ۇستىمىزدەگى جىلى 12 ناۋرىز ساعات 18.00-دە اباي اتىنداعى ۇلتتىق وپەرا جانە بالەت تەاترىنىڭ ۇلكەن ساحناسىندا وپەرا ترۋپپاسىنىڭ ءسوليسى، ق ر ەڭبەك سىڭىرگەن قايراتكەرى دينا دۇتماعامبەتوۆانىڭ «ونەر – مەنىڭ ءومىرىم» اتتى شىعارماشىلىق كەشى وتەدى، دەپ حابارلايدى Almaty-akshamy.kz
دينا دۇتماعامبەتوۆا – اباي اتىنداعى ۇلتتىق وپەرا جانە بالەت تەاترىنىڭ وپەرا ترۋپپاسىنىڭ جارقىن وكىلى. قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى، كوپتەگەن رەسپۋبليكالىق جانە حالىقارالىق بايقاۋلار مەن فەستيۆالدەردىڭ لاۋرەاتى. ول ساحنادا ەڭ كۇردەلى دە الۋان ءتۇرلى كەيىپكەرلەردى – «كارمەن» وپەراسىنداعى نازىك ميكاەللانى، دج.ءپۋچچينيدىڭ اتتاس وپەراسىنداعى ءامىرشىل تۋراندوتتى، ە.برۋسيلوۆسكييدىڭ «قىز جىبەك» وپەراسىنداعى مەيىربان ءارى كوڭىلدى باتسايىنى بەينەلەيدى. ول ليريكالىق قاھارمانداردىڭ بەينەسىنەن تاعدىر شەشەتىن وكتەم كەيىپكەرلەردىڭ بەينەسىنە وڭاي اۋىسادى. دينا دۇتماعامبەتوۆانىڭ رەپەرتۋارىندا تولىق وپەرالىق پارتيالاردان باسقا مونو-وپەرالار دا، كامەرالىق شىعارمالار سيكلدارى دا بار. ول رەپەرتۋارىنا تاعى ءبىر مارجان قوسۋ ءۇشىن جاڭا مۋزىكاعا ءاردايىم قىزىعۋشىلىقپەن ەنەدى.
«باس ديريجەرىمىز، قازاقستان رەسپۋبليكاسىنىڭ ەڭبەك سىڭىرگەن قايراتكەرى ەربولات احمەدياروۆ جەتەكشىلىك ەتەتىن سيمفونيالىق وركەستردىڭ اۋەنىمەن ءبىز كورەرمەندەر ءۇشىن كونسەرتتىك باعدارلاما دايىندادىق، وعان شەتەلدىك جانە ورىس كلاسسيكتەرىنىڭ ايگىلى وپەرالىق قويىلىمدارىنان سيرەك ورىندالاتىن اريالار، سونداي-اق تەاترىمىزدىڭ ساحناسىندا ۇزاق جىلدار بويى قويىلىپ كەلە جاتقان جانە «التىن مۇرا» رەپەرتۋارىنا ەنگەن قازاق اۆتورلارىنىڭ شىعارمالارى كىرەدى»، – دەيدى دينا دۇتماعامبەتوۆا.