قازاقستانداعى وڭىرلىك بۇقارالىق اقپارات قۇرالدارى ءبىرقاتار ماڭىزدى ماسەلەلەرگە تاپ بولىپ وتىر. بۇل پروبلەمالار گازەت-جۋرنالداردىڭ تارالىمىنا، جۋرناليستەردىڭ الەۋمەتتىك جاعدايىنا جانە جالپى مەديا سالاسىنىڭ دامۋىنا كەرى اسەرىن تيگىزىپ جاتىر، دەپ حابارلايدى aqshamnews.kz.
مادەنيەت جانە اقپارات مينيسترلىگىنىڭ كەڭەيتىلگەن القا وتىرىسىندا دەپۋتات بيبىگۇل جەكسەنباي وڭىرلىك باق-تاردىڭ وزەكتى ماسەلەلەرى مەن شەشۋ جولدارى تۋرالى ءسوز قوزعادى.
دەپۋتات قانداي ماسەلە كوتەردى؟
قاعاز بەن باسپا قىزمەتىنىڭ قىمباتتاۋى
سوڭعى جىلدارى قاعاز باعاسىنىڭ قىمباتتاۋى مەن باسپا شىعىندارىنىڭ ارتۋى وڭىرلىك گازەتتەردىڭ قارجىلىق جاعدايىن قيىنداتتى. بۇل جاعداي مەرزىمدى باسىلىمداردىڭ ءوزىن-وزى اقتاۋىنا ۇلكەن كەدەرگى كەلتىرىپ جاتىر.
جۋرناليستەردىڭ باسپانا ماسەلەسى
بۇرىنعى جىلدارى جۋرناليستەرگە مەملەكەت تاراپىنان باسپانا بەرۋ ءداستۇرى بولعان. الايدا، قازىرگى تاڭدا وڭىرلىك جۋرناليستەر بۇل قولداۋدان تىس قالۋدا. سوڭعى ەكى جىلدا استانادا جۇزدەن استام جۋرناليست پاتەر الدى. وسى تاجىريبە رەسپۋبليكالىق دەڭگەيدە كەڭەيتىلىپ، ايماقتارداعى ب ا ق وكىلدەرىنە دە باسپانا بەرىلسە، ادىلەتتى بولار ەدى.
جۋرناليستەردىڭ كاسىبي بىلىكتىلىگىن ارتتىرۋ
مينيسترلىك تاراپىنان جىل سايىن ب ا ق وكىلدەرىنە ارنالعان وقىتۋ-جەتىلدىرۋ كۋرستارىن ۇيىمداستىرۋ قاجەتتىلىگى تۋىنداپ وتىر. بۇل جۋرناليستەردىڭ زاماناۋي مەدياترەندتەرگە ىلەسىپ، كاسىبي داعدىلارىن دامىتۋىنا مۇمكىندىك بەرەدى.
پوشتا قىزمەتىنىڭ كەمشىلىكتەرى
قازىرگى تاڭدا وڭىرلىك گازەتتەر وقىرماندارعا ۋاقتىلى جەتكىزىلمەي وتىر. گازەتتەردى اپتاسىنا ءبىر رەت توپتاپ جەتكىزۋ ءۇردىسى قالىپتاستى. بۇل وقىرمانداردىڭ مەرزىمدى باسىلىمدارعا دەگەن قىزىعۋشىلىعىن تومەندەتتى.
گازەت-جۋرنال ساتاتىن دۇڭگىرشەكتەردىڭ ازدىعى
بۇرىنعىداي گازەت-جۋرنال ساتاتىن ورىنداردىڭ جەتىسپەۋى حالىقتىڭ باسىلىمدارعا قولجەتىمدىلىگىن شەكتەپ وتىر. دۇڭگىرشەكتەر سانىن ارتتىرۋ – اقپارات قۇرالدارىنىڭ تارالىمىن كوبەيتۋدىڭ بىردەن-بىر جولى.
تارالىمنىڭ ازايۋى
بۇرىن مۇعالىمدەر، مەملەكەتتىك قىزمەتكەرلەر مەرزىمدى باسىلىمدارعا مىندەتتى تۇردە جازىلاتىن. ءقازىر «ماجبۇرلەۋ» جوق دەگەن سەبەپپەن بۇل ءۇردىس توقتاتىلدى. وسى رەتتە جازىلۋدىڭ وركەنيەتتى جولدارىن قاراستىرۋ ماڭىزدى.
قوسىمشا قۇن سالىعى (ققس) ماسەلەسى
قوسىمشا قۇن سالىعىن (ققس) مەرزىمدى باسىلىمداردان مۇلدەم الىپ تاستاۋ نەمەسە ولاردى كرەاتيۆتى يندۋسترياعا جاتقىزىپ، سالىقتىق جەڭىلدىكتەر قاراستىرۋ قاجەت. بۇل شارا وڭىرلىك باق-تىڭ ەكونوميكالىق جاعدايىن جاقسارتۋعا سەپتىگىن تيگىزەر ەدى.
جۋرناليستەردىڭ بلوگەرلىككە كەتۋى
سالاعا ءتيىستى نازار اۋدارىلماۋىنىڭ سالدارىنان كوپتەگەن كاسىبي جۋرناليستەر بلوگەرلىككە اۋىسۋ بەلەڭ العان. سەبەبى بلوگينگتەن تۇسەتىن تابىس پەن ەركىندىك دەڭگەيى جوعارىراق. بۇل ءۇردىس ب ا ق سالاسىنداعى بىلىكتى كادرلاردىڭ ازايۋىنا ىقپال ەتەتىنى ءسوزسىز.
ماسەلەنىڭ شەشىمى قانداي؟
وڭىرلىك باق-تىڭ دامۋى – ەلدەگى اقپاراتتىق قاۋىپسىزدىكتىڭ ماڭىزدى بولىگى. سوندىقتان بۇل ماسەلەلەر مەملەكەتتىك دەڭگەيدە قاراستىرىلىپ، ناقتى شەشىمدەر قابىلدانۋى قاجەت. ەڭ الدىمەن مەملەكەتتىك قولداۋدى كۇشەيتۋ كەرەك. وڭىرلىك باق-قا ارنالعان سالىقتىق جەڭىلدىكتەر ەنگىزۋ ماڭىزدى. پوشتا قىزمەتىن رەتكە كەلتىرىپ، گازەتتەر وقىرماندارعا ۋاقتىلى جەتكىزىلۋى ءتيىس. جۋرناليستەردىڭ الەۋمەتتىك ماسەلەلەرىن شەشۋ، سونىڭ ىشىندە ايماقتىق ب ا ق وكىلدەرىنە باسپانا بەرۋ ماسەلەسىن قاراستىرۋ. دۇڭگىرشەكتەر سانىن كوبەيتۋ ارقىلى گازەت-جۋرنال ساتاتىن ورىنداردىڭ سانىن ارتتىرۋ ارقىلى تارالىمدى ۇلعايتۋ. ب ا ق وكىلدەرىنىڭ كاسىبي دەڭگەيىن ارتتىرۋعا ارنالعان كۋرستاردى جىل سايىن وتكىزۋ، - دەدى بيبىگۇل جەكسەنباي.