الماتى تەلەكوممۋنيكاسيا جانە ماشينا جاساۋ كوللەدجىندە دۋالدى ءبىلىم بەرۋ جۇيەسى بويىنشا ءبىلىم الۋشىلاردىڭ سانى بۇگىندە 560-قا جەتىپ وتىر.
كوللەدج مەكتەپ وقۋشىلارىنا جۇمىسشى ماماندىعىن ناسيحاتتاۋ ماقساتىندا كاسىبي باعدار بەرۋ جۇمىسىن جاڭا فورماتقا كوشىرۋدى باستادى. دەمەك، بۇل وندىرىستىك وقىتۋ كەزىندە العاشقى كۇننەن باستاپ تالىمگەردىڭ باقىلاۋىمەن جۇمىس داعدىسى قالىپتاسقان بىلىكتى مامان دايارلاۋعا باعىتتالعان جۇمىس ءوز دەڭگەيىندە ۇيىمداستىرىلىپ جاتقانىن بايقاتسا كەرەك. بولاشاقتىڭ نەگىزگى قۇرىلىسشىسى – جۇمىسشى ماماندىعىن ناسيحاتتاۋ ارقىلى ايانباي ەڭبەك ەتىپ، ەلىمىزدىڭ ينفراقۇرىلىمىنىڭ دامۋىن قامتاماسىز ەتىپ جۇرگەن ۇستازدار ەڭبەگىن دارىپتەۋ – ءبىزدىڭ الدىمىزدا تۇرعان ۇلكەن مىندەتتەردىڭ ءبىرى.
مەكتەپ ءبىتىرۋشى تۇلەكتەردىڭ بولاشاق ماماندىعىن تاڭداپ، تولىقتاي زەردەلەۋى ءۇشىن كاسىپورىندارعا ەكسكۋرسيالار جاساپ، ءوزىن مامان رەتىندە سەزىنۋىنە ىقپال ەتۋ ماڭىزدى. الماتى قالاسىنىڭ «قازپوشتا» اكسيونەرلىك قوعامىندا وتكىزىلىپ كەلە جاتقان «دۋبلەر كۇنى» ءىس-شاراسىنا قاتىسقان وقۋشىنىڭ پوشتا سالاسىنا دەگەن قىزىعۋشىلىعى ويانارى ءسوزسىز، ول سالا قىزمەتىنىڭ قىر-سىرىن ءتۇسىنىپ، ءتۇيسىنىپ، بولاشاق ماماندىعىن تاڭداۋعا مۇمكىندىك الادى.
كوللەدج ۇجىمىنىڭ ەلىمىزدەگى پوشتا بايلانىسى سالاسىنىڭ دامۋىنا قوسقان ۇلەسى زور. قازىرگى تاڭدا «راديوتەحنيكا، ەلەكترونيكا جانە تەلەكوممۋنيكاسيا» ماماندىعى بويىنشا عالامتور تارتۋ ءۇشىن قولدانىلاتىن تالشىقتى وپتيكالىق كابەلدى دانەكەرلەۋ باعدارى تىكەلەي سەرىكتەسىمىز – «قازاقتەلەكوم» اكسيونەرلىك قوعامى تاراپىنان جوعارى باعاعا يە. اتالمىش ماماندىق سيفرلىق ترانسفورماسياعا باعىتتالعان ەكونوميكانىڭ بارلىق سالاسىندا جوعارى سۇرانىسقا يە.
جاستار ءۇشىن ۇلكەن مۇمكىندىك
جاقىندا كاسىپتىك-تەحنيكالىق ءبىلىم بەرۋ جۇيەسىن ترانسفورماسيالاۋ ماقساتىندا 16 ينجەنەرلىك-پەداگوگيكالىق كادرىمىز گەرمانيا، وڭتۇستىك كورەيا، جۇڭگو، برازيليا مەملەكەتتەرىندە بولىپ، تاعىلىمدامادان ءوتىپ قايتتى. ولار الەمدىك دەڭگەيدەگى عىلىم مەن تەحنيكا سالاسىندا بولىپ جاتقان جاڭا تەحنولوگيالاردى يگەرىپ، ءوز بىلىمدەرىن جەتىلدىرىپ كەلدى. ءقازىر سول تاجىريبەنى وزدەرىنىڭ باعدارلامالارىنا ەنگىزىپ، وقۋ پروسەسىندە قولدانىپ جاتىر.
وتكەن جىلى الماتى قالاسى اكىمشىلىگى مەن ءبىلىم باسقارماسى كورسەتكەن قولداۋدىڭ ارقاسىندا 80 جىلدان استام تاريحى بار كوللەدجدىڭ ەسكى عيماراتى تولىقتاي ءسۇرىلىپ، ورنىنا جاڭا عيمارات بوي كوتەرگەن ەدى. ءساتىن سالسا، بولاشاق جۇمىسشى ماماندىقتارى وكىلدەرى ماتەريالدىق-تەحنيكالىق بازامەن جابدىقتالعان جاڭا وقۋ كابينەتتەرى، شەبەرحانالارى مەن جاتاقحاناسى بار زاماناۋي ءبىلىم ورداسىندا وقيتىن بولادى. بۇل – مەملەكەتىمىزدىڭ جاستار ءۇشىن جاساپ وتىرعان ۇلكەن مۇمكىندىكتەرىنىڭ ءبىرى.