وڭتۇستىك كورەيادا بولعان بىرنەشە ءىرى ورمان ورتىنەن كەم دەگەندە ءتورت ادام قازا تاپتى، ال تاعى التاۋى جاراقات العان، دەپ حابارلايدى aqshamnews.kz
ءورت جۇما كۇنى سونچحون اۋدانىنىڭ اۋماعىندا باستالعان، ول سەۋلدەن وڭتۇستىك-شىعىسقا قاراي 250 شاقىرىمدا ورنالاسقان. قاتتى جەلدىڭ اسەرىنەن وت تەز تارالىپ، كورشى اۋدانداردى دا قامتىدى. «ءرونحاپ» اگەنتتىگىنىڭ مالىمەتىنشە، ءقازىردىڭ وزىندە 3000 گەكتاردان استام جەر ورتەنىپ كەتكەن.
ەڭ كوپ زارداپ شەككەن ىيسون اۋدانى بولدى، وندا 1000 گەكتاردان استام ورمان ورتەندى. وسى اۋداننىڭ اۋماعىندا سيللا ديناستياسىنا تيەسىلى كونە ۋنرامسا عيباداتحاناسى دا ورتەندى. التى عيماراتتى جالىن قۇشتى. ءابۇيىر بولعاندا موناحتار عيمارات ىشىندەگى قۇندى ارتەفاكتىلەردى شىعارىپ ۇلگەرگەن.
تابيعي اپاتتارمەن كۇرەس جونىندەگى ورتالىق شتابتىڭ مالىمەتىنە سايكەس، ءتورت ادام قازا تاۋىپ، تاعى التى ادام اۋرۋحاناعا تۇسكەن، ولاردىڭ بەسەۋى اۋىر جاراقات العان. 1500-دەن استام ادام ۋاقىتشا باسپانالارعا ەۆاكۋاسيالاندى. «ءرونحاپ» مالىمەتىنشە، ءورت سوندىرۋشىلەر ەلدىڭ وڭتۇستىك-شىعىسىنداعى ءتورت اۋداندا ءورتتى ءسوندىرۋ جۇمىستارىن جالعاستىرىپ جاتىر.