«قايىرىمدىلىق»كۇنىنە وراي كوممۋنالدىق قىزمەتكەرلەرگە ىستىق تاماق، شاي تاراتىلدى، دەپ حابارلايدى Almaty-akshamy.kz
بۇل كۇن ەلىمىزدىڭ حالقىن مەيىرىمدىلىك پەن تاتۋ كورشىلىككە شاقىرادى. مۇقتاج جاندارعا قول ۇشىن سوزۋ، كىمگە بولسىن قۇشاعىن جايىپ، قوناقجايلىق كورسەتۋ – قازاقتىڭ قانىندا بار قاسيەت.
ناۋرىزدى مەرەكەلەۋ كەزىندە بۇل قاسيەتتەردى بارىنشا كەڭىنەن ناسيحاتتاۋ، ونىڭ ءقادىرىن ارتتىرۋ اسا ماڭىزدى. ويتكەنى كوشپەندىلەر مادەنيەتىندە ءوزارا كومەك، جاناشىرلىق پەن قامقورلىق كەز كەلگەن قيىندىقتى جەڭىپ، ماقسات-مۇراتقا جەتۋدىڭ تەتىگى بولعان.
«الماتى قالاسىنىڭ كورىكتى، تازا، تۇرعىنداردىڭ ءومىر سۇرۋىنە قولايلى بولۋىنا ءوز ۇلەسىن قوسىپ جۇرگەن ادامدارعا العىسىمىز شەكسىز. بۇل ەڭبەككەرلەر تاڭ اتىسىمەن جۇمىسقا كىرىسىپ، كۇن باتقانعا دەيىن ءوز جۇمىستارىن ادال اتقارادى. اينالىسىپ جۇرگەن ىستەرى وتە جاۋاپتى، اۋىر. سوعان قاراماستان اۋلا سىپىرۋشىلار قوعامىمىزعا يگىلىكتى ىسىمەن پايدا كەلتىرىپ، الماتى قالاسىنىڭ كوركەيۋىنە ءوز ۇلەستەرىن قوسىپ ءجۇر. بۇگىن №167 جالپى ءبىلىم بەرەتىن مەكتەپ ۇجىمى "قايىرىمدىلىق جاساۋ" كۇنىنە وراي «الماتى تازالىق» كوممۋنالدىق مەملەكەتتىك كاسىپورنى جۇمىسشىلارىنا تابىستى ەڭبەك، باقىت، دەنسايلىق تىلەي وتىرىپ، ىستىق تاماقپەن قامتاماسىز ەتۋدى شەشتى. ءار ادام ءبىزدىڭ ءومىرىمىزدى اسەمدەندىرىپ جۇرگەن جاندارعا قامقورلىقپەن، قۇرمەتپەن قاراسا، وسىنداي يگىلىكتى شارالار اتقارىپ وتىرسا، ءومىرىمىز ءماندى، قالامىز كوركەم بولا تۇسەرى انىق. شىلدەنىڭ ىستىعىنا، قاڭتار مەن اقپاننىڭ اق قار، كوك مۇز ايازىنا قاراماستان ءوز ەڭبەگىمەن ءبىزدىڭ ءومىرىمىزدى جەڭىلدەتىپ، قالامىزدىڭ تازا بولۋىن قامتاماسىز ەتىپ جۇرگەن جاندارعا العىسىمىز شەكسىز»،- دەيدى №167 جالپى ءبىلىم بەرەتىن مەكتەپ ديرەكتورى عاليا نالىبايەۆا.