سول سەبەپتى وعان تىيىم سالۋ ۇسىنىلدى.
3 مىڭنان استام ادام بىلتىر الاياقتارعا الدانعان، دەپ حابارلايدى Almaty-akshamy.kz
دەپۋتات ەلنۇر بەيسەنبايەۆ باس پروكۋرور بەرىك اسىلوۆ پەن قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆاعا جولداعان دەپۋتاتتىق ساۋالىندا ەلىمىزدەگى ميكروقارجى ۇيىمدارى ارقىلى ونلاين نەسيە راسىمدەۋگە تىيىم سالۋدى ۇسىندى.
«حالىق اراسىندا ءقازىر ونلاين نەسيە الۋعا سۇرانىس كۇرت ارتقان. قاراپايىم ادامدار ميكروقارجى ۇيىمدارىنان جەتىسكەننەن قارىز المايدى. ايلىعى شايلىعىنا جەتپەگەندىكتەن، وسىلايشا ءبىر قارىزدى ەكىنشى قارىزبەن جامايدى. بۇگىندە ەلىمىزدە 239 ميكروقارجى ۇيىمى بار. بانكتەن نەسيە راسىمدەي الماعان اڭقاۋ حالىقتى دەلدال-الاياقتار قۇرىققا وڭاي ءتۇسىرىپ، وسىنداي ۇيىمدارعا الىپ كەلەدى. تىعىرىققا تىرەلگەن ادامنىڭ موينىنا جۇزدەگەن پايىزدىق نەسيە راسىمدەلەدى، - دەدى دەپۋتات ءماجىلىستىڭ جالپى وتىرىسىندا.
ونىڭ ايتۋىنشا، 2022 جىلى بانكتەن نەسيە اپەرەمىن دەگەن جەلەۋمەن الاياقتار 3022 ادامدى سان سوقتىرعان. بيىلعى 3 ايدا 475 فاكتى تىركەلگەن.
«مىسالى، وسىدان ءبىر اي بۇرىن اقمولا وبلىسى بۋراباي اۋدانىنىڭ تۇرعىنىنا حابارلاسقان ينتەرنەت-الاياق ءوزىن بانك قىزمەتكەرىمىن دەپ تانىستىرىپ، 1 ملن تەڭگە نەسيە راسىمدەتكەن، ال اقشا وزگە ادامنىڭ شوتىنا جىبەرىلدى. اباي وبلىسىنىڭ تۇرعىنىنا حابارلاسقان الاياق بولسا، ۇيالى تەلەفونعا AnyDesk دەپ اتالاتىن قوسىمشانى ورناتتىرىپ، سول ارقىلى 9،5 ملن تەڭگە نەسيە راسىمدەپ العان»، - دەدى ول.
مۇنداي وقيعالار قازاقستاننىڭ بارلىق وڭىرىندە تىركەلگەن.
بۇل ماسەلە بويىنشا AMANAT پارتياسىنىڭ قوعامدىق قابىلداۋلارىنا الاياقتاردىڭ ىسىنە تاپ بولعان ازاماتتار ءجيى شاعىم تۇسىرەدى. الاياقتار ازاماتتاردىڭ جەكە دەرەكتەرىن پايدالانا وتىرىپ، ونلاين نەسيەنى وزگە ادامعا زاڭسىز راسىمدەيدى، - دەدى ەلنۇر بەيسەنبايەۆ.
وسىعان بايلانىستى ول ماسەلەنى شەشۋدىڭ مىناداي جولدارىن ۇسىندى:
بىرىنشىدەن، ازاماتتارعا ميكروقارجى ۇيىمدارى ارقىلى ونلاين نەسيە راسىمدەۋگە ەلەكتروندى ۇكىمەت بازاسىندا تىيىم سالۋدىڭ مۇمكىندىگىن تەزدەتىپ ەنگىزۋ؛
ەكىنشىدەن، قازاقستاندا زاڭسىز لوتەرەيالارمەن، قارجى پيراميدالارى، وزگە دە زاڭسىز قارجىلىق وپەراسيالارمەن كۇرەستىڭ قالاي جۇرگىزىلەتىنىن ءتۇسىندىرۋ؛
ۇشىنشىدەن، الەۋمەتتىك جەلىلەرگە كەشەندى تەكسەرۋ جۇرگىزىپ، ونلاين جارنامانى الاياقتىق ماقساتتا پايدالاناتىن توپتاردى بۇعاتتاۋ.