«مەنىڭ باۋىرىم» جوباسى اياسىندا ەرىكتىلەر الماتى، استانا، قاراعاندى، قىزىلوردا، الماتى جانە جەتىسۋ وبلىستارىنىڭ 400-دەن استام مەكتەبىندە بەلسەندى جۇمىس جۇرگىزۋدە.
بۇل باستاما ازاماتتىق قوعامنىڭ بەلسەندىلىگىن ارتتىرۋدا ماڭىزدى ءرول اتقارادى، ول بويىنشا ءاربىر ادام قازاقستاندىق بالالاردىڭ سالاماتتىعىن ساقتاۋعا جانە قولداۋعا ءوز ۇلەسىن قوسا الادى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
«مەكتەپتەردە جۇمىس ىستەيتىن ەرىكتىلەر مۇعالىمدەر مەن وقۋشىلارعا كومەك قولىن سوزا وتىرىپ، ءبىلىم بەرۋ پروسەسىندە ءتۇرلى جوبالار مەن باستامالاردى ىسكە اسىرۋدا. ولار يننوۆاسيالىق ءبىلىم بەرۋ باعدارلامالارىن قۇرۋعا، قوسىمشا ساباقتار مەن ءىس-شارالار وتكىزۋگە ۇلەس قوسۋدا، بۇل ءوز كەزەگىندە وقىتۋ-تاربيە بەرۋ ورتاسىن دامىتۋعا، بالالار ءۇشىن مۇمكىندىكتەر اياسىن كەڭەيتۋگە جانە ءبىلىم ساپاسىن ارتتىرۋعا ىقپال ەتەدى»، - دەپ اتاپ ءوتتى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قازىرگى ۋاقىتتا جوباعا ەلىمىزدىڭ 36 جوعارى وقۋ ورىندارى مەن كوللەدجدەرىنەن 4 مىڭعا جۋىق ستۋدەنت قاتىسۋدا، بۇل جاستاردىڭ قولايلى ءبىلىم بەرۋ ورتاسىن قۇرۋعا قولداۋ كورسەتۋگە مۇددەلىلىگىن كورسەتەدى. ايتا كەتەيىك، جوبانى ىسكە اسىرۋعا قىزىلوردا وبلىسى دا قوسىلدى. ءوڭىر پەداگوگتەرى مەن ستۋدەنتتەرى ءۇشىن سىرداريا، جالاعاش، قارماقشى، شيەلى، جاڭاقورعان اۋداندارىنىڭ ورتالىقتارىندا ادىستەمەلىك سەمينارلار ۇيىمداستىرىلدى.