مينيسترلىك كادر تاپشىلىعى ماسەلەسىن جۇيەلى تۇردە شەشۋگە كىرىستى
ءبىلىم جانە عىلىم ءمينيسترى اسحات ايماعامبەتوۆ ءمۇعالىم تاپشى وڭىرلەرگە بارعان ۇستازداردىڭ جالاقىسى ەكى ەسە جوعارى بولاتىنىن ايتتى. ءمينيستردىڭ ايتۋىنشا، ءقازىر اتىراۋ، ماڭعىستاۋ، تۇركىستان جانە الماتى وبلىستارىندا ءمۇعالىم تاپشىلىعى قاتتى سەزىلەدى. كادر جەتىسپەۋشىلىگىن شەشۋ ءۇشىن مينيسترلىك ارنايى باعدارلاما قابىلدانىپ، وعان ءتيىستى قارجى ءبولىنىپ جاتىر، دەپ حابارلايدى Almaty-akshamy.kz Elorda.info-عا سىلتەمە جاساپ.
«بىرىنشىدەن، ءمۇعالىم تاپشىلىعى بار وڭىرلەرگە بارعان ارىپتەستەرىمىزدىڭ جالاقىسى ەكى ەسە كوپ بولادى. ءبىراق ولارعا كرى رەتىندە كورسەتكىشتەر قويىلادى. ەكىنشىدەن، ولارعا جۇمىس ىستەگەن ۋاقىتتا باسپانا بەرىلەدى، ءۇيدىڭ كوممۋنالدىق شىعىندارىن مەملەكەت وتەيدى. وسىلايشا ەڭ ۇلكەن تاپشىلىق بار وڭىرلەردەگى ماسەلەنى شەشىپ جاتىرمىز»، - دەدى اسحات ايماعامبەتوۆ ءماجىلىس كۋلۋارىندا.
ونىڭ ايتۋىنشا، قاراجات رەسپۋبلكالىق ترانسفەرتتەر ەسەبىنەن باعىتتالادى.
«ياعني، بۇل – ماقساتتى ترانسفەرتتەر. اقشا جەرگىلىكتى بيۋدجەتكە جىبەرىلەدى. كەيىن ول ارنايى كونكۋرستان ءوتىپ، وڭىرگە ساباق بەرۋگە كەلگەن مۇعالىمدەرگە تولەنەدى»، - دەدى مينيستر.
سونداي-اق ول مۇعالىمدەر تاپشىلىعى وقۋشىلار سانىنىڭ وسۋىنەن بولىپ وتىرعانىن ايتتى.
«ون جىل ىشىندە مەكتەپتە وقيتىن بالالار سانى ءبىر ميلليونعا جۋىق ارتتى. ول دەگەنىمىز مۇعالىمدەر سانى دا ءوسىپ جاتىر دەگەندى بىلدىرەدى. ەندى 2025 جىلعا دەيىن بىزگە تاعى 100 مىڭ ءمۇعالىم قاجەت بولادى. بىزگە جاڭا مەكتەپتەر قاجەت، ال جاڭا مەكتەپتەرگە جاڭا مۇعالىمدەر كەرەك. ءبىر مەكتەپ اشىلعاندا ورتاشا ەسەپپەن 150-200 ءمۇعالىم قاجەت بولادى. سوعان بايلانىستى وسىنداي ماسەلە تۋىنداپ جاتىر»، – دەدى مينيستر.
ونىڭ مالىمدەۋىنشە، كادر تاپشىلىعى ماسەلەسى بۇعان دەيىن دە بولعان. ءقازىر مينيسترلىك پروبلەمانى جۇيەلى تۇردە شەشۋگە كىرىسكەن.