سيفرلاندىرۋ مەملەكەتتىك قىزمەتكە كىرۋ ءراسىمىن جەڭىلدەتەدى

قازاقستاندا مەملەكەتتىك قىزمەتكە ىرىكتەۋ ءراسىمى جەڭىلدەتىلدى. ەندى ۇمىتكەرلەر بارلىق كەزەڭدەردەن ۇيدەن شىقپاي-اق، «eQyzmet» اقپاراتتىق جۇيەسى ارقىلى وتە الادى.

ادامي فاكتوردى بولدىرماۋ جانە ءراسىمنىڭ اشىقتىعىن قامتاماسىز ەتۋ ماقساتىندا تاۋەلسىز پروكتورينگ جۇيەسى ەنگىزىلدى. كونكۋرس جەڭىمپازى اقپاراتتىق جۇيە ارقىلى اۆتوماتتى تۇردە، بارلىق كەزەڭدەردەگى جيناق بالدىڭ نەگىزىندە انىقتالادى.

جۇيە بارلىق قاجەتتى قۇجاتتار مەن دەرەكتەردى اۆتوماتتى تۇردە جۇكتەيدى. قورىتىندىسىندا ۇمىتكەر ەلەكتروندىق سيفرلىق قولتاڭبامەن جۇمىسقا ورنالاسۋ تۋرالى وتىنىشكە قول قويادى جانە قۇتتىقتاۋ حابارلاماسىن الادى.

قۇقىقتىق اكتىلەر سانى قىسقارتىلدى. سونىمەن قاتار، ماتىندەرمەن جانە سيفرلىق اقپاراتپەن جۇمىس ىستەۋ داعدىلارىن باعالايتىن جاڭا كەزەڭدەر ەنگىزىلدى. بۇل ۇدەرىستىڭ ۋاقىتىن ەداۋىر قىسقارتىپ، مەملەكەتتىك قىزمەتكە كىرۋدى جەڭىلدەتتى.

مەملەكەتتىك قىزمەتتىڭ جاڭا گيبريدتى مودەلى مانساپتىق پەن پوزيسيالىق جۇيەلەردىڭ ەڭ جاقسى ەرەكشەلىكتەرىن بىرىكتىرەدى. بۇل ءتاسىل ءتۇرلى سالاداعى ماماندار ءۇشىن مەملەكەتتىك قىزمەتكە اشىق ءارى ءادىل قولجەتىمدىلىكتى قامتاماسىز ەتەدى.

بۇگىندە 68 مەملەكەتتىك ورگان مەملەكەتتىك قىزمەتكە ىرىكتەۋدى جاڭا فورماتتا جۇرگىزىپ جاتىر. جەرگىلىكتى اتقارۋشى ورگاندار، ءماسليحاتتار جانە الماتى قالاسىنىڭ تەكسەرۋ كوميسسياسى 2025 جىلدىڭ ەكىنشى جارتىجىلدىعىنان باستاپ وسى فورماتقا كوشەدى.

«قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭنىڭ 15-بابى 6-تارماعىنا سايكەس، مەملەكەتتىك تاپسىرىس شەڭبەرىندە جوعارى نەمەسە جوعارى وقۋ ورنىنان كەيىنگى ءبىلىم العان ازاماتتار وقۋ اياقتالعاننان كەيىن ءبىر جىل ىشىندە كەلەسى لاۋازىمدارعا كونكۋرسسىز ورنالاسۋ مۇمكىندىگىنە يە:

• اۋدان، وبلىس نەمەسە وبلىستىق ماڭىزى بار قالا اكىمدىگى مەن ءماسليحاتى اپپاراتتارىنىڭ تومەنگى لاۋازىمدارى (وبلىس ورتالىقتارى ەمەس)؛

• جەرگىلىكتى بيۋدجەتتەن قارجىلاندىرىلاتىن اتقارۋشى ورگانداردىڭ باسشى ەمەس لاۋازىمدارى؛

• اۋىل، كەنت، اۋىلدىق وكرۋگ اكىمدىگى اپپاراتىنىڭ لاۋازىمدارى؛

• ورتالىق مەملەكەتتىك ورگانداردىڭ اۋماقتىق بولىمشەلەرىندەگى باسشى ەمەس لاۋازىمدار.

سونداي-اق، جەكە سەكتوردان كەلگەن ۇمىتكەرلەرگە ارنالعان جاڭا بىلىكتىلىك تالاپتارى بەكىتىلدى. بىلىكتىلىككە سايكەس كەلگەن جاعدايدا تۇلەكتەر www.gov.kz جانە www.eqyzmet.gov.kz پورتالدارى ارقىلى بوس لاۋازىمدارعا ءوتىنىش بەرە الادى.

قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتى جانىندا جاس مەملەكەتتىك قىزمەتشىلەر مەكتەبى جۇمىس ىستەيدى. مەكتەپتىڭ ماقساتى – تالانتتى ءارى بەلسەندى جاستاردى مەملەكەتتىك قىزمەتكە تارتۋ. جوعارى كۋرس ستۋدەنتتەرى مەن تۇلەكتەر تەگىن وقىتىلىپ، مەملەكەتتىك ورگانداردا تاعىلىمدامادان وتەدى.

ۆ. مىرزاگەلدينوۆا،

مەملەكەتتىك قىزمەت باسقارماسىنىڭ باسشىسى
قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ
الماتى قالاسى بويىنشا دەپارتامەنتى