شاھارىمىزدا «جانۇيا» مامانداندىرىلعان كەشەنى جەتىم بالالارعا قولداۋ كورسەتىپ، قامقورلىق جاساپ كەلەدى. ال، جاقىن ارادا جاڭا، زاماناۋي عيماراتقا كوشەتىن بولادى. «BI Group» قۇرىلىس كومپانياسى بيزنەستىڭ ءوز قارجىسى ءۇشىن الەۋمەتتىك جاۋاپكەرشىلىك اياسىندا ەسكى عيماراتتى بۇزىپ، جاڭا زاماناۋي كەشەن سالۋدى جوسپارلاعان بولاتىن.
–نىسان الەمدىك ستاندارتتارعا ساي بولادى. ءبىز بالالار ءۇشىن بارلىق قاجەتتى جاعدايلاردى جاسايمىز. بۇل زاماناۋي ءارى ءقاۋىپسىز كەڭىستىك بولادى، وندا بالالار جان-جاقتى قولداۋ تاۋىپ، دامۋعا مۇمكىندىك الادى. قۇرىلىس تولىقتاي بيۋدجەتتەن تىس قارجىلاندىرىلادى، ياعني قۇرىلىس سالۋشىنىڭ قاراجاتى ەسەبىنەن. جوبانىڭ شامامەن قۇنى 5 ميلليارد تەڭگەنى قۇراپ وتىر. ءبىز جاڭا عيمارات جەتىم بالالاردىڭ بولاشاعى ءۇشىن ماڭىزدى قادام بولاتىنىنا سەنىمدىمىز، ولارعا تولىققاندى ءومىر ءسۇرىپ، ءبىلىم الۋعا مۇمكىندىك بەرەدى، - دەدى الماتى قالاسى اكىمىنىڭ ورىنباسارى اسەم ءنۇسىپوۆا.
«جانۇيا» مك 2006 جىلدان باستاپ جۇمىس ىستەيدى، ول جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان بالالار ءۇيىن، 4 جاستان 18 جاسقا دەيىنگى زياتكەرلىك كەمىستىگى بار بالالارعا ارنالعان تۇزەتۋ مەكتەپ-ينتەرناتىن قامتيدى. جاڭا عيماراتتىڭ قۇرىلىسى كەلەسى جىلى اياقتالادى دەپ كۇتىلۋدە. بۇل تۋرالى «جانۇيا» مك قامقورشىلىق كەڭەسىنىڭ ءتوراعاسى رافاەل گاسانوۆ ايتا كەتتى.
–ءبىز جاڭا كامپۋستاردىڭ قۇرىلىسىن 2025 جىلدىڭ تامىزىنا دەيىن اياقتاۋدى ماقسات ەتىپ وتىرمىز. ءبىزدىڭ مىندەتىمىز – قىركۇيەك ايىندا بالالار جاڭا عيماراتقا كوشىپ، ىڭعايلى جاعدايدا جاڭا ءومىر باستاۋى ءۇشىن بارلىق جاعدايدى جاساۋ. بۇگىنگى كۇنگە دەيىن «جانۇيا» كەشەنىندە 420 بالا تۇرىپ، ءبىلىم الدى، ولاردىڭ كەيبىرى قازىرگى ۋاقىتتا ارنايى ينتەرناتتا، ال باسقالارى قالالىق مەكتەپتەردە وقۋدا، - دەدى ول.