ۆيسە-پرەمەر سەرىك ءجۇمانعاريننىڭ توراعالىعىمەن وتكەن ەگىن جيناۋ ناۋقانى بويىنشا جەدەل شتابتا جيىن-تەرىمدى ۇزدىكسىز جۇرگىزۋ ءۇشىن فەرمەرلەردى بارلىق قاجەتتى قۇرالدارمەن قامتاماسىز ەتۋ ماسەلەسى قارالدى.
اۋا رايىنىڭ قولايلى بولۋىنىڭ ارقاسىندا 27 قىركۇيەكتەگى جاعداي بويىنشا نەگىزگى استىق ەگەتىن وڭىرلەردە قازاقستاندا 13 ملن گا جۋىق القاپ نەمەسە 75%-ى جينالدى. ەگىن جيناۋ ناۋقانىن قازان ايىنىڭ سوڭىنا دەيىن اياقتاۋ جوسپارلانعان. الدا – مايلى داقىلداردى جيناۋ جۇرگىزىلۋدە، دەپ حابارلايدى aqshamnews.kz.
ءونىمدى كەپتىرۋ اگرەگاتتارى ءۇشىن ارزانداتىلعان ديزەل وتىنى مەن سۇيىتىلعان گازدى تيەپ، جونەلتۋ جانە 4-سىنىپتى ارپا مەن بيدايدىڭ باعاسى – جەدەل شتاب وتىرىسىندا قارالعان نەگىزگى ماسەلەلەر بولدى.
اۋىل شارۋاشىلىعى ۆيسە-مينيسترى ازات سۇلتانوۆ حابارلاعانداي، 27 قىركۇيەكتە ەليەۆاتورلارعا 3،376 ملن توننا استىق ءتۇستى، ونىڭ 2،476 ملن تونناسى – بيداي. بيدايدىڭ جالپى كولەمىندە 1،4 ملن تونناسى 3-سىنىپتى بيداي (56،2%)، 701،4 مىڭ توننا – 4-سىنىپتى (28،3%)، 263،1 مىڭ توننا – 5-سىنىپتى (10،6%) استىق. قامباعا تۇسكەن ارپانىڭ 95%-عا جۋىعى – 2-سىنىپتى ارپا.
4-5 سىنىپتى بيداي جيناۋدى ۇلعايتۋ پەرسپەكتيۆاسىن ەسكەرە وتىرىپ، شارۋالار وسى استىقتىڭ فورۆاردتىق ساتىپ الۋ باعاسىن مۇمكىندىگىنشە ەرتە جاريالاۋدى سۇراپ وتىر. سەرىك جۇمانعارين ازىق-تۇلىك كورپوراسياسىنا كەلەسى اپتادا فورۆاردتىق ساتىپ الۋ باعاسىن جاريالاۋدى تاپسىردى.
نەگىزگى استىق ەگەتىن وڭىرلەرگە استىق كەپتىرۋ اگرەگاتتارىنىڭ جۇمىسى ءۇشىن ارزان باعادا سۇيىتىلعان گاز جەتكىزۋ باستالدى. ءونىمدى جيناپ، كەپتىرۋگە قاجەتتى ديزەل وتىنىن تيەپ جونەلتۋ جوسپارعا سايكەس جۇرگىزىلۋدە.
كۇزدە توپىراققا ەنگىزۋ ءۇشىن قاجەتتى مينەرالدى تىڭايتقىشتاردى جونەلتۋ بارىسى جەكە قاراستىرىلدى. جالپى جوسپاردىڭ 84%-ىندا جونەلتۋ تومەن قارقىنمەن ءجۇرىپ جاتقان وڭىرلەر بار. ۆيسە-پرەمەر شارۋالار تىڭايتقىشتاردى ۋاقىتىندا قولدانۋ ءۇشىن جۇمىس ۇدەرىسىن جەدەلدەتۋدى تاپسىردى.