الماتىدا وتكەن «تۇركى الەمىنىڭ مەديا كەڭىستىگى: جاڭا داۋىردەگى مىندەتتەر مەن مۇمكىندىكتەر» تاقىرىبىنا VI حالىقارالىق تۇركىتىلدەس جۋرناليستەر مەديا فورۋمىندا قازاقستاندىق AI-كرەاتور قانات ەسىركەپوۆ كونتەنت ءوندىرۋ پروسەسىندە جاساندى ينتەللەكتىنى پايدالانۋ تاجىريبەسىن ءبولىستى.
ونىڭ ايتۋىنشا، قازىرگى رەداكسيالارداعى جۇمىستاردىڭ 30–40 پايىزى AI كومەگىمەن وڭاي اۆتوماتتاندىرىلىپ، جۋرناليستەردىڭ ۋاقىتىن ايتارلىقتاي ۇنەمدەۋگە مۇمكىندىك بەرەدى.
ەسىركەپوۆتىڭ سوزىنشە، جاساندى ينتەللەكت قۇرالدارى جاڭالىقتاردى مالىمەتتەر نەگىزىندە لەزدە گەنەراسيالاۋدا ءتيىمدى.
«قارجىلىق ەسەپتەر، سپورت ناتيجەلەرى، اۋا-رايىنا قاتىستى اقپارات سياقتى دەرەكتەردى AI ءدال ءارى جىلدام دايىنداي الادى»، – دەيدى ساراپشى.
سپيكەر كونتەنت ءوندىرىسىن ارتتىرۋدا AI-اۆاتارلار دا كەڭ قولدانىلا باستالعانىن اتاپ ءوتتى. ونىڭ ايتۋىنشا، مۇنداي تەحنولوگيالار اۆتوردىڭ داۋىسىن، ءستيلىن نەمەسە بەينەسىن كوشىرىپ، ۇلكەن كولەمدەگى ماتەريالدى تەز ءارى تۇراقتى شىعارۋعا مۇمكىندىك بەرەدى.
سونىمەن بىرگە، اۆتوماتتاندىرىلعان «كونتەنت زاۆودتارىن» قۇرۋعا ارنالعان N8N، Make، Opal سەكىلدى جۇيەلەر مەديا سالاسىندا ءجيى قولدانىلىپ كەلەدى. الايدا مامان بۇل سالاداعى باستى قاۋىپكە دە نازار اۋداردى.
«ەڭ ماڭىزدى ماسەلە – ديپفەيكتەر مەن جالعان اقپاراتتىڭ كوبەيۋى. بۇل مەدياعا دەگەن سەنىمگە تىكەلەي ءقاۋىپ توندىرەدى»، – دەيدى قانات ەسىركەپوۆ.
سپيكەردىڭ پىكىرىنشە، جاساندى ينتەللەكت تۇركىتىلدەس مەديا كەڭىستىگىن بىرىكتىرۋگە دە مۇمكىندىك بەرەدى. ول AI-دى دۇرىس يگەرۋ باسەكەگە قابىلەتتىلىكتى ارتتىراتىنىن اتاپ ءوتتى:
«AI مامانداردى الماستىرمايدى، ءبىراق AI-دى قولدانبايتىن مامانداردى الماستىرۋى مۇمكىن»، – دەدى ول.
ايتا كەتەيىك، مەديا فورۋمعا قازاقستان، ورتالىق ازيا، تۇركيا، ەۋروپا ەلدەرىنەن ب ا ق باسشىلارى، جۋرناليستەر، دەپۋتاتتار، مەديا سالاسىنداعى ۇەۇ باسشىلارى، قوعام قايراتكەرلەرى، PR مەنەدجەرلەر، باسپا ءسوز حاتشىلارى، جۋرناليستيكا فاكۋلتەتىنىڭ مۇعالىمدەرى مەن ستۋدەنتتەرى ت.ب. قاتىستى.