الماتى قوعامدىق كەڭىستىكتى دامىتىپ جاتىر. شىلدە ايىندا دوستىق داڭعىلىنىڭ اباي داڭعىلىنان ءال-فارابي داڭعىلىنا دەيىنگى بولىگىن قايتا جاڭعىرتۋ جۇمىسى باستالدى. قوعامدىق كەڭىستىكتەردى دامىتۋ باسقارماسى مەن وڭىرلىك كوممۋنيكاسيالار قىزمەتى بىرلەسىپ ۇيىمداستىرعان باسپا ءسوز تۋرىندا ب ا ق وكىلدەرى وسى نىساندى ارالاپ كوردى.
باسقارما باسشىسى باتىرحان سۇلەيمەنوۆتىڭ ايتۋىنشا، جوبا قالاداعى باستى كۇرە جولدىڭ بويىندا جاياۋ جۇرگىنشىلەرگە ارنالعان جايلى ايماق قۇرۋعا باعىتتالعان.
«دوستىق داڭعىلى بويىنداعى جولدىڭ جيەگى تار بولعاندىقتان، جاياۋ جۇرگىنشىلەر ۆەلوسيپەدشىلەرمەن، ساموكات مىنگەندەرمەن قاتار جۇرە المايدى. سونددىقتان جاياۋ جۇرگىنشىلەر مەن ۆەلوسيپەدكە ارناپ جولدى ەكىگە جاراتىن جوبالىق شەشىم قابىلداندى»، – دەدى باتىرحان سۇلەيمەنوۆ.
قايتا جاڭارتىلعان اۋماق – 1،5 شاقىرىم، اۋدانى – 4،17 گەكتار. جوبادا جالپى اۋماعى 22 مىڭ م²-دەن اساتىن جول سالىنىپ، جاياۋ جۇرگىنشىلەر جامىلعىسى ورناتىلادى، ونىڭ ىشىندە 15 197 م² اسفالت-بەتون جولدار مەن تروتۋارلار، سونداي-اق 6 923 م² بەتون تاقتادان تۇراتىن جاياۋ جۇرگىنشىلەردىڭ ايماقتارى دا بار. كوگالدانعان جەردىڭ كولەمى 17 800 م²-دەن اسپاق. سونىمەن قاتار ساۋلەتتىك ارلەۋ ەلەمەنتتەرى ورناتىلىپ، تۇرعىندار ءۇشىن تارتىمدى نۇكتەلەر جاسالادى.
«دوستىق داڭعىلى بويىندا ءبىز تەك جاياۋ جۇرگىنشى ايماقتارىن اباتتاندىرۋدى كوزدەيتىن جۇمىستاردى ىستەپ جاتىرمىز، جول بولىگىنە تيىسپەيمىز. كولىك قوزعالىسى توقتامايدى، ەركىن جۇرە بەرەدى. بۇل ادامداردىڭ ءجۇرىپ-تۇرۋىنا قولايسىزدىق كەلتىرمەس ءۇشىن جاسالىپ وتىر»، – دەپ اتاپ ءوتتى باسقارما باسشىسى باتىرحان سۇلەيمەنوۆ.
جۇمىستى 2026 جىلدىڭ ناۋرىز ايىندا اياقتاۋ جوسپارلانىپ وتىر.