تۇنگى ساعات 00:00 شاماسىندا “102” پۋلتىنە حاليۋللينا مەن تالعار تراكتىنىڭ قيىلىسىندا ورىن العان جكو تۋرالى حابارلاما كەلىپ تۇسكەن.
قوڭىراۋ شالۋشىنىڭ ايتۋىنشا، Lada اۆتوكولىگىنىڭ جۇرگىزۋشىسى تۇراقتا تۇرعان كولىكتى سوعىپ، وقيعا ورنىنان قاشىپ كەتپەك بولعان، دەپ حابارلايدى Almaty-akshamy.kz.
«پاترۋل كولىگىن كورگەن Lada جۇرگىزۋشىسى ارتقا شەگىنۋگە اسىققان. ءبىراز قۋعىننان كەيىن بۇل كولىك توقتاتىلدى. رولدە اياعىندا ارەڭ تۇرعان 22 جاستاعى جىگىت بولدى. مەديسينالىق ساراپتاما ونىڭ ماس بولعانىن انىقتادى. سونىمەن قاتار جۇرگىزۋشى جاساعان ءبىرقاتار قۇقىق بۇزۋشىلىقتار انىقتالدى: كولىك قۇرالىن الكوگولدىك ماساڭ كۇيدە بولا تۇرا باسقارۋ (ق ر اقبتك-نىڭ 608-بابى)، جول-كولىك وقيعاسى بولعان جەردەن كەتىپ قالۋ (ق ر اقبتك-نىڭ 611-بابى)، جالعان مەملەكەتتىك ءنومىردى پايدالانۋ (ق ر اقبتك-نىڭ 613-بابى)، قارسى جولاققا شىعۋ (ق ر اقبتك-نىڭ 596-بابى)، اپاتتىق جاعداي تۋعىزۋ (ق ر اقبتك-نىڭ 606-بابى)، باعدارشامنىڭ قىزىل تۇسىندە قيىلىستان ءوتۋ (ق ر اقبتك-نىڭ 599-بابى)، بەلگىلەردىڭ تالاپتارىن بۇزۋ (ق ر اقبتك-نىڭ 601-بابى) ، قاۋىپسىزدىك بەلدىگىن تاقپاۋ (ق ر اقبتك-نىڭ 593-بابى)، اۆتوكولىكتىڭ تەحنيكالىق جاعدايىن بۇزۋ (ق ر اقبتك-نىڭ 590-بابى). كولىك قۇرالىن ماس كۇيدە باسقارۋ دەرەگى بويىنشا ءوندىرىس ماتەريالدارى شەشىم قابىلداۋ ءۇشىن سوتقا جولداندى. كولىك مامانداندىرىلعان ايىپپۇل تۇراعىنا قويىلدى»، — دەدى مەدەۋ اۋداندىق پوليسيا باسقارماسىنىڭ باستىعى ءىلياس ومىرسەرىكوۆ.