بيىل ەلىمىزدە 260 مەكتەپتە كۇردەلى جوندەۋ جۇمىستارى جۇرگىزىلۋدە.
وقۋ جىلىنىڭ باسىنان بەرى 153 مىڭ قازاقستاندىق وقۋشى جوندەۋدەن وتكەن 207 مەكتەپتە ءبىلىم الا باستادى، دەپ حابارلايدى Almaty-akshamy.kz.
ق ر وقۋ-اعارتۋ مينيسترلىگىنىڭ مالىمەتىنشە، بۇل مەكتەپتەردە شاتىرلار اۋىستىرىلدى، عيماراتتاردىڭ قاسبەتتەرى، تەرەزەلەرى جاڭارتىلدى، ىشكى ينجەنەرلىك جەلىلەرى (سۋ قۇبىرى، كارىز، جىلۋ، ەلەكتر جەلىلەرى)، دارەتحانا بولمەلەرى جوندەلدى. سەيسميكالىق قۇبىلىستارى جوعارى ايماقتاردا سەيسميكالىق كۇشەيتۋ جۇمىستارى جانە ت.ب. جۇرگىزىلدى.
ايتا كەتەيىك، جوندەۋدەن وتكەن عيماراتتاردىڭ ىشىندە سالىنعانىنا 50 جىلدان اسقان مەكتەپتەر دە بار. ولاردىڭ كوبى الماتى وبلىسىندا ورنالاسقان.
ەسكە سالايىق، بۇعان دەيىن مينيسترلىك وقۋ-تاربيە پروسەسىنىڭ بۇزىلۋىنا جول بەرمەۋ جانە ونى ءقاۋىپسىز ۇيىمداستىرۋ ماقساتىندا جوندەۋ جۇمىستارى جۇرگىزىلىپ جاتقان مەكتەپتەرگە بىرنەشە رەت باقىلاۋ جۇرگىزدى. بۇگىندە جوندەۋ جۇمىستارىنان بولەك قازاقستانداعى شاعىن قالالار مەن اۋىلدارداعى 1000 مەكتەپ جاڭارتىلۋدا. اتاپ ايتساق، كۇردەلى جوندەۋ جۇمىستارى، پاندىك كابينەتتەرمەن جابدىقتاۋ، مەكتەپ جيھازدارىن جاڭارتۋ، كىتاپحانالاردى، اسحانالار مەن قاۋىپسىزدىك جاعدايلارىن جاقسارتۋ اتقارىلۋدا. بۇگىنگى تاڭدا 941 اۋىل مەكتەبىندە جاڭعىرتۋ جۇمىستارى اياقتالدى. وعان قوسا، بيىل 1000 زاماناۋي پاندىك كابينەتتەرىن (روبوتوتەحنيكا، حيميا، بيولوگيا نەمەسە فيزيكا) اشۋ جوسپارلانۋدا. 974 مەكتەپتە زاماناۋي كابينەتتەر ورناتىلدى