اۋىل شارۋاشىلىعى ءمينيسترى ايداربەك ساپاروۆتىڭ توراعالىعىمەن كوكتەمگى دالا جۇمىستارىنا دايىندىق، شەگىرتكەگە قارسى كۇرەس شارالارىن جۇرگىزۋ جانە اۋىل شارۋاشىلىعى تاۋارىن وندىرۋشىلەردى قاجەتتى رەسۋرستارمەن قامتاماسىز ەتۋ ماسەلەلەرى بويىنشا كەڭەس ءوتتى.
كەڭەسكە وبلىس اكىمدەرىنىڭ ورىنباسارلارى، سالالىق ءبولىم باسشىلارى مەن مەملەكەتتىك ورگانداردىڭ وكىلدەرى قاتىستى، دەپ حابارلايدى aqshamnews.kz.
– كوكتەمگى ەگىس جۇمىستارى وڭتۇستىك وڭىرلەردىڭ بارلىعىندا باستالىپ كەتتى. الايدا، جەرگىلىكتى جەرلەردە ۇيىمداستىرۋ جۇمىستارى ءالسىز. جانار-جاعارمايمەن جانە مينەرالدى تىڭايتقىشتارمەن قامتاماسىز ەتۋ جۇيەلى تۇردە شەشىلمەي وتىر. كەيبىر وبلىستاردا جول كارتاسىندا بەكىتىلگەن ينديكاتورلاردى ورىنداۋ بويىنشا ىلگەرىلەۋشىلىك بايقالمايدى. مىندەتتەمەلەردى ورىنداۋ قاجەتتىگى تۋرالى ەسكەرتۋلەرىمىزدى بىرنەشە رەت جولداۋعا ءماجبۇرمىز، – دەدى مينيستر.
ۆيسە-مينيستر ەربول تاسجۇرەكوۆتىڭ ايتۋىنشا، وبلىستار اكىمدىكتەرىنىڭ الدىن الا مالىمەتتەرى بويىنشا، 2025 جىلى جالپى ەگىس كولەمى 23،7 ملن گەكتاردى قۇرايدى. بۇل وتكەن جىلمەن سالىستىرعاندا 413 مىڭ گەكتارعا كوپ. اتاپ ايتقاندا، ءداندى جانە ءداندى-بۇرشاقتى داقىلدار 16،6 ملن گا، مايلى داقىلدار – 3،3 ملن گا، كارتوپ – 83،4 مىڭ گا، مال ازىقتىق داقىلدار – 3،3 ملن گا جەرگە ەگىلەدى.
وڭىرلەرگە ەگىس القاپتارىن ءارتاراپتاندىرۋ جۇمىستارىن جانداندىرۋ جانە اۋىل شارۋاشىلىعى داقىلدارىنىڭ قۇرىلىمى بويىنشا كورسەتكىشتەردى قاتاڭ ساقتاۋ تاپسىرىلدى. دەگەنمەن، تۇركىستان جانە جامبىل وبلىستارىندا ايتارلىقتاي كەشەۋىلدەۋلەر تىركەلگەن.
قازىرگى ۋاقىتتا 1،2 ملن گەكتار جەرگە ىلعال جابۋ، 1،1 ملن گەكتارعا تۇقىم سەبۋگە دەيىنگى وڭدەۋ جانە 858 مىڭ گەكتارعا كوكتەمگى جىرتۋ جۇمىستارى جۇرگىزىلدى. وڭتۇستىك وڭىرلەردە 529 مىڭ گەكتار جەرگە ەگىن ەگىلدى.
ەگىس جۇمىستارىن ءساتتى وتكىزۋ ءۇشىن وڭىرلەرگە 401 مىڭ توننا ارزانداتىلعان ديزەل وتىنى ءبولىندى، ونىڭ 90،1 مىڭ تونناسى جونەلتىلدى. اۋىل اكىمدىكتەرىنە كەلىسىمشارتتاردى ۋاقتىلى بەكىتىپ، جانار-جاعارمايدى جەتكىزۋدى قامتاماسىز ەتۋ تاپسىرىلدى.
اۋىل شارۋاشىلىعى تەحنيكاسىنىڭ دايىندىعى 96% دەڭگەيىندە. قازىرگى تاڭدا 139 مىڭ تراكتور، 5،6 مىڭ ەگىس كەشەنى، 71 مىڭ سەپكىش جانە 141 مىڭ توپىراق وڭدەۋ قۇرالى بار.
