الماتىدا ادام ساۋداسىمەن كۇرەس تاسىلدەرى پىسىقتالدى

اۋەجاي جۇمىسشىلارى كومەككە ءزارۋ ازاماتتاردى قاس-قاباعىنا قاراپ-اق اجىراتا بىلگەنى ابزال.

الماتى حالىقارالىق اۋەجايىنىڭ قىزمەتكەرلەرى ادام ساۋداسىنىڭ ىقتيمال قۇرباندارىن انىقتاۋ جونىندە ترەنينگتەن ءوتتى، دەپ حابارلايدى «حابار 24». 

سەميناردى وتكىزگەن اقش-تىڭ حالىقارالىق دامۋ اگەنتتىگىنىڭ «ورتالىق ازياداعى ءقاۋىپسىز كوشى-قون» جوباسى وكىلدەرىنىڭ ايتۋىنشا، الەمدە جىلىنا 50 ملن كىسى ادام ساۋداسىنىڭ قۇربانى بولادى ەكەن. قازاقستان ترانزيتتىك مەملەكەت بولعاندىقتان، وسىنداي زاڭسىزدىق ورىن الۋى ابدەن مۇمكىن. سوندىقتان اۋەجاي جۇمىسشىلارى كومەككە ءزارۋ ازاماتتاردى قاس-قاباعىنا قاراپ-اق اجىراتا بىلگەنى ابزال. الماتى اۋەجايىندا جولاۋشىلار تاسىمالى جىل ساناپ ارتىپ كەلەدى. ناقتىراق ايتساق، 2021 جىلى 6،1 ملن ادامعا، ال بىلتىر 7،2 ملن جولاۋشىعا قىزمەت كورسەتكەن. مامان پىكىرىنشە، بۇل پروبلەمانىڭ الدىن الۋ ءۇشىن ەلىمىزدە قۇزىرلى ورگانداردى ءبىر ارناعا توعىستىراتىن «ادام ساۋداسىنا قارسى كۇرەس تۋرالى» العاشقى زاڭ جوباسى ازىرلەنۋدە. 

«مەن وسى اۋەجايدا 20 جىلدان اسا قىزمەت ەتىپ كەلەمىن. ءتورت كۇندىك سەميناردا ءبىز جولاۋشىلاردى بەت-بەينەسىنە، ءوزىن-وزى ۇستاۋىنا قاراپ ءقاۋىپتى انىقتاۋدى ۇيرەندىك. سونىمەن قاتار بىزگە كۇدىكتى جولاۋشىلارمەن دۇرىس بايلانىس ورناتۋدى دا كورسەتتى. مۇنداي سەمينارعا ءبىرىنشى رەت قاتىسىپ وتىرمىن»، - دەيدى اۋەجاي قىزمەتكەرى تاتيانا زاحارچەنكو.