وقۋ-اعارتۋ مينيسترلىگى ءاربىر بالانىڭ قاۋىپسىزدىگىن قامتاماسىز ەتۋ ماقساتىندا زورلىق-زومبىلىقتان زارداپ شەككەن بالالارعا كومەك كورسەتۋ باعدارلاماسىن ازىرلەدى، دەپ حابارلايدى almaty-akshamy.kz.
ماقسات - زورلىق-زومبىلىققا، قاتىگەزدىككە، بۋللينگكە ۇشىراعان، سونداي-اق قىلمىسقا كۋا بولعان بالالارعا كەشەندى كومەك كورسەتۋ. باعدارلاما بالالاردىڭ ەموسيالىق، كوگنيتيۆتىك جانە مىنەز-قۇلقىنداعى سالدارلاردى ەڭسەرۋگە باعىتتالعان.
باستاما بالالارعا كومەك كورسەتۋ الگوريتمىن جانە كامەلەتكە تولماعانداردىڭ قاجەتتىلىكتەرىن باعالاۋ نەگىزىندە مەديسينالىق، پسيحولوگيالىق، پەداگوگيكالىق، الەۋمەتتىك جانە قۇقىقتىق كومەك كورسەتۋ تۇرلەرىنىڭ كەشەنىن قامتيدى. سونداي-اق باعدارلاما شەڭبەرىندە بالالار مەن ولاردىڭ اتا-انالارىنا پسيحولوگيالىق كومەك كورسەتۋ بويىنشا ءبىرىڭعاي ادىستەمەلىك ۇسىنىمدار ازىرلەندى.
«ءاربىر بالا زورلىق-زومبىلىقتان قورعالۋى ءتيىس. وسى باستامانىڭ قابىلدانۋى مەملەكەت پەن قوعامنىڭ بالا قۇقىعىن قورعاۋ جانە ءاربىر بالانىڭ ءقاۋىپسىز بالالىق شاعىن قامتاماسىز ەتۋدەگى مىندەتتەمەسىنىڭ كورىنىسى. بۇل باعدارلاما بالالارعا زارداپ سالدارىمەن كۇرەسۋ جانە پسيحولوگيالىق تۇرعىدا قولداۋ جۇيەسىن قۇرۋداعى ماڭىزدى قادام بولىپ تابىلادى»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى يۋليا وۆەچكينا.
ايتا كەتەيىك، كومەك كورسەتۋ وبلىستىق دەڭگەيدە پسيحولوگيالىق قولداۋ ورتالىقتارىنىڭ، اۋداندىق دەڭگەيدە ءبىلىم بولىمدەرىنىڭ بازاسىندا ىسكە اسىرىلادى.