1 ناۋرىزدا قازاقستاندا وڭىرلىك كادر رەزەرۆتەرىنە ىرىكتەۋ باستالادى.
ىرىكتەۋگە جوعارى ءبىلىمى جانە كەمىندە 3 جىل جۇمىس ءوتىلى بار 35 جاستان اسپاعان قازاقستان ازاماتتارى قاتىسا الادى، دەپ حابارلايدى Almaty-akshamy.kz
قازاقستان رەسپۋبليكاسىنىڭ پرەزيدەنتى تاعايىنداعان ادامدار، ساياسي قىزمەتشىلەر، «ا» كورپۋسىنىڭ مەملەكەتتىك اكىمشىلىك قىزمەتشىلەرى، پرەزيدەنتتىك جاستار كادر رەزەرۆىنە الىنعان ادامدار وڭىرلىك رەزەرۆكە ىرىكتەۋگە قاتىسا المايدى.
وڭىرلىك رەزەرۆكە الىناتىن كانديداتتاردىڭ سانىن، سالالىق باعىتتاردى وڭىرلىك كادر كوميسسيالارى وڭىردەگى الەۋمەتتىك-ەكونوميكالىق جاعدايدى جانە مەملەكەتتىك باسقارۋ جۇيەسىن دامىتۋدىڭ باسىمدىقتارىن ەسكەرە وتىرىپ، ايقىندايدى.
ىرىكتەۋ بىرنەشە كەزەڭنەن تۇرادى جانە 2024 جىلدىڭ 1 ناۋرىزىنان ماۋسىم ايىنىڭ سوڭىنا دەيىن جالعاسادى.
رەزەرۆتە بولۋ مەرزىمى – 2 جىل. وسى كەزەڭدە رەزەرۆشىلەر سايلاناتىن لاۋازىمداردى قوسپاعاندا، جەرگىلىكتى اتقارۋشى ورگانداردا «ب» كورپۋسىنىڭ مەملەكەتتىك اكىمشىلىك لاۋازىمدارىنا زاڭنامادا بەلگىلەنگەن تارتىپپەن تاعايىندالۋى مۇمكىن.
سايتتا قالاي تىركەلۋگە بولادى؟
ىرىكتەۋگە قاتىسۋ ءۇشىن ا.ج. 1 ناۋرىزىنان 31 ناۋرىزىنا دەيىن onir.pkrezerv.gov.kz ونلاين-پلاتفورماسىندا جەكە دەرەكتەردى كورسەتۋ ارقىلى تىركەلۋ قاجەت. قۇجاتتاردى قاعاز جەتكىزگىشتە نەمەسە ەلەكتروندىق تۇردە ۇسىنعان كانديداتتار دا ونلاين-پلاتفورمادا تىركەلىپ، قۇجاتتاردى تاپسىرعاننان كەيىن ءبىر جۇمىس كۇنى ىشىندە، ءبىراق حابارلاندىرۋدا كورسەتىلگەن قۇجاتتاردى قابىلداۋدىڭ سوڭعى كۇنىنەن كەشىكتىرمەي قۇجاتتاردى جۇكتەيدى.
«جەكە دەرەكتەر» بولىمىندە دۇرىس بايلانىس دەرەكتەرىن كورسەتۋمەن قاتار، ۇمىتكەرلەر كادر رەزەرۆىنىڭ ءوڭىرىن جانە سالالىق باعىتتى تاڭداۋى قاجەت. ەكى جانە ودان دا كوپ وڭىرلىك رەزەرۆتى نەمەسە سالالىق باعىتتاردى تاڭداۋعا، سونداي-اق وڭىرلىك رەزەرۆتى نەمەسە سالالىق باعىتتى قايتا تاڭداۋعا جول بەرىلمەيدى.
