بۇگىنگى تاڭدا توتەنشە جاعدايلار، سونىڭ ىشىندە تابيعي اپاتتار ءقاۋپى – قوعامدى الاڭداتىپ وتىرعان باستى ماسەلەلەردىڭ ءبىرى.
وسى ورايدا الماتى قالاسى جاستار ساياساتى باسقارماسى مەن توتەنشە جاعدايلار دەپارتامەنتى بىرلەسىپ، قالامىزداعى جوعارى وقۋ ورىندارىنىڭ پروفەسسورلىق-وقىتۋشىلىق قۇرامى مەن ستۋدەنتتەرىن سەيسميكالىق قاۋىپسىزدىك تۋرالى اقپاراتتاندىرۋ جۇمىستارىن باستادى، دەپ حابارلايدى Almaty-akshamy.kz
لوگيستيكا جانە كولىك اكادەمياسىندا تجد ازاماتتىق قورعانىس باسقارماسىنىڭ اعا وفيسەرى، مايور ساندۋعاش بايمۇحامبەتوۆامەن وتكەن كەزدەسۋدە توتەنشە جاعدايلارداعى قاۋىپسىزدىك شارالارى پىسىقتالدى. ساندۋعاش امانتاي قىزى الماتىلىقتار تاپ بولۋى مۇمكىن بارلىق توتەنشە جاعدايلار تۋرالى تولىق پايدالى اقپارات بەردى.
– توتەنشە جاعدايلار، تابيعي اپاتتار قوعامداعى ءار ازاماتتىڭ ومىرىنە جانە ونىڭ ماتەريالدىق شىعىندارىنا اكەپ سوعادى. ازاماتتاردىڭ قاۋىپسىزدىگىن ساقتاۋ ءۇشىن ازاماتتىق قورعاۋ قىزمەتتەرىنىڭ دايىندىقتا بولۋىن تالاپ ەتەدى. سوعان وراي، ازاماتتارىمىز، سونىڭ ىشىندە جاستارىمىز ءوزىن-وزى قورعاي الاتىنداي توتەنشە جاعدايعا دايىن بولۋىن قامتاماسىز ەتۋىمىز كەرەك. سوندىقتان وسىنداي اقپاراتتاندىرۋ شارالارىنىڭ ءوتۋى وتە ماڭىزدى ، - دەيدى تجد وكىلى ساندۋعاش امانتاي قىزى.
سونداي-اق، ءىس-شارادا تابيعي اپات نەمەسە ادامداردىڭ قاتەلىگىنەن بولاتىن ءورتتىڭ بەتىن قايتارۋعا دايىندىق، العاشقى مەديسينالىق جانە پسيحولوگيالىق كومەك كورسەتۋ بويىنشا ماسەلەلەر ءتۇسىندىرىلدى. اقپاراتتاندىرۋ جۇمىستارىنىڭ العاشقى كۇندەرى قالامىزدىڭ 20 جوو-نان 1000-عا جۋىق ادام قاتىستى. قالعان وقۋ ورىندارىندا اتالمىش شارا 5 ناۋرىزعا دەيىن جالعاسىپ، جالپى 2000-عا جۋىق ادام قاتىسادى دەپ جوسپارلانۋدا.
الماتى قالاسى جاستار ساياساتى باسقارماسى قالا جاستارىنا جەر سىلكىنىسى كەزىندەگى ەرەجەلەر مەن العاشقى كومەك بويىنشا اقپاراتتى سيفرلاندىرۋدى جوسپارلاپ وتىر. بۇل تۋرالى باسقارما باسشىسى قايىرجان مەڭدىعالييەۆ ايتتى.
– ءبىز الماتى قالاسىنىڭ توتەنشە جاعدايلار دەپارتامەنتىمەن بىرلەسىپ، قالا تۇرعىندارىن سەيسميكالىق قاۋىپسىزدىك تۋرالى اقپاراتتاندىرۋ جۇمىستارىن جەڭىلدەتۋ ءۇشىن، جەر سىلكىنىسى كەزىندەگى ەرەجەلەر مەن العاشقى كومەك بويىنشا ارنايى ءبىلىم بەرۋ باعدارلاماسىن سيفرلاندىرىپ، قىسقا مەرزىمدى كۋرس ارقىلى jasalmaty.kz اقپاراتتىق پورتالىنا ورنالاستىرۋدى جوسپارلاپ وتىرمىز. جاستاردى كەڭىنەن اقپاراتتاندىرۋ ءۇشىن ونلاين كۋرستى ىسكە قوساتىن بولامىز. سەبەبى ءاربىر جاس الماتىلىق جەر سىلكىنىسى كەزىندەگى العاشقى قادامدى ءبىلۋ قاجەت، - دەدى ءوز سوزىندە جاستار ساياساتى باسقارماسىنىڭ باسشىسى قايىرجان مەڭدىعالييەۆ.
سونىمەن قاتار، الداعى ۋاقىتتا قالامىزداعى 8 كوميۋنيتي ورتالىعىندا جاستارعا قاۋىپسىزدىك شارالارىن ءتۇسىندىرۋ جۇمىستارى بويىنشا ءبىرقاتار ءىس-شارالار ۇيىمداستىرىلاتىن بولادى.