Almaty-akshamy.kz سايتىنىڭ بۇگىنگى جاڭالىقتارىنا شولۋ – كۇن كەرۋەنى
العىس ايتۋ كۇنىندەگى العىس
قازاقستاندى كوركەيتۋگە ءوز ۇلەسىن قوسىپ جۇرگەن ازاماتتارعا مەملەكەت باسشىسى العىس ايتتى.
بۇگىن – ەلىمىزدە العىس ايتۋ كۇنى.
مەملەكەت باسشىسى قاسىم-جومارت توقايەۆ قازاقستان حالقىن العىس ايتۋ كۇنىمەن قۇتتىقتادى.
«بۇل – بەرەكە-بىرلىگىمىزدى بەكەمدەي تۇسەتىن مەرەكە. وسى كۇنى ەلىمىزدىڭ ازاماتتارى بىر-بىرىنە ەرەكشە ءىلتيپات كورسەتىپ، ريزاشىلىعىن بىلدىرەدى. سونداي-اق تاتۋلىق، ىنتىماق، دوستىق سىندى قاستەرلى قۇندىلىقتار جان-جاقتى دارىپتەلەدى. مۇنىڭ ءبارى ۇلتتى ۇيىستىرۋدىڭ ۇتىمدى جولى ەكەنى ءسوزسىز»، دەدى قاسىم-جومارت توقايەۆ.
مەملەكەتتىك كۇزەتكە كىم جارامدى؟
2024 جىلعى 1 ناۋرىز بەن 5 ءساۋىر ارالىعىندا ق ر مكق وكىلدەرى بارلىق وبلىس ورتالىقتارى مەن رەسپۋبليكالىق ماڭىزى بار قالالاردا ۇمىتكەرلەردى تاڭداۋ جانە زەردەلەۋ جۇرگىزەدى.
ۇمىتكەرلەرگە مىناداي تالاپتار قويىلادى: جاسى 18-27 اراسىندا، بويى 180 سم-دەن تومەن ەمەس جانە 195 سم-دەن جوعارى ەمەس، ءبىلىمى ورتا بىلىمنەن تومەن ەمەس، دەنساۋلىعى جاقسى. جوعارى ءبىلىمدى، سپورتتىق جەتىستىكتەرى مەن رازريادى بار شاقىرىلۋشىلارعا باسىمدىق بەرىلەدى.
توقايەۆ بەكتەنوۆتى قابىلدادى
مەملەكەت باسشىسى پرەمەر-مينيستر ولجاس بەكتەنوۆتى قابىلدادى. پرەمەر-مينيستر ەلىمىزدىڭ قازىرگى الەۋمەتتىك-ەكونوميكالىق جاعدايى جانە ەكونوميكانىڭ ءوسىمىن قامتاماسىز ەتۋ جوسپارى تۋرالى باياندادى.
قاسىم-جومارت توقايەۆ ەلىمىزدى الەۋمەتتىك-ەكونوميكالىق تۇرعىدان ودان ءارى دامىتۋ جونىندە ءبىرقاتار تاپسىرما بەردى.
اسپاندا اداسقان
FlyArystan ۇشاعى باسقا ۇشاقپەن سوقتىعىسا جازدادى.
الماتىعا بەت العان FlyArystan ۇشاعى مۋمباي اۋەجايىنىڭ ۇشۋ-قونۋ جولاعىندا Air India اۋە كومپانياسىنىڭ Airbus A319 ۇشاعىمەن سوقتىعىسىپ قالا جازدادى. بۇقارالىق اقپارات قۇرالدارىنىڭ جازۋىنشا، قازاقستاندىق ۇشاق ۇشۋ-قونۋ جولاعىنا كەزەكتە تۇرۋى كەرەك بولاتىن. الايدا پيلوت ۇشۋ جولاعىن شاتاستىرىپ العان. بۇل ۋاقىتتا Air India اۋە كومپانياسىنىڭ ۇشاعى جىلدامدىق الا باستاعان. الايدا پيلوت FlyArystan بورتىنىڭ قوزعالىسىن بايقاپ، جىلدامدىعىن كۇرت باسەڭدەتىپ، كوككە كوتەرىلمەي، سوققتىعىستىڭ الدىن العان. ءۇندىستان اۆياسياسى وقيعانى تەرگەۋدى باستادى.
