الماتى جولاۋشىلار كولىگى جانە تەحنولوگيالار كوللەدجىنىڭ «جاس سارباز» اسكەري-پاتريوتتىق قوزعالىسى بولىمشەسىندە اسكەرگە شاقىرۋعا دەيىنگى جاستارعا ارنالعان جاسوسپىرىمدەرگە ۇشقىشسىز تەحنولوگيالار مەن روبوتوتەحنيكا الەمىن يگەرۋگە مۇمكىندىك بەرەتىن بىرەگەي وقۋ كۋرسى اشىلدى.
باعدارلامانىڭ نەگىزگى ماقساتى – وقۋشى جاستاردى درونداردى باسقارۋ ونەرىن زەرتتەۋگە جانە روبوتوتەحنيكا ساباقتارىنا تارتۋ. وقۋ بارىسىندا وقۋشىلار مەن ستۋدەنتتەر تەحنيكالىق داعدىلاردى يگەرىپ قانا قويماي، سونىمەن قاتار ينجەنەر-كونسترۋكتور، ينجەنەر-تەحنولوگ، جوبالاۋشى، باعدارلاماشى جانە اسكەري سالاداعى ۇۇا وپەراتورى ماماندىقتارى تۋرالى تۇسىنىك الادى، دەپ حابارلايدى Almaty-akshamy.kz ق ر قورعانىس مينيسترلىگىنە سىلتەمە جاساپ.
بۇگىنگى تاڭدا باعدارلاما اياسىندا توعىز FPV-درون وپەراتورى دايىندالدى. ولار acro رەجيمىندە كۆادروكوپتەردى سەنىمدى باسقارىپ، نىساندارعا ءوز بەتىنشە بارلاۋ جاساي بىلەدى. سونىمەن بىرگە «سەگىزدىك»، «جىلان»، «بوشكە» جانە باسقا فيگۋرالاردى ورىنداي الادى.
وقۋشىلار اەروديناميكا، ۇشقىشسىز ۇشۋ اپپاراتى تەورياسى جانە كارتوگرافيانى يگەرگەن. سونىمەن قاتار، ولار سپورتتىق زىمىران كورپۋستارىن جاساۋ بويىنشا وقۋدان ءوتتى جانە زىمىراندىق مودەلدىك سپورت جارىستارىنا قاتىسۋعا دايىن.
«قازىرگى ۋاقىتتا S4، S8 جانە S6 زىمىران سىنىپتارىندا زىمىراندىق مودەلدىك سپورت جارىستارىنا قاتىسۋ ءۇشىن ءۇش ادامنان تۇراتىن ەكى كوماندا دايىندالدى. ولاردىڭ بارلىعى قاۋىپسىزدىك تەحنيكاسى بويىنشا كىرىسپە، تەوريالىق جانە ۇشۋ الدىنداعى نۇسقاۋلىقتان ءوتتى. وسى جازدا وزبەكستان مەن قىرعىزستاندا وتەتىن جارىستارعا قاتىسۋدى جوسپارلاپ وتىرمىز»، – دەپ اتاپ ءوتتى زىمىران سپورتى مەن درونداردى دامىتۋ جوباسىنىڭ جەتەكشىسى FPVschool.kz ۆلاديسلاۆ بارىشيەۆ.
بۇل ءبىلىم بەرۋ باعدارلاماسى وقۋشىلاردىڭ ءبىلىم كوكجيەگىن كەڭەيتىپ قانا قويماي، ولاردى اۆياسيا، زىمىران جانە روبوتوتەحنيكا سالاسىندا ودان ءارى وقىتۋ مەن كاسىبي دامۋعا جەتەلەرى ءسوزسىز.