ءساتتى تىركەلۋ ءۇشىن ىرىكتەۋگە قاتىسۋشىلارعا بەلگىلەنگەن تالاپتاردى ساقتاۋ، ۇسىنىلعان مالىمەتتەر مەن قۇجاتتاردىڭ دۇرىستىعىن قامتاماسىز ەتۋ بويىنشا مىندەتتەمەلەر قابىلداۋ قاجەت. بارلىق قاجەتتى فايلدار جۇكتەلۋى كەرەك.
جوباعا قاتىسۋ ءۇشىن قانداي قۇجاتتار قاجەت؟
وڭىرلىك رەزەرۆكە ىرىكتەۋگە قاتىسقىسى كەلەتىن ازاماتتار كەلەسى قۇجاتتاردى قوسىپ ءوتىنىش بەرۋ كەرەك:
- قازاقستان رەسپۋبليكاسى جەكە كۋالىگىنىڭ نەمەسە پاسپورتىنىڭ كوشىرمەسى؛
- بiلiمi تۋرالى قۇجاتتاردىڭ جانە ولارعا قوسىمشالاردىڭ كوشiرمەلەرi؛
- سوڭعى جۇمىس ورنى بويىنشا كادر قىزمەتى كۋالاندىرعان، ەڭبەك قىزمەتىن راستايتىن قۇجاتتىڭ كوشىرمەسى.
وڭىرلىك رەزەرۆكە ىرىكتەۋ كەلەسى كەزەڭدەردەن تۇرادى:
1) كانديداتتاردىڭ قۇجاتتارىن قابىلداۋ (1 ناۋرىزدان 31 ناۋرىزعا دەيىن)؛
2) زاڭنامانى بىلۋگە (5 ساۋىردەن 9 ساۋىرگە دەيىن) تەستىلەۋ جانە جەكە قاسيەتتەرىن باعالاۋ (13 ساۋىردەن 14 ساۋىرگە دەيىن)؛
3) قۇزىرەتتەردى باعالاۋ (22 ساۋىردەن 7 ماۋسىمعا دەيىن)؛
4) وڭىرلىك كوميسسياداعى قۇرىلىمدىق سۇحبات (13 ماۋسىمنان 15 ماۋسىمعا دەيىن)؛
5) وڭىرلىك كوميسسيانىڭ وتىرىسىندا وڭىرلىك رەزەرۆكە الۋعا ۇسىنىلعان كانديداتۋرالاردى قاراۋ (15 ماۋسىمنان 17 ماۋسىمعا دەيىن).
ءبىرىنشى كەزەڭگە قالاي جازىلۋعا بولادى؟
ءبىرىنشى كەزەڭ «زاڭنامانى بىلۋگە تەستىلەۋگە» جازىلۋ تاپسىرىلعان ءوتىنىمنىڭ قابىلدانعانىن راستايتىن حابارلامانى العان ساتتەن باستاپ 2024 جىلدىڭ 31 ناۋرىزى ساعات 23:59-عا دەيىن قولجەتىمدى بولادى.
كەرى بايلانىس
تىركەلۋ كەزىندە تۋىنداعان سۇراقتار بويىنشا ۇمىتكەرلەر onir.pkrezerv.gov.kz سايتىنداعى Jivo چاتى ارقىلى تاۋلىك بويى قولداۋ قىزمەتىنە، كونسۋلتاسيا الۋ ءۇشىن ساعات 9:00-دەن 18:30-گە دەيىن 7 7172 96-77-77 تەلەفونى (ىشكى ءنومىر - 3) جانە info@pkrezerv.gov.kz ەلەكتروندىق پوشتاسىنا حابارلاسا الادى.
سونداي-اق onir.pkrezerv.gov.kz پلاتفورماسىنىڭ «بايلانىس» بولىمىندە وڭىرلىك كادر رەزەرۆى بويىنشا وڭىرلەردەگى جاۋاپتى مامانداردىڭ بايلانىس دەرەكتەرى كورسەتىلگەن.