5 ميلليارد دوللارلىق ايىپپۇل
ەكولوگياعا كەلتىرگەن زالالى ءۇشىن نكوك كومپانياسىنا سالىنعان. ونى زاڭسىز دەپ، سوتقا شاعىنىپ جۇرگەنگە ۇكىم شىقتى. ەندى كومپانيا 5 ميلليارد دوللار ايىپپۇلدى تولەۋگە ءماجبۇر. ءبىراق نكوك بۇعان دەيىن حالىقارالىق اربيتراج سوتىنا جۇگىنەمىز دەگەن اقپارات تاراتقان بولاتىن. استانادا اپەللياسيالىق سوت القاسى اتىراۋ وبلىستىق ەكولوگيا دەپارتامەنتى قىزمەتكەرلەرىنىڭ قاشاعاندا جۇرگىزگەن تەكسەرىس ناتيجەسىن زاڭدى دەپ تانىدى.
540 ملن تەڭگەنىڭ ەسىرتكىسى
ۇقك استانا قالاسى بويىنشا دەپارتامەنتى استانالىق پروكۋراتۋرانىڭ ۇيلەستىرۋىمەن قالانىڭ ونەركاسىپ ايماعىندا ورنالاسقان سينتەتيكالىق ەسىرتكى ءوندىرۋ بويىنشا جاسىرىن زەرتحانانىڭ جولىن كەستى. اينالىمنان الىنعان ەسىرتكى قۇنى «قارا نارىقتا» 540 ملن تەڭگەگە باعالاندى.
پرەزيدەنت ءماجىلىس ءتوراعاسىن قابىلدادى
ءماجىلىس سوڭعى ەكى ايدا 18 زاڭ قابىلداپ، سەناتتىڭ قاراۋىنا جىبەرگەن. وتباسىلىق-تۇرمىستىق زورلىق-زومبىلىققا قارسى ءىس-قيمىل، سيفرلاندىرۋ، عىلىم، بيزنەس جۇرگىزۋ، مەديسينا قىزمەتكەرلەرىنىڭ جاۋاپكەرشىلىگىن ساقتاندىرۋ، ترانسفەرتتىك باعا بەلگىلەۋ، حالىقتىڭ كوشى-قون ماسەلەلەرى سەكىلدى قۇقىقتىق نورمالارعا تۇزەتۋلەر ەنگىزىلگەن.
«جەر اماناتى» جوباسى اياسىندا ەكى جىل ىشىندە 10 ميلليون گەكتاردان استام جەر مەملەكەتكە قايتارىلعان. قاڭتار-اقپان ايلارىندا «قارىزسىز قوعام» جوباسى بويىنشا 15 مىڭ ادام قارجىلىق ساۋاتتىلىقتى ارتتىرۋ كۋرسىنان وتكەن. جىل سوڭىنا دەيىن تاعى دا 750 مىڭ ازاماتتى وقىتۋ جوسپارلانىپ وتىر.
10 مىڭ بانكروت
بانكروت دەپ تانىلعان 10 مىڭعا جۋىق قازاقستاندىق ەندى بەس جىلعا دەيىن بانكتەن كرەديت الا المايدى. قازاقستاندا 10 مىڭعا جۋىق ازاماتتىڭ كرەديتى كەشىرىلدى، وسى ماقساتقا شامامەن 20 ميلليارد تەڭگەدەي قارجى جۇمسالدى. ول ازاماتتىڭ قارجى احۋالىنا ءۇش جىل بويى باقىلاۋ جۇرگىزىلەدى. جەتى جىل ىشىندە ءوزىن قايتادان بانكروت دەپ جاريالاي المايدى.