ەلوردادا NIS پەداگوگيكالىق شەبەرلىك ورتالىعىنىڭ ۇيىمداستىرۋىمەن «جاس ۇستاز: تابىسقا اپارار جول» رەسپۋبليكالىق فورۋمى ءوتتى.
كەزدەسۋدە ەلىمىزدىڭ شالعاي ەلدى مەكەندەرىنەن كەلگەن 300-دەن استام جاس پەداگوگ باس قوستى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
بەيرەسمي فورماتتا وتكەن جيىندا پەداگوگتەر مينيسترگە وزدەرىنىڭ سۇراقتارىن قويىپ، ءبىلىم سالاسىنداعى ماڭىزدى ماسەلەلەر بويىنشا پىكىر الماستى. عاني بەيسەمبايەۆ وسكەلەڭ ۇرپاقتىڭ بولاشاعىن قالاۋعا ۇلەس قوساتىن پەداگوگ ماماندىعىنىڭ ماڭىزدىلىعىن اتاپ ءوتتى.
«پەداگوگ ماماندىعى – بۇل قىزمەت قانا ەمەس، ەلىمىزدىڭ بولاشاعىن قالىپتاستىرۋ جولىنداعى ابىرويلى مىندەت. ءبىز بالالارىمىزدىڭ وقۋى مەن دامۋى ءۇشىن ەڭ جاقسى جاعدايدى قامتاماسىز ەتۋىمىز كەرەك»، – دەدى مينيستر.
سونداي-اق مينيستر ۇستازدىق ەتۋدىڭ ماڭىزدى باسىمدىقتارىن، ونىڭ ىشىندە بالالارمەن جۇمىس جاساۋ، پسيحولوگيالىق ەرەكشەلىكتەردى تانۋ، ءبىلىم بەرۋ پروسەسىندە جاساندى ينتەللەكتتى قولدانۋ، فۋنكسيونالدىق ساۋاتتىلىقتى قالىپتاستىرۋ جانە ەموسيونالدىق ينتەللەكتتى دامىتۋ تۋرالى ماسەلەلەرگە توقتالدى. مەكتەپ قابىرعاسىندا دوستىق ورتا قالىپتاستىرۋ مەن پەداگوگيكالىق قىزمەتتە جاڭا زەرتتەۋلەر جاساۋدىڭ جاي-كۇيىنە اسا نازار اۋدارىلدى.
فورۋم جاس مامانداردىڭ ىنتا-جىگەرىن ارتتىرۋ جانە ءوز تابىس تاريحىمەن بولىسكەن ءبىلىم بەرۋ سالاسىنداعى جەتەكشى ماماندارمەن تاجىريبە الماسۋ ءۇشىن ۇلكەن مۇمكىندىك الاڭىنا اينالدى.