2،3 ملن توننا دايىندالعان تۇقىمنىڭ 846 مىڭ تونناسى تەكسەرىلدى، ونىڭ 99%-ى كونديسيالى دەپ تانىلدى.
612 مىڭ تونناعا كەلىسىمشارت جاسالعان مينەرالدى تىڭايتقىشتىڭ 358 مىڭ تونناسى جەتكىزىلدى. الايدا، اكىمدىكتەر مەن وندىرۋشىلەردىڭ دەرەكتەرىندە الشاقتىقتار بايقالىپ وتىر. وسىعان بايلانىستى مينيستر ەسەپتىلىكتى سايكەستەندىرۋ جانە باقىلاۋدى كۇشەيتۋ قاجەتتىگىن اتاپ ءوتتى.
«كەڭ دالا» باعدارلاماسى اياسىندا بۇگىنگى تاڭدا 450 ملرد تەڭگەگە 6،3 مىڭ ءوتىنىم ءتۇسىپ، 4،2 مىڭ اۋىل شارۋاشىلىعى تاۋارىن ءوندىرۋشى قارجىلاندىرىلدى.
بيىل شەگىرتكەلەردىڭ تارالۋى 2،1 ملن گا اۋماقتى قامتيدى دەپ كۇتىلۋدە، بۇل وتكەن جىلمەن سالىستىرعاندا 1 ملن گەكتارعا از. جالپى، 38 ملن گا اۋماقتى زەرتتەۋ جوسپارلانىپ وتىر. جۇمىسقا 4،6 مىڭنان استام ادام تارتىلاتىن بولادى.
تۇركىستان وبلىسىندا 75،6 مىڭ گەكتار جەردە حيميالىق وڭدەۋ جۇرگىزىلدى، 256 تەحنيكا جۇمىلدىرىلدى. جامبىل وبلىسى 16 ساۋىردەن باستاپ وڭدەۋگە كىرىسەدى.
ايداربەك ساپاروۆ اكىمدىكتەرگە كوكتەمگى دالا جۇمىستارىنىڭ بارلىق كەزەڭدەرىن باقىلاۋدى كۇشەيتۋدى تاپسىردى.
– جول كارتاسىندا بەلگىلەنگەن بارلىق ينديكاتورلاردىڭ ورىندالۋىن قامتاماسىز ەتۋ قاجەت. اسىرەسە تۇقىم ساپاسىنا، تۇقىم ينسپەكتورلارىنىڭ جۇمىسىنا، رەسۋرستاردىڭ ۋاقىتىلى جەتكىزىلۋىنە جانە تەحنيكالىق دايىندىققا ەرەكشە ءمان بەرۋ كەرەك. مەملەكەت تاراپىنان بارلىق جاعداي جاسالعان: قارجىلاندىرۋ، جەڭىلدەتىلگەن ليزينگ، اۋىل شارۋاشىلىعى وندىرۋشىلەرىن قولداۋ شارالارى قاراستىرىلعان. ەندى وڭىرلەردەن ناقتى ۇيىمداستىرۋشىلىق پەن باقىلاۋ تالاپ ەتىلەدى. ەگىس جۇمىستارى اگروتەحنولوگيالىق تالاپتارعا سايكەس ءارى ۋاقىتىندا ءوتۋى ءتيىس، – دەدى مينيستر.
سونداي-اق اوك سالاسىنداعى ينۆەستيسيالىق جوبالاردى ىسكە اسىرۋ ماسەلەلەرى قارالدى.
– اوك دامۋى ءۇشىن ينۆەستيسيا تارتۋ – نەگىزگى مىندەتتەردىڭ ءبىرى. الايدا كەيبىر وڭىرلەردە، اسىرەسە سقو تاجىريبەسىن تاراتۋ بويىنشا جۇمىس باياۋ ءجۇرىپ جاتىر. بيىل جوسپارلانعان ينۆەستيسيالىق جوبالاردى ساپالى جانە ۋاقىتىلى جۇزەگە اسىرۋ ءۇشىن بارلىق كۇشتى سالۋ قاجەت. ارتتا قالىپ جاتقان وبلىستار بەلسەندىرەك جۇمىس ىستەۋى كەرەك. بارلىق ەسكەرتۋلەردى ەسكەرىپ، قويىلعان مىندەتتەردى ورىنداۋدى قامتاماسىز ەتۋدى سۇرايمىن، – دەپ تۇيىندەدى ايداربەك ساپاروۆ.