تەمىربەك جۇرگەنوۆ اتىنداعى قازاق ۇلتتىق ونەر اكادەمياسى رەسپۋبليكا كۇنى قارساڭىندا ءا.كاستەيەۆ اتىنداعى مەملەكەتتىك ونەر مۋزەيىندە «تۇلعالاردىڭ ىزىمەن» دەپ اتالاتىن كورمە اشتى.
ەكسپوزيسيادا اكادەميانىڭ «كەسكىندەمە، ءمۇسىن جانە ديزاين» فاكۋلتەتى ستۋدەنتتەرىنىڭ ۇزدىك ديپلومدىق، وقۋ جانە شىعارماشىلىق جۇمىستارى بار.
اتالمىش ونەر اكادەمياسى – ونەردىڭ ءتۇرلى سالالارىندا ماماندار دايارلايتىن ورتالىق ازيا مەن قازاقستاننىڭ جەتەكشى جوعارى وقۋ ورىندارىنىڭ ءبىرى. بۇگىنگى كۇنى وقۋ ورداسى رەسپۋبليكا سۋرەتشىلەرى ءۇشىن بەدەلدى مەكتەپ رەتىندە تانىمال. وتكەنگە ءسال شەگىنىس جاساپ كەتەر بولساق، بەينەلەۋ ونەرى فاكۋلتەتىن قالىپتاستىرۋدىڭ باستاۋىندا ەلىمىزدىڭ ۇلتتىق كوركەم كەسكىندەمە، ءمۇسىن جانە گرافيكا مەكتەبىنىڭ نەگىزىن قالاعان ق.تەلجانوۆ، م.كەنبايەۆ، ح.ناۋرىزبايەۆ، ك.شاياحمەتوۆ، ە.سەرگەبايەۆ، د.سۋلەيەۆ، ب.تۇلكييەۆ، د.شوقپاروۆ سياقتى كورنەكتى سۋرەتشىلەر تۇردى.
— كورمەدە 50-دەن استام شىعارما ۇسىنىلىپ وتىر. ولاردىڭ كوپشىلىگى تۇلەكتەردىڭ ديپلومدىق جۇمىستارىنان تۇرادى، سونىمەن قاتار ءارتۇرلى كۋرس ستۋدەنتتەرىنىڭ وقۋ جۇمىستارى كىرەدى. ونەرسۇيەر كورەرمەنگە مونۋمەنتالدى جانە ستانوكتىق گرافيكا، كەسكىندەمە، باسپا گرافيكاسى، ساندىك-قولدانبالى ونەردىڭ ءار تۇرلەرى: گوبەلەن، باتيك، شي، كەسكىندەمە، سونداي-اق زەرگەرلىك ونەر سياقتى بەينەلەۋ ونەرىنىڭ تۇرلەرى ۇسىنىلدى، — دەدى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارمان جۇدەبايەۆ.
ەكسپوزيسيادا ەجەلگى قازاق ميفولوگياسىنان، حالىق ەرتەگىلەرى مەن اڭىزدارىنان، سونداي-اق دالا حالىقتارىنىڭ تاريحىنان الىنعان بەينەلەرگە بايلانىستى ءبىرقاتار تۋىندى جارقىراپ تۇر. ءا.ومارقۇلدىڭ «بابالار ءسوزى»، س.مۇحتار قىزىنىڭ «جەزتىرناق» سياقتى شىعارمالارىندا سۋرەتشىلەر حالىق اۋىز شىعارماشىلىعىنىڭ مۇراسىنا نازار اۋدارا وتىرىپ، وتكەننىڭ بەينەلەرىن قازىرگى زاماننىڭ ينتەپرەتاسياسىندا بەينەلەيدى. بۇل جۇمىستارعا قازىرگى كۇنى تانىمال جاپون انيماسياسى اسەر ەتتى، ول ءوزىنىڭ جارقىن ۆيزۋالدى جانە كينەماتوگرافيالىق اسەرلەرىمەن ەرەكشەلەنەدى. ال م.جيگالەنوكتىڭ «شەبەرحانا» كومپوزيسياسى وقۋ ءۇردىسىنىڭ ءبىر ءساتىن بەينەلەيدى.
ەگەمەندى ەلىمىزدى كوركەيتىپ، بەزەندىرۋدە قوسقان ۇلەسىنىڭ باستاۋىن وسى بەينەلەۋ ونەرى مەكتەبىنىڭ تۋىندىلارى ايقىنداماق. بۇل كورمە كەسكىندەمە، ءمۇسىن جانە ديزاين فاكۋلتەتىنىڭ ءار جىلدارداعى قىزمەتى تۋرالى ەسەپ بەرۋدىڭ ءبىر ءتۇرى. فاكۋلتەت دەكانى باۋىرجان ءبايدىلدانىڭ وقۋ ءۇردىسىن جەتىلدىرۋدە، بەينەلەۋ ونەرى سالاسىنا جاس مامانداردى دايارلاۋ ادىستەمەسىن ازىرلەۋدە قوسقان ۇلەسى زور دەيدى كورمەنى ۇيىمداستىرۋشىلار.
— مەن بۇگىنگى كورمە ءۇشىن، زامانداستارىمنىڭ ۇزدىك جۇمىستارى ءۇشىن قۋانىشتىمىن. بارلىق كارتينادان ۇلتتىق بولمىسىمىز مەنمۇندالاپ تۇر. جاستار قازاقى قۇندىلىقتارىمىزدى زاماناۋي جاڭاشا كوزقاراسپەن، اشىق بوياۋلارمەن جەتكىزە بىلگەن. اتالارىم مولدا بولعان كىسىلەر، سوندىقتان دا تابيعاتىما قازاقى قۇندىلىقتار جاقىن. پورترەت جانرىندا تالاپتانىپ، وسى باعىتتا جۇمىس ىستەپ ءجۇرمىن. كەيبىر جانداردىڭ جاقسى ادام ەكەنى جۇزىنەن كورىنىپ تۇرادى عوي، پورترەتتەرىمدە ولاردىڭ سول جاقسى قاسيەتتەرى ەش بوياماسىز، كورەرمەن جۇرەگىنە بىردەن جول تاۋىپ، كورىنىپ تۇرسا ەكەن دەيمىن. ازىرگە ۇستازداردان ۇيرەنەرىمىز كوپ. ال جۇرەگى ونەرگە جاقىن سەزىمتال زامانداستارىما ساتتىلىك تىلەيمىن، — دەيدى كورمە مەيمانى، ت.جۇرگەنوۆ اتىنداعى قازاق ۇلتتىق ونەر اكادەمياسى كوللەدجىنىڭ ءىى كۋرس ستۋدەنتى توعجان ەلەۋسىز.
«تۇلعالاردىڭ ىزىمەن» كورمەسى وسى ايدىڭ سوڭىنا دەيىن جالعاسادى.