كەلەسى وقۋ جىلىنان باستاپ ۆەدومستۆولىق جوو-دا ءۇش جاڭا ءبىلىم بەرۋ باعدارلاماسى پايدا بولادى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا ءىىم الماتى اكادەمياسى باسشىسىنىڭ ورىنباسارى، پوليسيا پولكوۆنيگى ەرجان بيمولدانوۆ مالىمدەدى، دەپ حابارلايدى almaty-akshamy.kz
اكادەميادا "قۇقىق قورعاۋ قىزمەتى"، "كيبەرقاۋىپسىزدىكتى قامتاماسىز ەتۋ"، "ءىىو قىزمەتىن IT-كريميناليستيكالىق قامتاماسىز ەتۋ"، "اقپاراتتىق جۇيەلەر" سياقتى ءۇش جاڭا باعىت بويىنشا ىشكى ىستەر ورگاندارى جۇيەسىنىڭ كاسىبي كادرلارى دايىندالادى.
"سوڭعى جىلدارى كيبەرقىلمىس، ينتەرنەت-الاياقتىق تەك قازاقستاندى عانا ەمەس، بۇكىل الەمدى ءدۇر سىلكىندىردى. وسى قىلمىستارعا ءتيىمدى قارسى تۇرۋ كەرەكتىگىن ەسكەرە وتىرىپ، جاڭا ءبىلىم بەرۋ باعدارلامالارىن اشۋ تۋرالى شەشىم قابىلداندى. وسى باعىتتا استانا جانە الماتى قالالارىنىڭ پوليسيا دەپارتامەنتتەرىندە كيبەرقىلمىستاردى اشۋمەن جانە تەرگەۋمەن اينالىساتىن ارنايى بولىمشەلەر اشىلدى. ولار كيبەرپول دەپ اتالادى. ءبىز وسى بولىمشەلەردىڭ قىزمەتكەرلەرىن الماتى اكادەمياسىنىڭ قابىرعاسىندا وقىتاتىن بولامىز"، - دەدى ە. بيمولدانوۆ.
سونىمەن قاتار، اكادەميادا قازىرگى جانە بولاشاق قىزمەتكەرلەردى ينتەرنەت ارقىلى جاسالاتىن قىلمىسپەن كۇرەسۋ بويىنشا جۇمىس داعدىلارىنا ۇيرەتۋ ءۇشىن كيبەرزەرتحانا مەن كيبەرپوليگون اشىلدى.
اكادەميا تەگىن ءبىلىم الىپ، جايلى جاتاقحانادا تۇرۋدى قامتاماسىز ەتەدى. سونداي-اق ارتىقشىلىقتار قاتارىندا تەگىن تاماق، فورمالىق كيىم، مەديسينالىق قىزمەت كورسەتۋ، تۇرعىلىقتى جەرىنە بارۋ جانە كەرى قايتارۋ (پويىزبەن) كىرەدى. كۋرسانتتار شاكىرتاقى الادى. وقۋ مەرزىمى مەرزىمدى اسكەري قىزمەت وتكەرۋمەن تەڭ.
وقۋدى اياقتاعاننان كەيىن بىتىرۋشىلەرگە «ۇلتتىق قاۋىپسىزدىك جانە اسكەري ىستەر باكالاۆرى» جانە «كيبەرقاۋىپسىزدىكتى قامتاماسىز ەتۋ سالاسىنداعى باكالاۆر» بىلىكتىلىكتەرى بار مەملەكەتتىك ۇلگىدەگى ديپلوم بەرىلەدى، سونىمەن قاتار «پوليسيا لەيتەنانتى» ارنايى اتاعى بەرىلەدى.
وقۋعا ءتۇسۋ بويىنشا تۇرعىلىقتى جەرى بويىنشا اۋداندىق (قالالىق) پوليسيا باسقارمالارىنا (بولىمدەرىنە) نەمەسە تىكەلەي الماتى اكادەمياسىنا جۇگىنىڭىز. نەمەسە +7-705-755-25-77، +7-775-930-55-88 تەلەفوندارى بويىنشا اقپارات الۋعا بولادى. ۇمىتكەر مەديسينالىق كوميسسيادان جانە دەنە شىنىقتىرۋ دايىندىعى بويىنشا سىناقتاردان ءوتۋى كەرەك. ۇبت ناتيجەسى 50 باللدان تومەن بولماۋى ءتيىس.