جاڭا ماماندىقتار قالاي دامۋدا؟
اينەليا تاعى ءبىر كۇنىن قارسى الدى. ادەتىنشە، اسىقپاي تاڭعى اسىن ءىشىپ، تەرەزەسىنەن قاربالاس قالاعا قاراپ از-كەم ۋاقىت وتكىزدى. ەندى مىنە، سۇيىكتى كوفەسىن ءىشىپ الىپ، جۇمىسىنا كىرىسپەك. بۇل ونىڭ جۇمىس كۇنى بولاتىن.
وسى كەزدە وزىمەن قاراما-قارسى ەسىكتە تۇراتىن كورشى تاتە قوعامدىق كولىكتە كەتىپ بارا جاتقان. ونىڭ ويىندا «بۇگىن تاعى جۇمىستان كەشىكتىم، سوگىس ەستيمىن-اۋ» دەگەن ۋايىم عانا بار.
ەكى كورشىنىڭ تاڭعى ومىرىندەگى مۇنداي ايىرماشىلىقتىڭ پايدا بولعانىنا بىرنەشە جىل عانا بولدى. اينەليا سوڭعى جىلدارى قارقىندى دامىعان جاڭا ماماندىقتى يگەرىپ، ونلاين جۇمىس ىستەپ جۇرگەن جاس مامان. ءوز ۇيىندە، قوعامدىق كولىكتە، الدە كوفەحانادا، كەيدە ساياباقتا وتىرىپ 2-3 ساعات ساپالى جۇمىس ىستەۋ ول ءۇشىن تولىق جۇمىس كۇنىنىڭ اياقتالعانىن بىلدىرەدى.
اينەليا – ءبىز سۇحباتتاسقان كەيىپكەرىمىزدىڭ ءبىرى، كوپيرايتەر مامانى. ول دا بۇرىن بىرنەشە ءتۇرلى جۇمىس ورىندارىندا ىستەگەن، تاڭنان كەشكە دەيىن ءداستۇرلى جۇمىس تارتىبىندە ءجۇرىپ-تۇرعان. ءبىراق جاڭا تەندەنسياعا ىلەسىپ ونلاين جۇمىس ىستەگەننەن كەيىن ءومىرى مۇلدە باسقا باعىتقا وزگەردى.
«ءبىر ارتىقشىلىعى – ءبىر عانا سالادا جۇمىس اتقارماي، بىرنەشە كومپانيالارمەن، ءتۇرلى ساراپشىلارمەن ءبىر ۋاقىتتا جۇمىس ىستەي وتىرىپ مول تابىس تابا الامىن»، – دەيدى اينەليا جانبوتىروۆا قازىرگى جۇمىسىنىڭ ارتىقشىلىعىن سۇراعانىمىزدا. ونىڭ ويىنشا ءداستۇرلى جۇمىس ءستيلى ومىرگە ۇلكەن شەكتەۋلەر پايدا قىلىپ، وزىنە ۋاقىت بولۋگە مۇرشا بەرمەيدى. قازىرگى ءومىرى ءبىزدىڭ كەيىپكەرىمىزگە ۇنايدى، سەبەبى ول تابىس تابا وتىرىپ، ءوزىنىڭ شىعارماشىلىعىنا، جەكە ومىرىنە ۋاقىت بولە الادى.
زامان مەن عالامنىڭ وزگەرۋىمەن ماماندىقتار دا قارقىندى تۇردە دامىپ، جاڭارۋىن بايقاپ وتىرمىز. ءار ءداۋىردىڭ تالاپتارىنا ساي جاڭا كاسىبي باعىتتار پايدا بولىپ، تانىمال ماماندىقتار جاڭا تۇرپاتتا جاڭعىرۋدا. قازىرگى زاماندا تەحنولوگيانىڭ جىلدام دامۋى مەن قاشىقتان جۇمىس ىستەۋ مۇمكىندىكتەرىنىڭ كەڭەيۋى ونلاين ماماندىقتاردى ۇلكەن سۇرانىسقا يە ەتتى. الەۋمەتتىك مەديانىڭ، سيفرلىق ماركەتينگتىڭ، باعدارلامالاۋدىڭ جانە باسقا دا ساندىق قىزمەتتەردىڭ ماڭىزى ارتقان سايىن، ونلاين جۇمىس ىستەيتىن ماماندارعا دەگەن سۇرانىس كۇننەن-كۇنگە وسۋدە. جاڭا ماماندىقتارداعى تابىس مۇمكىندىكتەرى دە سان ءتۇرلى. تەحنولوگيالىق جەتىستىكتەر مەن عالامتوردىڭ وركەندەۋى بىزگە جاڭا ەڭبەك نارىعىن ۇسىنۋدا. بۇنداي جۇمىس سالالارى قوعامىمىزدا ءالى تولىق قالىپتاسىپ، دامىپ ۇلگەرە قويمادى. سوعان قاراماستان ولارعا دەگەن سۇرانىس كۇننەن-كۇنگە ارتىپ كەلەدى.
