الماتىدا وتكەن «تۇركى الەمىنىڭ مەديا كەڭىستىگى: جاڭا داۋىردەگى مىندەتتەر مەن مۇمكىندىكتەر» تاقىرىبىنا VI حالىقارالىق تۇركىتىلدەس جۋرناليستەر مەديا فورۋمىندا ءوڭىرلىك قاۋىپسىزدىك تاقىرىبىنداعى جيىندا مەديا سالاسىنىڭ ماڭىزى ەرەكشە اتاپ ءوتىلدى. گەرمانياداعى تۇرىك مەدياسى اسسوسياسياسىنىڭ مامانى ادنان وزتۇركتىڭ ايتۋىنشا، مەديا – تەك اقپارات تاراتاتىن قۇرال ەمەس، حالىقتار اراسىنداعى سەنىم مەن ءتۇسىنىستى قالىپتاستىراتىن، كەيدە ءتىپتى شيەلەنىستى كۇشەيتۋى دە مۇمكىن بولاتىن ىقپالدى كۇش.
ساراپشى پىكىرىنشە، «مەديا – جۇرەكتەر اراسىنداعى كوپىر». ول سوڭعى جىلدارداعى وقيعالاردى مىسالعا كەلتىرە وتىرىپ، اقپارات قۇرالدارىنىڭ بەيبىتشىلىككە قوساتىن ۇلەسىن ءتۇسىندىردى.
كاۆكاز تاجىريبەسى دە وسىنى دالەلدەيدى. 2020 جىلعى قاقتىعىس كەزىندە الەۋمەتتىك جەلىلەردە تاراعان جالعان اقپارات ءتۇرلى ەتنوستار اراسىنداعى قورقىنىش پەن وشپەندىلىكتى كۇشەيتكەن. الايدا ونىڭ ايتۋىنشا، «كەيبىر مەديا رەسۋرستارى تەكسەرىلگەن اقپارات پەن پراگماتيكالىق كوزقاراستى ۇسىنا وتىرىپ، جاعدايدى جۇمسارتۋعا كومەكتەستى».
«تاياۋ شىعىستاعى ديالوگتىق جوبالار مىسالعا الۋعا بولادى. بءىر تەلەارنا جاس بۋىندى ورتاق ستۋدياعا جيناپ، اشىق پىكىر الماسۋ ۇيىمداستىرعان. جاستار بىر-بىرىنە قارسى تاراپ وكىلدەرى رەتىندە ەمەس، ورتاق ايماقتىڭ بالالارى رەتىندە سويلەستى. بۇل ميلليونداعان كورەرمەننىڭ ساناسىنداعى كوپتەگەن ستەرەوتيپتەردى بۇزدى، – دەدى ادنان وزتۇرك.
مامانداردىڭ پىكىرىنشە، مەديا – اقپارات تاراتۋشى عانا ەمەس، جاۋاپكەرشىلىك يەسى. حابار ءتىلىنىڭ ىڭعايى، كادر تاڭداۋى، تاقىرىپ قويۋدىڭ ءوزى قوعامداعى احۋالعا تىكەلەي اسەر ەتەدى.
«مەديا قورقىنىشتى ەمەس، ەمپاتيا مەن ءتۇسىنىستى كۇشەيتۋى كەرەك. ناعىز قاۋىپسىزدىك – انانىڭ كوز جاسىن، بالانىڭ قورقىنىشىن، جاستىڭ ءۇمىتىن شىنايى كورسەتۋ ارقىلى قالىپتاسادى. شىنايى جۋرناليست – تەك دەرەك جازاتىن ادام ەمەس، ادامدى قورعاۋشى. ال شىنايى مەديا – قورقىنىستىڭ ەمەس، ادامزاتتىڭ جاعىندا تۇراتىن مەديا»، – دەيدى ساراپشى.
ايتا كەتەيىك، مەديا فورۋمعا قازاقستان، ورتالىق ازيا، تۇركيا، ەۋروپا ەلدەرىنەن ب ا ق باسشىلارى، جۋرناليستەر، دەپۋتاتتار، مەديا سالاسىنداعى ۇەۇ باسشىلارى، قوعام قايراتكەرلەرى، PR مەنەدجەرلەر، باسپا ءسوز حاتشىلارى، جۋرناليستيكا فاكۋلتەتىنىڭ مۇعالىمدەرى مەن ستۋدەنتتەرى ت.ب. قاتىستى.