋدەگى ماڭىزدىلىعىنا قىسقاشا توقتالدى. بۇل ماسەلە كەز كەلگەن قوعام ءۇشىن اسا وزەكتى ەكەندىگى اتاپ ءوتىلدى.
ۇرپاق تاربيەسىن جەتىلدىرۋ ماقساتىندا پەداگوگيكالىق عىلىمدار اكادەمياسى اباي ۋنيۆەرسيتەتى جانە الماتى قالاسى ءبىلىم باسقارماسىمەن بىرلەسە وتىرىپ، مەكتەپ وقۋشىلارىنا تاربيە بەرۋ جۇمىستارىن جەتىلدىرۋ جوباسىن جاسادى. بۇل جوبا ق ر وقۋ-اعارتۋ مينيسترلىگىنىڭ ورتا ءبىلىم بەرۋ كوميتەتىنىڭ قولداۋىنا يە بولىپ، جاستار تاربيەسىنىڭ 6 وزەكتى باعىتى انىقتالىپ، ولار بويىنشا ءتيىمدى جۇمىس جاساۋ ءۇشىن 14 ادىستەمەلىك نۇسقاۋلىق ازىرلەندى. بارلىق نۇسقاۋلىقتار توپتاستىرىلىپ، «ۇرپاق تاربيەسىنىڭ قۇندىلىقتار نەگىزى» تاقىرىبىندا 3 بولىمنەن تۇراتىن جيناق دايىندالدى.
وسى جوبانىڭ عىلىمي جەتەكشىسى اكادەميك اسقاربەك قۇسايىنوۆ، اياگۇل ميرازوۆا، جۇلدىز سۇلەيمەنوۆا، №2 گۋمانيتارلىق-پەداگوگيكالىق كوللەدج جانە №81 مەكتەپ-گيمنازيا باسشىلارى ءسوز سويلەدى. ولار 1-سىنىپتان باستاپ 11-سىنىپقا دەيىن وقۋشىلارعا، ساباقتان تىس ۋاقىتتا، تاربيە جۇمىستارىن جۇرگىزۋدىڭ ءبىرتۇتاس عىلىمي-پراكتيكالىق نەگىزى جاسالعانىن جانە ى.التىنسارين اتىنداعى ۇلتتىق ءبىلىم اكادەمياسى بۇل جيناقتى ورتا ءبىلىم بەرۋ ۇيىمدارىنىڭ پەداگوگتەرى تاربيە جۇمىستارىندا قوسىمشا ادىستەمەلىك نۇسقاۋلىق رەتىندە قولدانۋىنا ۇسىنىلعانىن ايتتى. جيناقپەن الماتى قالاسىنىڭ بارلىق قازاق جانە ارالاس مەكتەپتەرى قامتاماسىز ەتىلگەن.