ءقازىر الماتىدا زامان تالابىنا ساي جاڭا ماماندىقتاردى يگەرىپ ونلاين جۇمىس ىستەيتىن جاستار وتە كوپ. سونىڭ ءبىرى انەل ورىنباي، سمم مامانى. انەلدىڭ ءومىرى ءبىرقالىپتى، ءبىراق وتە جايلى. ونلاين جۇمىس ىستەۋ ونىڭ ءومىر داعدىسىنا ساي كەلەدى. سەبەبى، انەل ۋاقىتىن ءتيىمدى پايدالانۋعا تىرىساتىن ادىم، جەكە ومىرىنە، دەنساۋلىعىنا كوپ كوڭىل بولەگەندى قالايتىن ادام. ءومىردىڭ ءار ءساتىن تولىققاندى سەزىنىپ، ءلاززات العىسى كەلەدى. ءقازىر جۇمىسى مىنە وسى ءومىر سالتىنا ۇيلەسىپ-اق تۇر.
وعان مۇنداي سالاعا قالاي كەلگەنىن سۇراپ كوردىك:
– «شىنىن ايتسام، ماعان ءداستۇرلى جۇمىس ءتارتىبى ۇنايدى. ۇنەمى باسشىمەن بايلانىس ورتانىپ، ەسەپ بەرىپ، بەلگىلى ءبىر ۋاقىت ارالىعىندا ءبىر ورىندا تاپجىلماي جۇمىس ىستەۋ، تاعىسىن تاعىلار... مىنە، بۇلار ماعان مۇلدە ىڭعايسىزدىق تۋدىرادى. كەرىسىنشە، زامانعا ساي وز-وزىمە باسشى بولىپ، ونلاين جۇمىس ىستەۋ ءتيىمدى ءارى ىڭعايلى»، – دەيدى انەل.
ونلاين جۇمىس وعان بارلىق ۋاقىتتا ءوز جوسپارىن قۇرىپ، ۋاقىتىڭدى قالاي وتكىزۋ كەرەكتىگىن ءوزىڭ شەشۋگە مۇمكىندىك بەرەدى. وسىلايشا انەل ءوز جۇمىسىندا تولىق ەركىندىككە يە بولعان الماتىلىق جاستاردىڭ ءبىرى. جەكە ومىرىنە ۋاقىت قالدىرۋدى، ءاردايىم وزىنە ءۇڭىلىپ، جاڭا يدەيالارمەن جۇمىس ىستەۋ – بۇگىنگى جاس بۋىننىڭ قالاۋى.
ءبىز سۇحباتتاسقان وسى كەيىپكەرلەرىمىز ونلاين جۇمىستىڭ مۇمكىندىكتەرىن كوبىرەك پايدالانۋعا كەڭەس بەرەدى. ولار ءۇشىن ونلاين جۇمىس – تەك تابىس تابۋ عانا ەمەس، ءومىر ساپاسىن ارتتىرۋدىڭ ماڭىزدى جولى. ءبىراق ءداستۇرلى جۇمىس ستيلىمەن ۇيلەسىم تابۋدىڭ دا ماڭىزدى ەكەنىن مويىندايدى.
ولار – جاڭا ماماندىق يەسى، ءبىزدىڭ زامانداستارىمىز، اينالامىزداعى ادامدار، الماتىلىقتار. ءومىر ءسۇرۋ مەن جۇمىس ىستەۋ اراسىنداعى تەڭگەرىمدى دۇرىس تاپقان جاڭا بۋىن وكىلدەرى دەسەك تە بولادى. وسىعان قاراپ ونلاين ءداۋىر ەسىپ قاعىپ تۇرعانىن كورسەك بولادى.