بۇل كۇندەرى ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا دزيۋدودان ەرلەر مەن ايەلدەر اراسىندا قازاقستان چەمپيوناتى ءوتىپ جاتىر.
جارىستىڭ ەكىنشى كۇنىندە ەرلەر – 73، 81، ايەلدەر – 57، 63 جانە 70 كگ سالماق دارەجەسىندە ءوزارا مىقتىنى انىقتادى، دەپ حابارلايدى اlmaty-akshamy.kz.
بىرىنشىلىكتىڭ ەكىنشى كۇنىندەگى ەرلەر باسەكەسىندە ماڭعىستاۋ وبلىسىنىڭ قوس سپورتشىسى – اسقار نارقۇلوۆ (73 كگ) پەن مەيىرلان ماكسيم (81 كگ) جەڭىس تۇعىرىنا كوتەرىلسە، ايەلدەر اراسىندا اقتوبە وبلىسىنىڭ وكىلى باقىت قۇساقبايەۆا (57 كگ)، اتىراۋ وبلىسىنىڭ سپورتشىسى ەسميگۋل كۋيۋلوۆا (63 كگ) جانە الماتى وبلىسىنىڭ بالۋانى ەكاتەرينا توكاريەۆا (70 كگ) ءوز سالماق دارەجەلەرىندە جەڭىمپاز اتاندى. جارىستىڭ ماراپاتتاۋ راسىمىنە تۋريزم جانە سپورت ءمينيسترى ەرمەك مارجىقپايەۆ قاتىسىپ، سپورتشىلارعا ساتتىلىك تىلەدى.
«دزيۋدودان قازاقستان چەمپيوناتىنا ەلىمىزدىڭ بارلىق وڭىرىنەن كەلگەن 463 سپورتشى قاتىسىپ جاتىر. پرەزيدەنتىمىز قاسىم-جومارت كەمەل ۇلىنىڭ «وتاندىق سپورتتا ءادىل باسەكەلەستىك قاعيداتىن ورناتۋ كەرەك» دەگەن تاپسىرماسىنا سايكەس، بيىلعى چەمپيوناتقا شەتەلدەن ارنايى 3 تاۋەلسىز تورەشى شاقىرتىلدى. چەمپيونات قورىتىندىسى بويىنشا دزيۋدودان 2024 جىلعى ۇلتتىق قۇراما جاساقتالادى. بارلىق سپورتشىعا سايىستا ءساتتى ونەر كورسەتۋىنە شىن جۇرەكتەن تىلەكتەسپىن! بايراقتى باسەكەدە ەڭ مىقتىلار جەڭىسكە جەتەدى دەپ سەنەمىن»، - دەدى ەرمەك مارجىقپايەۆ.
ايتا كەتۋ كەرەك، جارىس 15 قاراشاعا دەيىن جالعاسادى.