باكۋدا قازاقستان-ازەربايجان ساراپتامالىق كەڭەسىنىڭ ءۇشىنشى وتىرىسى ءوتتى
2024 جىلعى 13 ناۋرىزدا ازەربايجاننىڭ جەتەكشى تالداۋ ورتالىعى – حالىقارالىق قاتىناستاردى تالداۋ ورتالىعىندا (حقتو) قازاقستان-ازەربايجان ساراپتامالىق كەڭەسىنىڭ ءۇشىنشى وتىرىسى ءوتتى، دەپ حابارلايدى almaty-akshamy.kz
ءىس-شاراعا قازاقستاننىڭ ازەربايجانداعى ەلشىسى ءالىم بايەل، قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ، حقتو ءتوراعاسى ەلشى فاريد شافييەۆ، ديپلوماتتار، ازەربايجاننىڭ ساياساتتانۋ، حالىقارالىق قاتىناستار جانە ەكونوميكا سالاسىنداعى جەتەكشى ساراپشىلارى، سونداي-اق ب ا ق وكىلدەرى قاتىستى. كەزدەسۋدە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قازاقستان مەن ازەربايجان پارلامەنتارالىق ىنتىماقتاستىق توبىنىڭ جەتەكشىسى ايدوس سارىم، قولدانبالى ەتنوساياسي زەرتتەۋلەر ينستيتۋتىنىڭ ديرەكتورى تالعات قالييەۆ جانە تۇركى اكادەمياسىنىڭ باس ساراپشىسى تيمۋر كوزىريەۆ بەينەكونفەرەنسبايلانىس ارقىلى قوسىلىپ، ءسوز سويلەدى.
وتىرىس بارىسىندا ساراپشىلار 2024 جىلعى 11-12 ناۋرىزدا باكۋ، فيزۋلي جانە شۋشا قالالارىندا وتكەن قازاقستان رەسپۋبليكاسىنىڭ پرەزيدەنتى ق.ك. توقايەۆتىڭ ازەربايجانعا ەكى كۇندىك مەملەكەتتىك ساپارىنىڭ ناتيجەلەرىنە جوعارى باعا بەردى. كەزدەسۋدە ەكىجاقتى ساياسي ديالوگتىڭ جوعارى دەڭگەيى بارلىق سالالار بويىنشا ىنتىماقتاستىقتىڭ وسۋىنە ىقپال ەتىپ وتىرعاندىعى، سونداي-اق ەنەرگەتيكا جانە كولىك سالاسىنداعى ءبىرقاتار بىرلەسكەن ستراتەگيالىق جوبالاردى ىسكە اسىرۋعا سەرپىن بەرىپ وتىرعاندىعى ايتىلدى.
وسى تۇرعىدا ءالىم بايەل ترانسكاسپيي حالىقارالىق كولىك باعىتى (تحكب)، كاسپيي تۇبىمەن تالشىقتى-وپتيكالىق بايلانىس جەلىسىن (توبج) تارتۋ، قازاقستاندىق مۇناي مەن ۋراندى ازەربايجان اۋماعى ارقىلى ەكسپورتتاۋ سياقتى وڭىرلىك ماڭىزى بار ءىرى جوبالاردىڭ تابىستى جۇزەگە اسىرىلىپ جاتقانىن اتاپ ءوتتى. ديپلومات ورتالىق ازيادان ەۋروپاعا ازەربايجان ارقىلى ەلەكتر ەنەرگياسىن ەكسپورتتاۋ پەرسپەكتيۆالارىنىڭ تالقىلانا باستالعانىنا نازار اۋداردى. سونىمەن قاتار، ءا. بايەل باستاپقى سوماسى 300 ملن. اقش دوللارى بولاتىن بىرلەسكەن ينۆەستيسيالىق قور قۇرۋ تۋرالى شەشىمدى ساپاردىڭ جاڭالىعى رەتىندە اتاپ ءوتتى. ەلشى پرەزيدەنت توقايەۆتىڭ قازاق-ازەربايجان قاتىناستارىنىڭ ستراتەگيالىق جانە وداقتاس دەڭگەيگە شىققانى تۋرالى مالىمدەمەسىنە نازار اۋداردى. ءا. بايەل قازاق-ازەربايجان قاتىناستارىنىڭ ءارتۇرلى اسپەكتىلەرى جونىندە ساراپتامالىق ماتەريالدار جيناعىن ازىرلەۋدى ۇسىندى.
ساراپشىلار تۇركى مەملەكەتتەرى ۇيىمىنىڭ جاھاندىق سالماعىنىڭ ارتقانىن جانە وسى ۇيىمعا مۇشە ەلدەر اراسىنداعى ينتەگراسيالىق پروسەستەردىڭ جەدەلدەگەنىن اتاپ ءوتتى. فاريد شافييەۆ قازاقستان تەك سوزبەن عانا ەمەس، ءىس جۇزىندە دە ازەربايجانعا ءوزىنىڭ اۋماعىن قالپىنا كەلتىرۋ ماسەلەسىندە جان-جاقتى قولداۋ كورسەتىپ وتىرعانىن اتاپ ءوتتى. «قازاقستان پرەزيدەنتى قاسىم-جومارت توقايەۆتىڭ ەكى كۇندىك ساپارى اياسىندا شۋشاعا بارۋى، سونداي-اق فيزۋلي قالاسىندا سالىنعان قۇرمانعازى اتىنداعى بالالار شىعارماشىلىعى ورتالىعىنىڭ اشىلۋى بوساتىلعان جەرلەردە جۇرگىزىلىپ جاتقان قالپىنا كەلتىرۋ-قۇرىلىس جۇمىستارىنا اشىق قولداۋ كورسەتۋ بولىپ تابىلادى»، - دەپ ايتتى ف.شافييەۆ.
سونىمەن قاتار، كەزدەسۋ اياسىندا ەنەرگەتيكالىق، كولىك-لوگيستيكالىق ىنتىماقتاستىق، عىلىمي-ساراپتامالىق كووپەراسيا، مادەني-گۋمانيتارلىق بايلانىستار جانە جاستار ساياساتى ماسەلەلەرى بويىنشا ساراپشىلاردىڭ پىكىرلەرى تىڭدالدى.