بۇل شارا قازاقستاننىڭ ءىرى ساۋدا جەلىلەرىندە الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تومەندەتۋگە مۇمكىندىك بەرەدى
قازاقستان وڭىرلەرىندە جەرگىلىكتى اتقارۋشى ورگاندار ءىرى ساۋدا جەلىلەرىمەن ساۋدا ۇستەمەسىن 10%-عا دەيىن تومەندەتۋ تۋرالى مەموراندۋمدار جاساسادى، دەپ حابارلايدى Almaty-akshamy.kz ق ر سيم ساۋدا كوميتەتىنىڭ باسپا ءسوز قىزمەتىنە سىلتەمە جاساپ.
ەستەرىڭىزگە سالا كەتەيىك، قازاقستان رەسپۋبليكاسىنىڭ ساۋدا جانە ينتەگراسيا ءمينيسترى سەرىك جۇمانعارين ازىق-تۇلىك قاۋىپسىزدىگىن قامتاماسىز ەتۋ جانە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ اياسىندا سەلەكتورلىق كەڭەس وتكىزدى، وندا الەۋمەتتىك ماڭىزى بار ونىمدەرگە 10% -دان اسپايتىن ساۋدا ۇستەمەسىن ساقتاۋ تۋرالى مەموراندۋمدار جاساسۋ قاجەتتىلىگى تۋرالى ماسەلە قارالدى.
«ءقازىردىڭ وزىندە شىمكەنت، الماتى قالالارىندا، قوستاناي، اقتوبە، اتىراۋ، شىعىس قازاقستان، باتىس قازاقستان، اباي وبلىستارىندا «ماگنۋم»، «سمول»، «انۆار»، «استىقجان» جانە ت.ب. ءىرى ساۋدا جەلىلەرىمەن 40 مەموراندۋم جاسالعان. بۇل شارا قازاقستاننىڭ ءىرى ساۋدا جەلىلەرىندە الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تومەندەتۋگە مۇمكىندىك بەرەدى»، - دەلىنگەن حابارلامادا.
سونىمەن قاتار، ساۋدا كوميتەتى نەگىزگى ازىق-تۇلىك تاۋارلارى باعاسىنىڭ ءوسۋ ديناميكاسىنىڭ دەرەكتەرىن تالداۋدىڭ دۇرىستىعىن ارتتىرۋ ءۇشىن قوعامدىق باقىلاۋدى ەنگىزگەنىن اتاپ وتكەن ءجون: تۇرعىنداردىڭ ءامات تىزبەسىنە كىرەتىن ونىمدەرگە جوعارى باعاعا وتىنىشتەرىن قابىلداۋ ءۇشىن call-ورتالىق قۇرىلدى. شاعىمدار Facebook، Sauda_komiteti جانە sauda_inform Instagram الەۋمەتتىك جەلىلەرىندەگى سيم اككاۋنتتارى ارقىلى دا قابىلدانادى.