ق ر ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ ۇلتتىق حالىق ساناعى ءداستۇرلى فورماتتا قالاي جۇرگىزىلەتىنىن ءتۇسىندىردى، دەپ حابارلايدى almaty-akshamy.kz
«ساناق سۇراقتارىنا ونلاين رەجيمدە جاۋاپ بەرگەندەر ساناقتان وتكەنى تۋرالى حابارلامانى كورسەتەدى. ينتەرۆيۋەر تۇرعىن ۇيدەگى بارلىق ادامدار ساناقتان وتكەنىنە كوز جەتكىزگەننەن كەيىن، ءوز ۋچاسكەسىنىڭ كەلەسى مەكەنجايىنا بارادى. بۇل ۋچاسكەلەر حالىق ساناعىنىڭ 1-30 ماۋسىم ارالىعىندا وتكەن ءبىرىنشى كەزەڭى بارىسىندا قالىپتاستىرىلعان بولاتىن»، - دەدى نۇربولات ايداپكەلوۆ ورتالىق كوممۋنيكاسيالار قىزمەتىندە وتكەن بريفينگتە.
ايتا كەتەيىك، 1 قازاننان باستاپ حالىقتى ساناقپەن تولىق قامتۋ ماقساتىندا جاپپاي ارالاۋ كەزەڭى باستالدى. ول 30 قازانعا دەيىن جالعاسادى.
«قازىرگى ۋاقىتتا رەسپۋبليكا بويىنشا ساناق پەرسونالى رەتىندە 23 مىڭ ادام جۇمىسقا الىندى. ولاردىڭ ىشىندە 2693 نۇسقاۋشى-باقىلاۋشى جانە 20 مىڭنان استام ينتەرۆيۋەر بار. ەرەكشە اتاپ وتەرلىگى، ولاردىڭ بارلىعى 18 جاستان اسقان، COVID-كە قارسى ۆاكسينا العان، پلانشەت، كومپيۋتەرمەن جۇمىس ىستەي الاتىن ازاماتتار. بارلىق ينتەرۆيۋەرلەرگە پلانشەتپەن جۇمىس ىستەۋ، ساۋال سالۋ جۇرگىزۋ ادىستەرى بويىنشا وقىتۋ ۇيىمداستىرىلدى. ينتەرۆيۋەردە ساناق لوگوتيپى بار كوك شارف جانە سومكە بولادى. ەلەكتروندىق ساناق پاراقتارى بار پلانشەت، سونداي-اق، بەيدج-كۋالىك بەرىلەدى. بۇل كۋالىكتە اۋماقتىق ستاتيستيكا دەپارتامەنتى باسشىسىنىڭ قولىمەن جانە مورىمەن راستالعان ينتەرۆيۋەردىڭ فوتوسۋرەتى، تولىق ءاتى-جونى بولادى. كۋالىكتىڭ جوعارعى بولىگىندە تىركەۋ ءنومىرى كورسەتىلەدى. بۇل ءنومىردى sanaq.gov.kz سايتىندا «ينتەرۆيۋەردى ىزدەۋ» جولاعىنا ەنگىزۋگە بولادى، سودان كەيىن سايتتا ينتەرۆيۋەردىڭ دەرەكتەرى كورسەتىلەدى. سونداي-اق، ينتەرۆيۋەردىڭ جەكە باسىن 1446 نومىرىنە قوڭىراۋ شالۋ ارقىلى دا تەكسەرۋگە بولادى»، - دەپ ءتۇسىندىردى سپيكەر.