بۇل تۋرالى ءماجىلىس ءتوراعاسى ەرلان قوشانوۆ ايتتى.
سيفرلىق كودەكس جوباسى اياسىندا جالعان اقپاراتتىڭ تارالۋىنا زاڭنامالىق تۇرعىدان توسقاۋىل قويىلماق، دەپ حابارلايدى aqshamnews.kz
"كەشە ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت كەمەل ۇلى توقايەۆ وتكەن جىلدىڭ الەۋمەتتىك-ەكونوميكالىق دامۋ ناتيجەلەرىن قورىتىندىلاپ، جاڭا مىندەتتەر قويدى. مەملەكەت باسشىسى ەكونوميكالىق دامۋدىڭ ءبىرقاتار كورسەتكىشى بويىنشا وڭ سەرپىن بار ەكەنىن اتاپ ءوتىپ، الداعى بەس جىلعا ارنالعان جۇمىستىڭ باستى باعىتتارىن ايقىنداپ بەردى. ول – ءىرى ينفراقۇرىلىمدىق جوبالار، سيفرلاندىرۋ مەن جاساندى ينتەللەكت، اتوم ەنەرگەتيكاسىن دامىتۋ، اگروونەركاسىپتىك كەشەندى نىعايتۋ، ينۆەستيسيا تارتۋ. ارينە، بۇل مىندەتتەردى ورىنداۋ ءۇشىن زامان تالابىنا بەيىمدەلگەن بەرىك زاڭنامالىق نەگىز قاجەت"، - دەدى ءماجىلىس سپيكەرى.
ونىڭ سوزىنشە، مەملەكەت باسشىسى پارلامەنتكە جەر قويناۋىن پايدالانۋ قۇقىقتارىن ءبولۋ كەزىندە ينۆەستورلارعا تۇسىنىكتى ءارى اشىق قۇقىقتىق بازا قۇرۋ تۋرالى تاپسىرما بەردى.
"قازىرگى ۋاقىتتا دەپۋتاتتاردىڭ باستاماسىمەن ازىرلەنگەن جەر قويناۋىن پايدالانۋ تۋرالى زاڭ جوباسى قارالىپ جاتىر. ەندى باستاماشى دەپۋتاتتار ەلىمىزگە ءىرى گەولوگيالىق بارلاۋ كومپانيالارى كەلۋىنە نەعۇرلىم قولايلى جاعداي جاساۋ ماسەلەسىنە مۇقيات نازار اۋدارۋى قاجەت. بۇل ورايدا وزىق ەلدەردىڭ تاجىريبەسىن بارىنشا زەردەلەپ، جۇمىستى سەسسيا سوڭىنا دەيىن اياقتاۋىمىز كەرەك"، - دەدى قوشانوۆ.
مەملەكەت باسشىسى نازار اۋدارعان تاعى ءبىر ماڭىزدى ماسەلە – سيفرلاندىرۋ.
"بىرىككەن ۇلتتار ۇيىمى بەرگەن باعا بويىنشا، قازاقستان بۇگىنگى تاڭدا وسى سالادا ەلەۋلى جەتىستىككە جەتىپ وتىر. ەلىمىز 193 مەملەكەت اراسىندا 24ء-شى ورىندا. سونداي-اق ونلاين-قىزمەتتەر يندەكسى بويىنشا ۇزدىك 10 ەل قاتارىنا كىرەدى. ماسەلەن، ينتەرنەت ارقىلى مەملەكەتتىك قىزمەتتەرگە قول جەتكىزۋ دەڭگەيى 92 پايىزعا جەتتى. الايدا مۇنداي پروگرەستىڭ ەكىنشى جاعى دا بار. سيفرلاندىرۋمەن بىرگە حالىققا جالعان اقپارات تاراتۋ بەلەڭ الىپ، الاياقتىقتىڭ نەبىر ءتۇرى قارقىندى دامىپ كەلە جاتىر. قازاقستاندىقتار كۇن سايىن وسىنداي جاعىمسىز جايتتارعا تاپ بولۋدا. بىرنەشە دەپۋتاتتىق ساۋالدىڭ وسى پروبلەماعا ارنالعانى بەكەر ەمەس. قازىرگى جاعدايدا بۇل ماسەلەگە جان-جاقتى قاراۋ كەرەك. ەڭ الدىمەن، زاڭ مەن ءتارتىپتى ساقتاۋعا باعىتتالعان شارالار قابىلداۋ قاجەت. ماسەلەن، الدا قارالاتىن سيفرلىق كودەكس جوباسى شەڭبەرىندە ەلىمىزدىڭ تۇراقتىلىعىنا نۇقسان كەلتىرەتىن جالعان اقپاراتتىڭ تارالۋىنا زاڭنامالىق تۇرعىدان توسقاۋىل قويۋعا ءتيىسپىز. سونىمەن قاتار، دەسترۋكتيۆتى كونتەنت تاراتقانى ءۇشىن ينتەرنەت-پلاتفورمالاردىڭ جاۋاپكەرشىلىگىن قاراستىرعان ءجون"، - دەپ اتاپ ءوتتى ول.
ەرلان قوشانوۆ جاساندى ينتەللەكتىنى ەنگىزۋ جونىندەگى جۇمىستى جالعاستىرۋ قاجەتتىگىن ايتتى.
ءماجىلىس قابىرعاسىندا ءتيىستى زاڭ جوباسى ازىرلەندى. جاقىن ارادا وسى زاڭ جوباسىن تالقىلاۋ جۇمىسى باستالادى.