ءال-فارابي اتىنداعى قازۇۋ جاڭا وقۋ جىلىندا زاماناۋي ۇلگىدە كۇردەلى جوندەۋدەن وتكەن وقۋ عيماراتتارى مەن جاتاقحانالاردى پايدالانۋعا بەرمەك. ءبىلىم ورداسىنىڭ باسشىسى جانسەيىت قانسەيىت ۇلى تۇيمەبايەۆ قۇرىلىس بارىسىمەن تانىسىپ، ءالى دە قالپىنا كەلتىرۋ جۇمىسى اياقتالماعان نىسانداردى جوسپارعا سايكەس اياقتاۋعا تاپسىرما بەردى.
قازىرگى ساتتە ۋنيۆەرسيتەت اۋماعىندا ورنالاسقان 14 جاتاقحانا ستۋدەنتتەردىڭ قونىستانۋىنا ازىرلەنىپ، 25 تامىزدا ستۋدەنتتەر يگىلىگىنە بەرىلەدى. ونىڭ ىشىندە №6 ستۋدەنتتەر ۇيىندەگى جوندەۋ جۇمىستارى بىتۋگە جاقىن، №4 جانە №7 جاتاقحانالارداعى كۇردەلى جوندەۋ جۇمىسى قىركۇيەكتىڭ سوڭىنا دەيىن جالعاسادى. وزگە جاتاقحانالار 25 تامىزدا كەلگەن ستۋدەنتتەردى قابىلداۋعا ساقاداي ساي.
بۇعان قوسىمشا ءۇش وقۋ عيماراتىندا كۇردەلى جوندەۋ جۇمىستارى جۇرگىزىلىپ جاتىر. بۇل عيماراتتاردىڭ ەسىك-تەرەزەلەرى جانە ەدەنى تولىعىمەن اۋىستىرىلعان. بۇرىن لينولەۋم بولسا، ءقازىر ساپالى جاڭا لاميناتتار توسەلىپ، اۋديتوريالار جاڭا ۇلگىدەگى زاماناۋي ديزاينمەن ارلەنىپ، بەزەندىرىلۋدە.
ەكىنشى جانە ءۇشىنشى وقۋ عيماراتتارى 1 قىركۇيەكتە وقۋ جىلىن باستاۋعا ءازىر. ال ءبىرىنشى وقۋ عيماراتىنداعى جۇمىستار ايدىڭ اياعىنا دەيىن سوزىلادى.
ايتا كەتەرلىك جايت، جوندەۋ بارىسىندا تەك ساپالى قۇرىلىس ماتەريالدارى قولدانىلۋدا. رەكتور تاپسىرماسىمەن جاڭا وقۋ جىلىندا ستۋدەنتتەردى قابىلداۋعا دايىن بولۋ ءۇشىن جۇمىسشىلار سانى ارتتىرىلدى.
ودان بولەك، ءبىرىنشى، ەكىنشى، ءۇشىنشى وقۋ عيماراتى مەن رەكتوراتتىڭ سىرتى دا كۇردەلى جوندەۋدەن وتپەك. بۇل ماقساتتا سۇيىق تراۆەرتين دەپ اتالاتىن جاڭا تەحنولوگيا قولدانىلادى. بۇل جۇمىستار ەكى اي مەرزىمدە اياقتالماق. بولاشاقتا ستۋدەنتتەر سارايىن دا وسى سەكىلدى جوندەۋدەن وتكىزۋ جوسپارلانۋدا. سالىنعالى عيماراتتاردىڭ ىشكى-سىرتقى بولىگىنە مۇنداي كۇردەلى جوندەۋ جۇمىستارى جۇرگىزىلمەگەندىكتەن، كوپتەگەن ماتەريالداردىڭ توزىعى جەتكەن. الداعى ۋاقىتتا بۇل ولقىلىقتاردىڭ ورنىن تولتىرۋ جوسپاردا بار.
ماسانشى كوشەسىندە ورنالاسقان ءتورتىنشى وقۋ عيماراتىنا دا كوسمەتيكالىق جوندەۋ جۇمىستارى جاسالدى. ءقازىر ستۋدەنتتەردى قابىلداۋعا تولىعىمەن دايىن. مۇندا فيلوسوفيا جانە پوليتولوگيا فاكۋلتەتى، كوللەدج جانە وقۋ ورداسىنىڭ ليسەيى ورنالاسقان. ۋنيۆەرسيتەت اۋماعىندا ورنالاسقان جاس عالىمدار ءۇيىنىڭ دە سىرتقى بولىگى جوندەۋ جۇمىستارىن قاجەت ەتەدى. ساين كوشەسىنىڭ بويىنداعى بىلىكتىلىكتى ارتتىرۋ ينستيتۋتىنىڭ جاتاقحاناسىنداعى جۇمىستار دا ءقازىر اياقتالىپ، وقۋ جىلىن باستاۋعا ءازىر تۇر.
كەيبىر جاتاقحانالارعا 15–20 جىلدىڭ كولەمىندە كۇردەلى جوندەۋ جۇمىستارى جۇرگىزىلمەگەندىكتەن، ەدەندەگى لينولەۋمداردىڭ توزىعى جەتىپ، سانتەحنيكالاردىڭ كوپشىلىگى ىستەن شىققان. سول سەبەپتى، الداعى ەكى جىلدا بارلىق جاتاقحاناعا كۇردەلى جوندەۋ جۇمىستارى جۇرگىزىلەدى. تەك قانا قابىرعاسىن قالدىرىپ، ەسىك-تەرەزە، قۇبىر جۇيەلەرى، ءتىپتى شاتىرىنا دەيىن اۋىستىرىلادى.
باسقارما ءتوراعاسى – رەكتور جانسەيىت قانسەيىت ۇلى عيماراتتاردىڭ ءارقايسىسىن ءجىتى ارالاپ شىعىپ، ءاربىر جاتاقحانانىڭ جەرتولەسىندە، اينالاسىندا حيميالىق تازالاۋ، اياقكيىم جوندەۋ سەكىلدى ستۋدەنتتەردىڭ قاجەتتىلىگىنە جارايتىن ورىندار اشىپ، سپورتتىق ترەناجەر ورناتۋ تۋرالى ناقتى تاپسىرمالار بەردى.