ەڭبەك جانە حالىقتى الەۋمەتتىك قورعاۋ مينيسترلىگى ءماجىلىس دەپۋتاتىنىڭ ساۋالىنا بەرگەن جاۋابىندا ەلىمىزدەگى ىشكى كوشى-قون كورسەتكىشتەرىن جاريالادى، - دەپ حابارلايدى Aqshamnews.kz.
ۇلتتىق ستاتيستيكا بيۋروسىنىڭ 2025 جىلدىڭ العاشقى 9 ايىنداعى دەرەكتەرىنە سايكەس، قازاقستاندا 1 ملن 326 مىڭ ادام قونىس اۋدارعان. ونىڭ 619 مىڭى وبلىستار اراسىنداعى كوشى-قوندى قۇرايدى. بۇل كورسەتكىش 2024 جىلدىڭ وسى كەزەڭىمەن سالىستىرعاندا 22،7 پايىزعا ارتىپ، وتكەن جىلعى 1 ملن 80 مىڭ اداممەن سالىستىرعاندا ايتارلىقتاي ءوسىمدى كورسەتىپ وتىر.
مينيسترلىك مالىمەتىنشە، ەرىكتى تۇردە قونىس اۋدارۋ تەتىگى بۇگىندە وڭتۇستىك وڭىرلەردەن سولتۇستىك ايماقتارعا ەڭبەك رەسۋرستارىن قايتا بولۋگە باعىتتالعان ماڭىزدى قۇرالعا اينالعان. باعدارلاما جۇمىس ىزدەپ جۇرگەن ازاماتتار مەن جۇمىسسىزداردى جۇمىسپەن قامتۋعا مۇمكىندىك بەرىپ وتىر.
اتالعان باعدارلاما ىسكە قوسىلعالى بەرى سولتۇستىك وڭىرلەرگە 66،2 مىڭ ادام كوشىپ بارعان. ولاردىڭ 3،6 مىڭى نەمەسە 6 پايىزى كەيىن كەرى قايتقان.