قازاقستان رەسپۋبليكاسى پرەزيدەنتىنىڭ جارلىعىمەن استانا قالاسىنان، اقمولا جانە اتىراۋ وبلىستارىنان ءبىرقاتار مۇعالىمدەر ماراپاتتالدى.
ولاردىڭ حالىقتار اراسىندا بەيبiتشiلiكتi، دوستىق پەن ىنتىماقتاستىقتى نىعايتۋعا، مەملەكەتتىك ءتىلدى دامىتۋعا سiڭiرگەن ەڭبەكتەرى زور، دەپ حابارلايدى Almaty-akshamy.kz وقۋ-اعارتۋ مينيسترلىگىنىڭ رەسمي سايتىنا سۇيەنىپ.
وقۋ-اعارتۋ ءمينيسترى عاني بەيسەمبايەۆ ەڭبەگى جوعارى باعالانعان پەداگوگتەرمەن كەزدەستى.
مينيستر ۇستازدارعا بولاشاق ۇرپاقتى تاربيەلەۋدەگى ۇلەستەرى ءۇشىن العىس ايتىپ، پەداگوگتەردى قولداۋ جانە ولاردىڭ كاسىبي مارتەبەسىن كوتەرۋ - ءبىلىم بەرۋ سالاسىنداعى ماڭىزدى باسىمدىقتاردىڭ ءبىرى بولىپ تابىلاتىنىن اتاپ ءوتتى.
«ءبىزدىڭ ورتاق مىندەتىمىز - ساپالى ءبىلىم مەن تاربيە بەرۋ، وسكەلەڭ ۇرپاق ءۇشىن ەڭ جاقسى ۇلگىلەردى قالىپتاستىرۋ، ءبىلىم مەن مۇمكىندىكتەر بەرەتىن قوعام قۇرۋ. سىزدەردىڭ كاسىبيلىكتەرىڭىز، بالالاردى وقىتۋ مەن تاربيەلەۋدەگى ادالدىقتارىڭىز ءۇشىن شىن جۇرەكتەن ريزاشىلىعىمدى بىلدىرەمىن. سىزدەر ەلىمىزدىڭ بارلىق مۇعالىمدەرىنىڭ جارقىن بەينەسىسىزدەر، سىزدەردىڭ ماماندىققا ادالدىقتارىڭىز ءبىزدى جاڭا جەتىستىكتەرگە شابىتتاندىرادى»، - دەپ اتاپ ءوتتى مينيستر.
پەداگوگتەر ءوز كەزەگىندە مەملەكەتتىڭ پەداگوگ قىزمەتىن جوعارى باعالاعانىنا زور ريزاشىلىقتارىن ءبىلدىرىپ، كاسىبي وسۋگە، وقىتۋ ادىستەرىن جەتىلدىرۋگە قاتىستى ءوز ويلارىمەن ءبولىستى.
«بالالاردى وقىتۋ ارقىلى ءبىز تەك ءبىلىم بەرىپ قانا قويماي، جەكە تۇلعا رەتىندە قالىپتاستىرامىز، وقۋشىلارىمىزعا جوعارى ماقسات قويۋ جانە وعان جەتۋ داعدىسىن سىڭىرەمىز جانە ولارعا تابىسقا جەتۋدىڭ جولىن ۇيرەتەمىز. مەنىڭ جۇمىسىم - بۇل ماماندىق قانا ەمەس، بۇل مەنىڭ ەلىمنىڭ بولاشاعى الدىنداعى ميسسيام جانە جاۋاپكەرشىلىگىم»، - دەدى اقمولا وبلىسى ارايلى اۋىلىنان كەلگەن ورتا مەكتەپ ءمۇعالىمى اناستاسيا يرۋبايەۆا.
مەملەكەت باسشىسى مەملەكەتتىك ءتىلدى دامىتۋعا جانە دوستىقتى نىعايتۋعا سىڭىرگەن ەڭبەگى ءۇشىن مەملەكەتتىك ناگرادالار تابىستاعان پەداگوگتەردىڭ ىشىندە استانا قالاسى قايىربەكوۆ اتىنداعى №2 مەكتەپتىڭ ءمۇعالىمى ەليزاۆەتا الەكساندروۆنا شنايدەر ءىى دارەجەلى «دوستىق» وردەنىمەن، اقمولا وبلىسى ارايلى اۋىلىنداعى ورتا مەكتەپ ءمۇعالىمى اناستاسيا يرۋبايەۆا «شاپاعات»مەدالىمەن، اتىراۋ قالاسىنداعى №3 مەكتەپ — گيمنازياسىنىڭ ءمۇعالىمى تاتيانا نەستەروۆنا ليۋبينا «ەرەن ەڭبەگى ءۇشىن» مەدالىمەن ماراپاتتالدى.