ورتالىق قالالىق كلينيكالىق اۋرۋحاناعا سيرەك كەزدەسەتىن كلينيكالىق جاعداي - ىشكى ۇيقى ارتەرياسىن قىسقان ءبىزتارىزدى ءوسىندىنىڭ ۇزارۋى ورىن العان ناۋقاس ءتۇستى.
ناۋقاس 2 جىل بويى تاماعىنداعى بوتەن دەنە سەزىمى، جۇتىنۋداعى قيىندىق، سالماق جوعالتۋ، باس اينالۋ جانە ەسىن جوعالتۋ ورىن العانىن ايتتى، دەپ حابارلايدى aqshamnews.kz
پروفەسسور سەرىك تۇرسىنبايەۆ پەن تامىرلى حيرۋرگيا بولىمشەسىنىڭ مەڭگەرۋشىسى راحمان ساپاربايەۆتىڭ جەتەكشىلىگىمەن دارىگەرلەر توبى ءوسىندىنى الىپ تاستاۋ ءۇشىن كۇردەلى وتا جاسادى.
حيرۋرگيالىق ارالاسۋ كۇردەلى بولدى، ويتكەنى ۇزارعان ءوسىندى ومىرلىك ماڭىزدى تامىرلارعا، سونىڭ ىشىندە ميدى قانمەن قامتاماسىز ەتەتىن ىشكى ۇيقى ارتەرياسىنا جاقىن بولدى. كەز كەلگەن قاتەلىك ومىرگە ءقاۋىپ توندىرەتىن سالدارعا اكەلۋى مۇمكىن ەدى.
ونىڭ ۇستىنە ۇيقى ارتەرياسىن قايتا قاراۋ جانە ءوسىندىنى الىپ تاستاۋ ءبىر ۋاقىتتا جۇرگىزىلۋى كەرەك ەدى، بۇل ەرەكشە دالدىك پەن جوعارى شەبەرلىكتى قاجەت ەتتى. حيرۋرگتاردىڭ كاسىبيلىگى مەن ۇيلەسىمدى جۇمىسىنىڭ ارقاسىندا وتا ءساتتى ءوتتى.
ەگەر ارالاسۋ ۋاقىتىندا جاسالماسا، ناۋقاس ينسۋلتكە شالدىعۋى مۇمكىن ەدى. حيرۋرگ، انەستەزيولوگ جانە مەدبيكەلەر توبىنىڭ ۇيلەسىمدى جۇمىسىنىڭ ارقاسىندا بارلىق تاۋەكەل ازايتىلىپ، ناۋقاس اسقىنۋدان امان قالدى.
ەمدەلۋشى دارىگەرلەرگە ريزاشىلىعىن ءبىلدىردى: "دياگنوستيكانى ۋاقتىلى جۇرگىزگەن جانە جەدەل ارالاسۋ ءۇشىن اۋرۋحاناعا جاتقىزۋدى ۇسىنعان پروفەسسور تۇرسىنبايەۆ سەرىك ەرىشۇلىنا ەرەكشە ريزاشىلىعىمدى بىلدىرەمىن، ول مەنى ولىمگە اكەلۋى مۇمكىن اۋىر زارداپتان قۇتقاردى. سونداي-اق، ءبولىم مەڭگەرۋشىسى راحمان ساپاربايەۆقا جانە ونىڭ بۇكىل كومانداسىنا العىسىمدى بىلدىرەمىن. ولار ءوز ءىسىنىڭ ناعىز ماماندارى".
بۇل جاعداي دياگنوزدىڭ سيرەك كەزدەسەتىنىمەن دە، حيرۋرگيالىق ارالاسۋدىڭ كۇردەلىگىمەن دە ەرەكشە بولدى.
پروفەسسور سەرىك تۇرسىنبايەۆ اتاپ وتكەندەي، مۇنداي جاعداي وتە سيرەك كەزدەسەدى:
"ەرەسەكتەردە ءبىزتارىزدى ءوسىندى ۇزىندىعى ورتا ەسەپپەن 20-30 مم، ال ازيا تۇرعىندارىندا - 15،4-18،8 مم بولادى. ۇزىندىعى 30 مم-دەن اساتىن ءوسىندى ۇزارعان بولىپ سانالادى. مۇنداي ءوسىندى نەگىزىنەن 30 جاستان اسقان ادامداردىڭ شامامەن 4%-دا كەزدەسەدى جانە 4% جاعدايدا ولاردىڭ بولۋى كلينيكالىق بەلگىلەرمەن بىرگە جۇرەدى. ءبىزدىڭ جاعدايدا ءوسىندىنىڭ ۇزىندىعى 1،5 سم بولدى"، - دەيدى ول.
مىندەتتى الەۋمەتتىك مەديسينالىق ساقتاندىرۋ اياسىندا بىرەگەي جانە كۇردەلى وتا جاسالدى جانە قازىرگى ۋاقىتتا ناۋقاس اۋرۋحانادان شىعۋعا جانە تولىققاندى ومىرگە ورالۋعا دايىندالىپ جاتىر.